ମୁମ୍ବାଇ,୭।୫: ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍) ୨୦୨୨ରେ ନୂତନ ଟିମ୍ରୁ ଖେଳି ଜବରଦସ୍ତ ପ୍ରଦର୍ଶନ କରି ଆସୁଛନ୍ତି ଡେଭିଡ ଓ୍ବାର୍ନର। ଗୁରୁବାର ନିଜର ପୁରୁୁଣା ଟିମ୍ ସନରାଇଜର୍ସ ହାଇଦ୍ରାବାଦ ବିପକ୍ଷରେ ଖେଳି ୫୮ ବଲ୍ରେ ୯୨ ରନ୍ କରିଥିଲେ ସେ। ଏହା ଟୁର୍ନାମେଣ୍ଟରେ ତାଙ୍କର ଚତୁର୍ଥ ଅର୍ଦ୍ଧଶତକ। ଓ୍ବାର୍ନର ଗୋଟିଏ ପଟେ ନିଜର ପ୍ରଦର୍ଶନରେ ସମସ୍ତଙ୍କ ହୃଦୟ ଜିତୁଥିବା ବେଳେ ଭାରତର ପୂର୍ବତନ ବିସ୍ଫୋରକ ବ୍ୟାଟ୍ସମ୍ୟାନ୍ ବିରେନ୍ଦ୍ର ସେହ୍ବାଗ ତାଙ୍କ ବିଷୟରେ କିଛି କଥା ଉପରୁ ପରଦା ହଟାଇଛନ୍ତି।
ଦ୍ୱିତୀୟ ସଂସ୍କରଣରୁ ଆଇପିଏଲ୍ ସହ ଯୋଡ଼ି ହୋଇ ରହିଛନ୍ତି ଓ୍ବାର୍ନର। ସେ ସେତେବେଳେ ଦିଲ୍ଲୀ ଡେୟାର ଡେଭିଲ୍ସ(ଏବେର ଦିଲ୍ଲୀ କ୍ୟାପିଟାଲ୍ସ) ପକ୍ଷରୁ ଡେବ୍ୟୁ କରିଥିଲେ। ଓ୍ବାର୍ନରଙ୍କ ଡେବ୍ୟୁ ସମୟରେ ସେହ୍ବାଗ ଦିଲ୍ଲୀର ଅଧିନାୟକ ଥିଲେ। ଏବେ ସେହିଦିନଗୁଡ଼ିକୁ ମନେ ପକାଇଛନ୍ତି ସେହ୍ବାଗ।
ଓ୍ବାର୍ନର ପ୍ରଥମେ ଯେତେବେଳେ ଦିଲ୍ଲୀ ସହ ଜଡ଼ିତ ହୋଇଥିଲେ ସେତେବେଳେ ତାଙ୍କ ଧ୍ୟାନ ଖେଳରେ କମ୍, ପାର୍ଟି କରିବାରେ ଅଧିକ ଥିଲା। ପ୍ରଥମ ବର୍ଷରୁ ହିଁ କିଛି ଖେଳାଳିଙ୍କ ସହ ତାଙ୍କର ଝଗଡ଼ା ହୋଇଯାଇଥିଲା। ଏହାପରେ ତାଙ୍କୁ ଶେଷ ଦୁଇ ମ୍ୟାଚ୍ରେ ଡ୍ରପ୍ କରାଯାଇଥିଲା। ଅନେକ ଥର ଆମେ କାହାକୁ ଶିକ୍ଷା ଦେବାକୁ ଯାଇ କିଛି ନୂଆ କରିଥାଉ। ଏଣୁ ଖାଲି ସେ ଦଳ ପାଇଁ ଗୁରୁତ୍ୱପୂର୍ଣ୍ଣ ନୁହନ୍ତି ବରଂ ଦଳର ବାକି ଖେଳାଳିମାନଙ୍କର ସମାନ ଭୂମିକା ରହିଛି। ଅନେକ ଖେଳାଳି ଭଲ ଖେଳି ମ୍ୟାଚ୍ ଜିତାଇପାରନ୍ତି ବୋଲି ତାଙ୍କୁ ଜଣାଇବାକୁ ଚାହିଁଥିଲୁ। ସେଭଳି ହିଁ ହୋଇଥିଲା। ଓ୍ବାର୍ନରଙ୍କୁ ବାଦ୍ ଦେଇ ମଧ୍ୟ ଦିଲ୍ଲୀ ମ୍ୟାଚ୍ ଜିତିଥିଲା ବୋଲି ସେହ୍ବାଗ କହିଛନ୍ତି।
କହିରଖୁଛୁ, ଆଇପିଏଲ୍ ୨୦୨୨ ନିଲାମରେ ଓ୍ବାର୍ନରଙ୍କୁ ଦିଲ୍ଲୀ ଟିମ୍ ୬.୨୫କୋଟି ଟଙ୍କାରେ କିଣିଛି। ଏହାପୂର୍ବରୁ ସେ ହାଇଦ୍ରାବାଦ ଟିମ୍ର ଅଂଶ ଥିଲେ।
