ଡେରାବିଶ,୨୩ା୫ (ସ୍ବ.ପ୍ର.): କେନ୍ଦ୍ରାପଡ଼ା ଜିଲା ଅନ୍ତର୍ଗତ ଡେରାବିଶ ବ୍ଲକର ବିଶିବିଲି ପାଟନାଳୀ ଜରାଜୀର୍ଣ୍ଣ ଅବସ୍ଥାରେ ପଡ଼ିରହିଛି। ବ୍ଲକର ୧୦ରୁ ଊର୍ଦ୍ଧ୍ୱ ପଞ୍ଚାୟତ ସମେତ କେନ୍ଦ୍ରାପଡ଼ା ବ୍ଲକ ଅନ୍ତର୍ଗତ କେତୋଟି ପଞ୍ଚାୟତବାସୀ ସେମାନଙ୍କର ଚାଷ ପାଇଁ ଏହା ଉପରେ ନିର୍ଭରଶୀଳ। କେନ୍ଦ୍ରାପଡ଼ା ଡ୍ରେନେଜ କଟ୍ ବିଭାଗ ଅଧୀନରେ ଥିବା ବିଶିବିଲି ପାଟରେ ଥିବା ପାଟନାଳୀଟି ଦୀର୍ଘବର୍ଷ ହେବ ପୁନରୁଦ୍ଧାର ନ ହେବାରୁ ୨ହଜାର ହେକ୍ଟରରୁ ଊର୍ଦ୍ଧ୍ୱ ଚାଷ ଜମି କ୍ଷତିଗ୍ରସ୍ତ ହେଉଛି। ଫଳରେ ୧୦ଟି ପଞ୍ଚାୟତର ୩୦ରୁ ଊର୍ଦ୍ଧ୍ୱ ଗ୍ରାମବାସୀ ଖରିଫ୍ ଓ ରବି ଚାଷ ପାଇଁ କ୍ଷତିଗ୍ରସ୍ତ ହେଉଛନ୍ତି। ଦିନଥିଲା ଏହି ପାଟନାଳୀରେ ଆସୁଥିବା ପାଣିରେ ଚାଷ କରି ଗ୍ରାମର ଚାଷୀ ଆନନ୍ଦରେ ଦିନ କାଟୁଥିଲେ। ଦୀର୍ଘବର୍ଷ ହେବ ଏହି ପାଟନାଳୀଟି ପୋତି ହୋଇଯିବା ଫଳରେ ଜଳ ନିଷ୍କାସନ ନ ହେବା ଯୋଗୁ ଚାଷଜମିରେ ପାଣି ଜମି ରହି ଫସଲ ବାରମ୍ବାର ନଷ୍ଟ ହେଉଥିବା ବାରିମୂଳ ପଞ୍ଚାୟତ ଦୋହରା ଗ୍ରାମର ଗୋବିନ୍ଦ ମଲିକ କହିଛନ୍ତି।
୩୦ କିଲୋମିଟର ଲମ୍ବ ବିଶିଷ୍ଟ ଏହି ପାଟନାଳୀଟି ଡେରାବିଶ ବ୍ଲକ ମଙ୍ଗଳପୁର ପଞ୍ଚାୟତସ୍ଥିତ ଗୋବରୀ ନଦୀରୁ ବାହାରି ବ୍ଲକ ଅଧୀନ ବାରିମୂଳ ସମେତ ବିଭିନ୍ନ ପଞ୍ଚାୟତ ଅଞ୍ଚଳ ବାଟଦେଇ କେନ୍ଦ୍ରାପଡ଼ା ବ୍ଲକ ଜଝାଙ୍ଗଠାରେ ଗୋବରି ନଦୀରେ ମିଶିଛି। ପାଟନାଳୀଟି ତା’ର ଅସ୍ତିତ୍ୱ ହରାଇଥିବା ବେଳେ ସମ୍ପୂର୍ଣ୍ଣ ଶୁଖି ଖେଳପଡ଼ିଆର ଭ୍ରମ ସୃଷ୍ଟି କରିଛି। ଫଳରେ ଏହି ପାଟନାଳୀରୁ ଜଳସେଚନ ସୁବିଧାରୁ ଚାଷୀମାନେ ଚାଷକାର୍ଯ୍ୟରୁ ବଞ୍ଚତ୍ତ ହେଉଥିବା ଗଣିଆମୁହଁ ଗ୍ରାମର ଚାଷୀ ଗଙ୍ଗାଧର ପୃଷ୍ଟି କହିଛନ୍ତି। ଏ ସମ୍ପର୍କରେ ବାରିମୂଳର ପୂର୍ବତନ ସରପଞ୍ଚ ଶୁଦ୍ଧଦେବ ବେହେରା କହିଛନ୍ତି, ଦୀର୍ଘବର୍ଷ ହେବ ପାଟନାଳୀଟି ସଫା ନ ହେବାରୁ ଏକର ଏକର ଚାଷଜମି ଚାଷ ନ ହୋଇ ପଡ଼ିଆ ପଡ଼ିବା ଫଳରେ ସମ୍ପୃକ୍ତ ପଞ୍ଚାୟତର ଚାଷୀ କ୍ଷତିଗ୍ରସ୍ତ ହେଉଛନ୍ତି। ଏହି ପାଟନାଳୀରୁ ଜଳସେଚିତ ହୋଇ ମକା, କୋବି ସମେତ ପନିପରିବା ଫସଲ କରି ଅଞ୍ଚଳର ଚାଷୀମାନେ ବହୁ ଲାଭବାନ ହେଉଥିଲେ। ମାତ୍ର ବିଭାଗୀୟ ଅପାରଗତା ପାଇଁ ଶହଶହ ସଂଖ୍ୟାରେ ଚାଷୀମାନେ କ୍ଷତିଗ୍ରସ୍ତ ହେଉଛନ୍ତି। ଏ ସମ୍ପର୍କରେ ୧୩ ନଂ. ଜୋନ୍ ଜିଲା ପରିଷଦ ସଭ୍ୟା ତଥା ଜିଲା ପରିଷଦ ସଭାପତି ଗୀତାଞ୍ଜଳି ସେଠୀଙ୍କୁ ପଚାରିବାରେ ଜିଲା ପରିଷଦ ବୈଠକରେ ଆଲୋଚନା କରାଯାଇ ତୁରନ୍ତ ଏହି ପାଟନାଳୀର ପୁନରୁଦ୍ଧାର ପାଇଁ ସେ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରାଇବା ସହ ଅଞ୍ଚଳର ଚାଷୀଙ୍କ ସମସ୍ୟା କିପରି ତୁରନ୍ତ ଦୂର ହେବ ସେ ଦିଗରେ ପଦକ୍ଷେପ ନେବେ ବୋଲି ସେ କହିଛନ୍ତି। ଏ ସଂକ୍ରାନ୍ତରେ ସମ୍ପୃକ୍ତ ପଞ୍ଚାୟତର ଶତାଧିକ ଚାଷୀ ଡ୍ରେନେଜ କଟ୍ ବିଭାଗର ଅଧୀକ୍ଷଣ ଯନ୍ତ୍ରୀଙ୍କ ସମେତ ଜିଲାପାଳ ଓ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି। ମାତ୍ର ବିଭାଗୀୟ କର୍ତ୍ତୃପକ୍ଷ ଏ ଦିଗରେ କୌଣସି ପଦକ୍ଷେପ ନେଇନାହାନ୍ତି। ଆସନ୍ତା ଖରିଫ ଧାନଚାଷ ପାଇଁ ସମୟ ନିକଟତର ହେଉଥିବା ବେଳେ ଚାଷୀମାନେ ଏବେଠୁ ମୁଣ୍ଡରେ ହାତ ଦେଇ ବସିଛନ୍ତି। ଏ ସମ୍ପର୍କରେ କେନ୍ଦ୍ରାପଡ଼ା ଡ୍ରେନେଜ କଟ୍ ବିଭାଗର ଅଧୀକ୍ଷଣ ଯନ୍ତ୍ରୀ ବାଙ୍କ ବିହାରୀ ସାମଲଙ୍କୁ ପଚାରିବାରେ ବିଶିବିଲି ପାଟନାଳୀର ପୁନରୁଦ୍ଧାର ପାଇଁ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ନିକଟକୁ ଏଷ୍ଟିମେଟ୍ ପଠାଯାଇଛି। ଖୁବଶୀଘ୍ର ଏ ନେଇ ଅର୍ଥ ମଞ୍ଜୁର ହେବା ସହ ଆସନ୍ତା ଜୁନ୍ ସୁଦ୍ଧା ଟେଣ୍ଡର ପ୍ରକ୍ରିୟା ଶେଷ ହେଲେ ପୁନରୁଦ୍ଧାର କାର୍ଯ୍ୟ ଆରମ୍ଭ ହେବ।