ଭୁବନେଶ୍ୱର, ୨୫।୧୦(ବ୍ୟୁରୋ): ଫିକା ପଡ଼ିଛି ମା’ଙ୍କ ଧରାବତରଣ। ଭକ୍ତ ନିରାଡମ୍ବରରେ ପାଳିତ ହେଉଛି ମା’ଙ୍କ ପୂଜାର୍ଚ୍ଚନା। ନା ଆଗ ପରି ବଡ଼ ତୋରଣ ଅଛି ନା ଜାକଜମକ। କେବଳ ପରମ୍ପରା ଓ ରୀତିନୀତି ଅନୁସାରେ ମା’ ଦୁଗର୍ର୍ାଙ୍କ ପୂଜାର୍ଚ୍ଚନା ଜାରି ରହିଛି। ନୀତି ଅନୁସାରେ କେଉଁଠି ପୀଠରେ ତ କେଉଁଠି ମଣ୍ଡପରେ ମା’ଙ୍କ ନୀତିକାନ୍ତି ଚାଲିଛି। ମଣ୍ଡପରେ ଶ୍ରଦ୍ଧାଳୁଙ୍କ ଦର୍ଶନ ବାରଣ ଯୋଗୁ କେବଳ ପୂଜକ ଓ ଆୟୋଜକଙ୍କୁ ନେଇ ଚଳିତବର୍ଷ ମା’ ପୂଜା ପାଉଛି। ବିଶେଷ କରି କଟକ ଓ ଭୁବନେଶ୍ୱରରେ ପ୍ରତ୍ୟେକ ବର୍ଷ ମା’ଙ୍କ ପୂଜାରେ ଯେଉଁଭଳି ଅସମ୍ଭାଳ ଭିଡ଼ ଦେଖିବାକୁ ମିଳେ ତାହା ଏଥର ଦେଖିବାକୁ ମିଳୁ ନାହିଁ। ତଥାପି ଭକ୍ତଙ୍କ ଉତ୍କଣ୍ଠାକୁ ଦୃଷ୍ଟିରେ ରଖି କଟକ ଭୁବନେଶ୍ୱରର କିଛି ମଣ୍ଡପରେ ସିସିଟିଭି ବ୍ୟବସ୍ଥା ଲଗାଯାଇ ଟିଭି ଓ ମୋବାଇଲ ମାଧ୍ୟମରେ ଲାଇଭ୍ ଦର୍ଶନର ବ୍ୟବସ୍ଥା କରାଯାଉଛି। ଯାହାକି ଶ୍ରଦ୍ଧାଳୁଙ୍କ ମଧ୍ୟରେ ଆଧ୍ୟାତ୍ମିକ ପରିବେଶ ସୃଷ୍ଟି କରିବା ସହ ସଂକ୍ରମଣଠାରୁ ଦୂରେଇ ରହିବାର ମାଧ୍ୟମ ସାଜିଛି। ଭୁବନେଶ୍ୱର ଓ କଟକରେ କେତେକ ଭକ୍ତ ଶନିବାର ମହାଷ୍ଟମୀରେ ମଣ୍ଡପ ନିକଟକୁ ନ ଯାଇ ପାରି ରାସ୍ତାରୁ ଦୂରରେ ରହି ମା’ଙ୍କୁ ଦର୍ଶନ କରିଥିବା ନଜରକୁ ଆସିଛି। କରୋନା ପାଇଁ ଭକ୍ତଙ୍କ ମଣ୍ଡପ ଭିତରକୁ ଯିବା ନିଷେଧ କରାଯାଇଥିବାରୁ ଶ୍ରଦ୍ଧାଳୁଙ୍କ ଭାବାବେଗ ପ୍ରତି କଠୋର ଆଘାତ ଆସିଥିବା କେତେକ ଭକ୍ତ ପ୍ରକାଶ କରିଛନ୍ତି। ପ୍ରତ୍ୟେକ ମଣ୍ଡପରେ ପୋଲିସ ଛାଉଣୀ ଥିବାରୁ ମଣ୍ଡପ ବାହାରେ ଛିଡ଼ା ହେଲେ ପୋଲିସ ଘଉଡ଼ାଇ ଦେଉଛନ୍ତି। ଫଳରେ ଶ୍ରଦ୍ଧାଳୁ ନିରାଶ ହୋଇ ଘରକୁ ଫେରୁଥିବା ମତପ୍ରକାଶ ପାଇଛି। ତେବେ ଚଳିତବର୍ଷ ଅଧିକାଂଶ ମଣ୍ଡପରେ ୪ ଫୁଟରୁ କମ୍ ଉଚ୍ଚତାର ମୂର୍ତ୍ତି ହୋଇଥିବାରୁ ସୁନା ଓ ରୁପା ଗହଣା ବଦଳରେ ଜରି ଓ ମାଟିର ଅଳଙ୍କାରରେ ଦଶଭୂଜା ଓ ଅନ୍ୟ ପାର୍ଶ୍ୱ ଦେବଦେବୀ ବିଭୁଷିତ ହୋଇଛନ୍ତି। କରୋନା ମହାମାରୀ କାରଣରୁ ଦଶହରାର ପରିବେଶ ଫିକା ପଡ଼ିଯାଇଛି। ଏହା ସତ୍ତ୍ୱେ ମା’ଙ୍କ ଦର୍ଶାନାଭିଳାଷର୍ଥେ ଆସୁଥିବା ଶ୍ରଦ୍ଧାଳୁ ଖାଲି ହାତରେ ଫେରୁ ନାହାନ୍ତି। ବହୁ ସ୍ଥାନରେ ପୂଜା କମିଟିଗୁଡ଼ିକ ଶ୍ରଦ୍ଧାଳୁଙ୍କୁ ପ୍ରସାଦ ନ ଦେଇ କରୋନା ସଚେତନତା ପାଇଁ ମାସ୍କ ଓ ସାନିଟାଇଜର ବାଣ୍ଟିବା ସହ କରୋନାଠୁ କିପରି ଦୂରରେ ରହିବେ ସେନେଇ ଲିଫ୍ଲେଟ୍ ବାଣ୍ଟୁଥିବାର ଦେଖିବାକୁ ମିଳୁଛି।
