ଓ୍ବାଶିଂଟନ,୨୮।୮: ଆମେରିକାରେ ଆସନ୍ତା ବର୍ଷ ହେବ ରାଷ୍ଟ୍ରପତି ନିର୍ବାଚନ। ଏଥିରେ ରିପବ୍ଲିକାନ ପାର୍ଟିର ପ୍ରାର୍ଥୀଭାବେ ଭାରତୀୟ ମୂଳ ବାସିନ୍ଦା ବିବେକ ରାମାସ୍ବାମୀ ନିଜର ମଜଭୁତ ଦାବିଦାର ଉପସ୍ଥାପନ କରୁଛନ୍ତି। ଆମେରିକାର ରାଷ୍ଟ୍ରପତି ନିର୍ବାଚନ ପାଇଁ ନାମାଙ୍କନ ପତ୍ରରେ ରାମାସ୍ବାମୀ ତାଙ୍କ ଭାଷଣ ପାଇଁ ଚର୍ଚ୍ଚାର ବିଷୟ ପାଲଟିଛନ୍ତି। ବର୍ତ୍ତମାନ ତାଙ୍କର ଶେଷ ବୟାନରେ ବିବେକ ରାମାସ୍ବାମୀ ସୂଚାଇ ଦେଇଛନ୍ତି ଯେ ଯଦି ସେ ୨୦୨୪ରେ ଆମେରିକାର ରାଷ୍ଟ୍ରପତି ଭାବରେ ନିର୍ବାଚିତ ହୁଅନ୍ତି, ତେବେ ସେ ଟେସଲା ମାଲିକ ଏଲୋନ ମସ୍କଙ୍କୁ ତାଙ୍କ ପ୍ରଶାସନରେ ପରାମର୍ଶଦାତା ହେବାକୁ ଚାହାଁନ୍ତି।
ଶୁକ୍ରବାର ଆୟୋବାର ଏକ ଟାଉନ ହଲରେ ବିବେକ ରାମାସ୍ବାମୀଙ୍କୁ ପଚରାଯାଇଥିଲା ଯେ ଯଦି ସେ ଆମେରିକାର ରାଷ୍ଟ୍ରପତି ହୁଅନ୍ତି ତେବେ ସେ ତାଙ୍କ ପରାମର୍ଶଦାତା ଭାବରେ କାହାକୁ ବାଛିବେ। ଏହା ଉପରେ ସେ ଏଲନ ମସ୍କର ନାମ ନେଇଥିଲେ। କେବଳ ଏତିକି ନୁହେଁ, ସେ ଟୁଇଟରରେ ବହୁ ପରିମାଣରେ କର୍ମଚାରୀଙ୍କୁ ଛଟେଇ କରିବାକୁ ନେଇ ମସ୍କଙ୍କୁ ପ୍ରଶଂସା କରିଥିଲେ। କୋଟିପତି ପ୍ରାର୍ଥୀ ରାମାସ୍ବାମୀ ଉତ୍ତର ଦେଇଛନ୍ତି ଯେ ସେ ଏମିତି ଲୋକଙ୍କୁ ଚାହୁଁଛନ୍ତି ଯେଉଁମାନେ ସରକାରଙ୍କ ଭିତରୁ ଆସି ନାହାଁନ୍ତି।
