ଶାହଜହାଁପୁର,୧୭।୫: ବିବାହ ଏଭଳି ଏକ ବନ୍ଧନ ଯାହା ପୂର୍ବରୁ ନିର୍ଦ୍ଧାରିତ ହୋଇ ରହିଥାଏ ବୋଲି କୁହାଯାଏ। କିଏ କେଉଁଠି, ଆଉ କାହା ସହ ବିବାହ କରିବ ସେସବୁ ପୂର୍ବରୁ ନିର୍ଦ୍ଧାରିତ ହେବା ସହ ଶେଷ ମୁହୂର୍ତ୍ତ ଯାଏଁ ବି ଅନିଶ୍ଚିତତା ହୋଇ ରହିଥାଏ। ତେବେ କିଛି ଏଭଳି ଆଶ୍ଚର୍ଯ୍ୟଜନକ ଘଟଣା ଘଟିଛି ଉତ୍ତରପ୍ରଦେଶରେ। ଯେଉଁଠି ବିଦେଶୀ କନ୍ୟାର ହାତ ଧରିଛନ୍ତି ଦେଶୀ ବର। ଆଉ ଅନ୍ଲାଇନ୍ରେ ସାମିଲ ହୋଇଛନ୍ତି ବରଯାତ୍ରୀ। ଶାହଜହାଁପୁର ସ୍ଥିତ ରୋଶନଗଞ୍ଜରେ ରହୁଥିବା ଡ. ବିଶ୍ୱାସ ପାଣ୍ଡେଙ୍କ ଏହି ନିଆରା ବିବାହ ଏବେ ଚର୍ଚ୍ଚାର ବିଷୟ ପାଲଟିଛି। ସୂଚନାଯୋଗ୍ୟ, ବିଶ୍ୱାସ ଆମେରିକାର ସିକାଗୋରେ ପୋଷ୍ଟ ଡକ୍ଟରାଲ ରିସର୍ଚ୍ଚ ଆସୋସିଏଟ୍ ଭାବେ କାର୍ଯ୍ୟରତ ଅଛନ୍ତି। ଅନ୍ୟପଟେ ୟୁରୋପର ସ୍ଲୋଭେନିଆ ବାସିନ୍ଦା ଡ.ମିତା ବେଲିଜିୟମ୍ ବୁସେଲ୍ସରେ କାଉନସିଲର ରହିଛନ୍ତି। ଗତ ବର୍ଷରୁ ବିଶ୍ୱାସ ଓ ମିତାଙ୍କ ବିବାହ ନିର୍ଦ୍ଧାରିତ ହୋଇଥିବା ବେଳେ ଉତ୍ତରପ୍ରଦେଶ ଶାହଜହାଁପୁରରେ ଏହା ଅନୁଷ୍ଠିତ ହେବାର ଥିଲା। କିନ୍ତୁ କରୋନା ସଙ୍କଟ ଯୋଗୁ ଅର୍ନ୍ତଜାତୀୟ ବିମାନ ବନ୍ଦ ହେବାରୁ ଗତ ବର୍ଷରୁ ସେମାନଙ୍କର ବିବାହ ସ୍ଥଗିତ ହୋଇ ରହିଥିଲା। କିନ୍ତୁ ଚଳିତ ବର୍ଷ ଅକ୍ଷୟ ତୃତୀୟ ଅବସରରେ ଘର ଲୋକଙ୍କ ସହମତିରେ ଦୁହେଁ ହିନ୍ଦୁ ରୀତିନୀତିରେ ଶିକାଗୋର କୃଷ୍ଣଙ୍କ ମନ୍ଦିରରେ ବିବାହ କରିଛନ୍ତି। ଆଉ ଏହି ଅବସରରେ ଉଭୟ ପରିବାର ଅନ୍ଲାଇନ୍ରେ ସାମିଲ ହୋଇ ନବଦମ୍ପତିଙ୍କୁ ଶୁଭେଚ୍ଛା ଜଣାଇବା ସହ ଆର୍ଶୀବାଦ କରିଥିଲେ।