ଭାରତୀୟ କ୍ରିକେଟ୍ ଦଳର ପୂର୍ବତନ ବିସ୍ଫୋରକ ବ୍ୟାଟ୍ସମ୍ୟାନ୍ ବୀରେନ୍ଦ୍ର ସେହ୍ବାଗ ପଡିଆରେ ସବୁ ବୋଲରଙ୍କୁ ଆକ୍ରମଣାତ୍ମକ ପ୍ରହାର କରିଥାନ୍ତି। ଖୁବ୍ କମ୍ ଲୋକ ଜାଣିଥିବେ ସେହ୍ବାଗ୍ ପିଲାଦିନେ ପରିବାର ଲୋକଙ୍କଠାରୁ ଖୁବ୍ ମାଡ ଖାଇଛନ୍ତି। କେବଳ ଏତିକି ନୁହେଁ ବିଡି ଟାଣିବା ଚକ୍କରରେ ସେ ଚପଲରେ ମଧ୍ୟ ମାଡ ଖାଇଥିଲେ। ଏକ ସାକ୍ଷାତକାରରେ ସେ ଏହା ଖୁଲାସା କରିଥିଲେ। ନଜଫଗଡରେ ରହୁଥିବା ସେହ୍ବାଗ କହିଥିଲେ, ଆମର ଯୌଥ ପରିବାର ଥିଲା। ଚାଚା, ବଡ ବାପାଙ୍କ ପିଲାମାନେ ଆମେ ସମସ୍ତେ ମିଶି କ୍ରିକେଟ ଖେଳୁଥିଲୁ। ବ୍ୟାଟିଂ କରି ଲୋକଙ୍କ ଝରକା ଭାଙ୍ଗିଦେଉଥିଲୁ। ସେ ସମୟରେ ୨୨ ଟଙ୍କାରେ ବଲ୍ ବିକ୍ରି ହେଉଥିଲା। ୧୧-୧୧ଟଙ୍କା ମିଶାଇ ବଲ୍ କିଣୁ। ଯେଉଁ ଟିମ୍ ମ୍ୟାଚ୍ ଜିତେ ବଲ୍ ସିଏ ନିଏ ବୋଲି ସେ କହିଥିଲେ। ଚପଲରେ ମାଡ ଘଟଣାକୁ ନେଇ ସେହ୍ବାଗ କହିଥିଲେ, ଆମ ଘର ପଛରେ ଏକ ହସ୍ପିଟାଲ ଥିଲା। ମୁଁ ଏବଂ ମୋ ସମ୍ପର୍କୀୟ ସେଠାରେ ବସୁଥିଲୁ। ଦିନେ ମୋ ପିତାଙ୍କ ବିଡି ବଣ୍ଡଲ୍କୁ ଚୋରି କରି ନେଇଆସିଥିଲି। ଆମେ ୫ ସମ୍ପର୍କୀୟ ଭାଇ ଟାଣୁ ଟାଣୁ ଧୂଆଁ ଆମ ଘର ଭିତରେ ପଶିଯାଇଥିଲା। ଏହାପରେ ଚପଲ ଏବଂ ଠେଙ୍ଗାରେ ମାଡ ହୋଇଥିଲା ବୋଲି ସେ କହିଥିଲେ। ସେହ୍ବାଗ ପିଲାଦିନେ ସ୍କୁଲ ଯିବାକୁ ଆଦୌ ରାଜି ହେଉ ନ ଥିଲେ। ତାଙ୍କ ମା’ଙ୍କୁ ହଇରାଣ କରୁଥିଲେ। ଗାଧୋଇବା ପାଇଁ ପାଣି ଗରମ କରୁଥିଲେ ମଧ୍ୟ ସେ ତାଙ୍କୁ ଢାଳି ଦେଉଥିବା ତାଙ୍କ ମା’ ଏକ ସାକ୍ଷାତକାରରେ କହିଥିଲେ।
(ବି.ଦ୍ର: ବିଡି ଟାଣିବା ଶରୀର ପକ୍ଷେ ହାନିକାରକ)