ବେଜିଂ, ୧୭ା୬: ଚାଇନାର ଉହାନ୍ ଇନ୍ଷ୍ଟିଚ୍ୟୁଟ୍ ଅଫ୍ ଭାଇରୋଲୋଜିରୁ କରୋନା ଭୂତାଣୁ ଲିକ୍ ହୋଇଥିବା କଥା ଭୁଲ୍ ବୋଲି କହିଛନ୍ତି ଚାଇନା ବ୍ୟାଟ୍ ଓମ୍ୟାନ ଭାବେ ପରିଚିତ ଡା. ଶି ଝେଙ୍ଗଲି। କରୋନାଜନିତ ସ୍ବାସ୍ଥ୍ୟ ସଙ୍କଟ ପାଇଁ ତାଙ୍କ ଇନ୍ଷ୍ଟିଚ୍ୟୁଟ୍କୁ ବଦନାମ କରାଯାଉଥିବା ସେ କହିଛନ୍ତି। ବାଦୁଡି କରୋନା ଭାଇରସ୍ ଉପରେ ଗବେଷଣା କରୁଥିବା ଶି ଝେଙ୍ଗଲି ନ୍ୟୁୟର୍କ ଟାଇମ୍ସକୁ କହିଛନ୍ତି, କୌଣସି ଘଟଣା ଘଟି ନ ଥିଲେ ଏହାର ପ୍ରମାଣ କିପରି ଦିଆଯାଇପାରିବ। ଗତ ମାସରେ ଆମେରିକା ରାଷ୍ଟ୍ରପତି ଜୋ ବାଇଡେନ୍ କରୋନା ଭୂତାଣୁର ମୂଳ ଜାଣିବାକୁ ଗୋଇନ୍ଦା ବିଭାଗକୁ ନିର୍ଦ୍ଦେଶ ଦେଇଥିଲେ। ଯାଞ୍ଚରେ ଚାଇନା ଲାବ୍ରୁ ଭାଇରସ୍ ବାହାରିଥିବା ଦିଗକୁ ମଧ୍ୟ ତଦନ୍ତ ପରିସରକୁ ନେବାକୁ କହିଥିଲେ। ୨୦୧୭ରେ ଶି ଏବଂ ତାଙ୍କ ସହଯୋଗୀ ଉହାନ୍ ଲାବେରେଟୋରିରେ ପରୀକ୍ଷଣ ବେଳେ ବିଭିନ୍ନ ପ୍ରକାର ନମୁନା ନେଇ ହାଇବ୍ରିଡ୍ ବ୍ୟାଟ୍ କରୋନା ଭୂତାଣୁ ସୃଷ୍ଟି କରିଥିବା ନ୍ୟୁୟର୍କ ଟାଇମ୍ସ ପକ୍ଷରୁ ରିପୋର୍ଟ ପ୍ରକାଶ ପାଇଛି। ଏହି ହାଇବ୍ରିଡ୍ କେତେମାତ୍ରାରେ ସଂକ୍ରାମକ ଏବଂ ନୂଆ ରୂପ ଧାରଣ କରିବାରେ କିପରି ସଫଳ ହେଉଛି ତାହା ଉପରେ ଗବେଷଣା କରାଯାଉଥିଲା ବୋଲି ଏହି ଖବରକାଗଜ କହିଛି। ତେବେ ଏପରି କୌଣସି ଗବେଷଣା କରାଯାଇ ନ ଥିଲା ବୋଲି ଶି କହିଛନ୍ତି।