ଭୁବନେଶ୍ୱର,୨୮।୧୦(ବ୍ୟୁରୋ): ଭୁବନେଶ୍ୱର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରେ ବୁଧବାର ଏକ ବିମାନ ଦୁର୍ଘଟଣାରୁ ବର୍ତ୍ତି ଯାଇଛି। ଆମ୍ ଆଦ୍ମୀ ପାର୍ଟି(ଏଏପି)ର ରାଜ୍ୟ ସଭା ସଦସ୍ୟ ସଞ୍ଜୟ ସିଂ ଏ ସମ୍ପର୍କରେ ଟୁଇଟ କରି ଜଣାଇଛନ୍ତି। ସେ ଏଥିରେ ଉଲ୍ଲେଖ କରିଛନ୍ତି ଯେ, ଭିସ୍ତାରା ୟୁକେ-୭୮୫ ବିମାନ ବୁଧବାର ସକାଳ ୭ଟାରେ ଦିଲ୍ଲୀରୁ ବାହାରି ଭୁବନେଶ୍ୱରରେ ପ୍ରାୟ ୯ଟାରେ ପହଞ୍ଚତ୍ଥିଲା। ଏଥିରେ ୧୫୭ଜଣ ଯାତ୍ରୀ ଥିଲେ। ତେବେ ବିମାନ ଅବତରଣ କରିବା ସମୟରେ ଯାତ୍ରୀମାନେ ଥରି ଉଠିଥିଲେ ଏବଂ ଏହା ଏକ ଦୁର୍ଘଟଣାକୁ ଏଡ଼ାଇ ଦେଇଛି। ଦୟାକରି ସମ୍ପୃକ୍ତ ପାଇଲଟଙ୍କ ଦ୍ୱାରା ଅନ୍ୟ କିଛି କାମ କରାନ୍ତୁ, ନଚେତ୍ କିଛି ବଡ଼ ଦୁର୍ଘଟଣା ବି ଘଟିପାରେ। ଏନେଇ ଭିସ୍ତାରା ସଂସ୍ଥା ଏବଂ ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ଏଥିପ୍ରତି ଧ୍ୟାନ ଦେବା ପାଇଁ ଟୁଇଟ୍ରେ ସଞ୍ଜୟ ଉଲ୍ଲେଖ କରିଛନ୍ତି। ସଞ୍ଜୟଙ୍କ ଟୁଇଟ୍ରେ ସିନ୍ଧିଆ ପ୍ରତିକ୍ରିୟା ରଖି କହିଛନ୍ତି, ଘଟଣାକୁ ଆମ ଦୃଷ୍ଟିକୁ ଆଣିଥିବାରୁ ଧନ୍ୟବାଦ। ଏହି ଘଟଣାର ଅନୁସନ୍ଧାନ କରାଯାଇ ଉପଯୁକ୍ତ ପଦକ୍ଷେପ ଗ୍ରହଣ କରିବୁ। ଅପରପକ୍ଷରେ ରାଜ୍ୟ ସଭା ସଦସ୍ୟ ସଞ୍ଜୟଙ୍କ ଏଭଳି ଟୁଇଟକୁ ଭୁବନେଶ୍ୱର ବିମାନବନ୍ଦର କର୍ତ୍ତୃପକ୍ଷ ଖଣ୍ଡନ କରିଛନ୍ତି। ଏ ନେଇ ବିମାନବନ୍ଦର ନିର୍ଦ୍ଦେଶକ ପ୍ରଭାତ ରଞ୍ଜନ ବେଉରିଆ କହିଛନ୍ତି, ଆମର ଏୟାର ଟ୍ରାଫିକ କଣ୍ଟ୍ରୋଲ(ଏଟିସି)ରେ ଏଭଳି କୌଣସି ରିପୋର୍ଟ ନାହିଁ। ସାଂସଦଙ୍କ ଅଭିଯୋଗ ଶୁଣିବା ପରେ ଆମେ ସଙ୍ଗେ ସଙ୍ଗେ ଏହାର ତଦନ୍ତ କରିଥିଲୁ। ବିମାନରେ ଯାହାବି କିଛି ଅସୁବିଧା ହେବ, ଏଟିସିକୁ ତୁରନ୍ତ ରିପୋର୍ଟ ଆସିବ। ତେଣୁ ଆମେ ଏଟିସି ସହ ଯୋଗାଯୋଗ କରିଥିଲୁ। ହେଲେ ପାଇଲଟଙ୍କ ପାଖରୁ ଏଭଳି କିଛି ଦୁର୍ଘଟଣାର କୌଣସି ରିପୋର୍ଟ ଏଟିସିକୁ ଆସି ନାହିଁ ବୋଲି ବେଉରିଆ କହିଛନ୍ତି।