କରୋନା ମୁକାବିଲାକୁ ନେଇ ସାରା ଦେଶରେ ଦୀର୍ଘ ୪ ମାସରୁ ଅଧିକ ସମୟ ଧରି ସ୍କୁଲ-କଲେଜ ବନ୍ଦ ରହିଛି। ଶିକ୍ଷାନୁଷ୍ଠାନ ବନ୍ଦ ଥିବା ବେଳେ ପିଲାମାନଙ୍କ ଶିକ୍ଷାଦାନ ବାଧାପ୍ରାପ୍ତ ହେଉଛି। ଏସବୁ ମଧ୍ୟରେ ଏବେ ଅନ୍ଲାଇନ୍ ଶିକ୍ଷା ପ୍ରମୁଖ ମାଧ୍ୟମ ପାଲଟିଛି। ହେଲେ କିଛି ଗ୍ରାମରେ ରହୁଥିବା ପିଲାଙ୍କ ପାଇଁ ଏହା ଚିନ୍ତାର ବିଷୟ ପାଲଟିଛି। ମୋବାଇଲ୍ ନେଟଓ୍ବାର୍କ ରହୁ ନ ଥିବା ଯୋଗୁ ସେମାନେ ଅସୁବିଧାର ସମ୍ମୁଖୀନ ହେଉଛନ୍ତି। ଏହି କ୍ରମରେ ରାଜସ୍ଥାନର ବାର୍ମେର ଜିଲା ଦରୁଡ଼ାରେ ରହୁଥିବା ହରିଶ କୁମାର ଅନ୍ଲାଇନ୍ ପଢ଼ିବା ପାଇଁ ପ୍ରତ୍ୟେହ ୨ କିମି ଦୂରରେ ଥିବା ପାହାଡ଼ ଉପରେ ଚଢ଼ୁଛନ୍ତି। ସକାଳ ୮ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ସେ ୪୦ ରୁ ୪୫ ଡିଗ୍ରୀ ତାପମାତ୍ରାରେ ବସି ପାଠ ପଢ଼ୁଛନ୍ତି। ଏହାସତ୍ତ୍ୱେ ହରିଶଙ୍କ ମନୋବଳ ଭାଙ୍ଗିବା ବଦଳରେ ଶହେ ଗୁଣା ବଢ଼ିଥିବା ନେଇ ଚର୍ଚ୍ଚା ହେଉଛି। ସୋସିଆଲ ମିଡିଆରେ ଏ ସଙ୍କ୍ରାନ୍ତରେ ଅନେକ ଫଟୋ ଭାଇରାଲ ହେବା ପରେ ଏବେ ଲୋକପ୍ରିୟ କ୍ରିକେଟର ବିରେନ୍ଦ୍ର ସେହଓ୍ବାଗ୍ ହରିଶଙ୍କ ସହାୟତା କରିବାକୁ ଆଗକୁ ଆସିଛନ୍ତି। ଏକ ଟୁଇଟ୍ କରି ସେହଓ୍ବାଗ୍ ଏହି ସୂଚନା ଦେଇଛନ୍ତି।
ହରିଶ ଏବେ ପଚପଦରା ସ୍ଥିତ ଜବାହାର ନବୋଦୟ ବିଦ୍ୟାଳୟରେ ୭ମ ଶ୍ରେଣୀରେ ପଢ଼ୁଛନ୍ତି। ଏବେ କୋଭିଡ-୧୯କୁ ନେଇ ସ୍କୁଲ ବନ୍ଦ ରହିଛି। ହେଲେ ଦେଢ଼ ମାସରୁ ଅଧିକ ସମୟ ଧରି ଅନ୍ଲାଇନ୍ କ୍ଲାସ ଚାଲିଥିବାରୁ ସେ ପାହାଡ଼ ଚଢ଼ି ପାଠ ପଢ଼ିବାକୁ ଯାଉଛନ୍ତି। ଏଥିପାଇଁ ତାଙ୍କୁ ସକାଳୁ ଉଠି ୨ କିଲୋମିଟର ଚାଲିବାକୁ ପଡ଼ୁଛି। ଟେବୁଲ ଏବଂ ଚଉକି ସହ ପାହାଡ଼ ଉପରେ ବସି ପାଠ ପଢ଼ୁଛନ୍ତି। ଗାଁରେ ଇଣ୍ଟରନେଟ୍ ସେବା ଠିକ୍ ଭାବେ ନ ଥିବାରୁ ହରିଶ ଏପରି କରୁଥିବା ପ୍ରକାଶ କରିଛନ୍ତି। ଅପରପକ୍ଷେ ଅନ୍ଲାଇନ୍ ପଢ଼ାକୁ ନେଇ ସରକାରଙ୍କୁ ଗ୍ରାମୀଣସ୍ତରରେ ଫୋନ୍ ସେବାକୁ ଠିକ୍ କରିବାକୁ ହରିଶଙ୍କ ବାପା ବିରମଦେବ କହିଛନ୍ତି। ଏପରି ହେଲେ ପିଲାମାନେ ପାଠ ପଢ଼ିପାରିବେ ବୋଲି ସେ କହିଛନ୍ତି।
