ନୂଆଦିଲ୍ଲୀ, ୬ା୮ (ପି.ଟି.)-ଭାରତ ଓ ଚାଇନା ମଧ୍ୟରେ କୂଟନୈତିକ ଉତ୍ତେଜନା ଦେଖା ଦେଇଥିବାରୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଚାଇନିଜ ମୋବାଇଲ କମ୍ପାନୀ ଭିଭୋ ସହିତ ବର୍ଷକ ପାଇଁ ଆଇପିଏଲ୍ ଟାଇଟଲ ପାର୍ଟନରଶିପ୍କୁ ସସ୍ପେଣ୍ଡ କରିଛି। ଭିଭୋ ଚଳିତବର୍ଷ ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍) ସହ ସମ୍ପୃକ୍ତ ରହିବ ନାହିଁ ବୋଲି ବିସିସିଆଇ ଏକ ଧାଡ଼ିକିଆ ବିବୃତିରେ କହିଛି। ଅନ୍ୟପକ୍ଷରେ କମ୍ପାନୀ ତରଫରୁ କୁହାଯାଇଛି ବର୍ତ୍ତମାନ ପରିସ୍ଥିତିରେ ୨୦୨୦ ସିଜନ ଆଇପିଏଲ୍ ପାର୍ଟନରଶିପ୍କୁ ରୋକାଯାଇଛି। ଭିଭୋ ମୋବାଇଲ୍ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ ବର୍ଷ ପିଛା ହାରାହାରି ୪୪୦ କୋଟି ଟଙ୍କା ଏବଂ ମୋଟ ଉପରେ ୨୧୯୦କୋଟି ଟଙ୍କା ବିନିମୟରେ ୨୦୧୮ରୁ ୨୦୨୨ ପର୍ଯ୍ୟନ୍ତ ୫ବର୍ଷ ପାଇଁ ଆଇପିଏଲ୍ ଟାଇଟଲ ସ୍ପନସରଶିପ୍ ସ୍ବତ୍ୱାଧିକାର ହାସଲ କରିଥିଲା। ଦୁଇପକ୍ଷ ଏକ ଯୋଜନା କାର୍ଯ୍ୟକାରୀ କରିବା ଲାଗି ବିଚାର କରୁଛନ୍ତି। ତଦନୁସାରେ ୨୦୨୧ ଆରମ୍ଭରେ ଭିଭୋ ସଂଶୋଧିତ ସର୍ତ୍ତାବଳୀ ସହ ସାନି ୩ବର୍ଷିଆ ଚୁକ୍ତି କରିପାରେ। ହେଲେ ବିସିସିଆଇର ଜଣେ ଟପ୍ ଅଫିସିଆଲ ଭିନ୍ନ ମତପୋଷଣ କରିଥିଲେ। ସେ କହିଥିଲେ, ବର୍ତ୍ତମାନ ଦୁଇ ପଡୋଶୀ ମଧ୍ୟରେ କୂଟନୈତିକ ଉତ୍ତେଜନା ବିଷୟରେ ଆମେ ଆଲୋଚନା କରୁଛେ। ତେଣୁ ନଭେମ୍ବରରେ ଆଇପିଏଲ୍ ଶେଷ ହେଲେ ଏବଂ ୨୦୨୧ ଏପ୍ରିଲରେ ପରବର୍ତ୍ତୀ ଆଇପିଏଲ୍ ଆରମ୍ଭ ମଧ୍ୟରେ ସାନି ଚୁକ୍ତି ବିଷୟରେ ଆଲୋଚନା କରାଯାଇପାରେ। ଇଷ୍ଟର୍ନ ଲଦାଖରେ ଚାଇନିଜ୍ ଓ ଭାରତୀୟ ସେନାଙ୍କ ମଧ୍ୟରେ ସଂଘର୍ଷ ଘଟିବା ପରେ ଦେଶରେ ଚାଇନା ବିରୋଧୀ ମନୋଭାବ ଶୀର୍ଷରେ ପହଞ୍ଚତ୍ଥିଲା। ଏଥିରେ ଭାରତର ୨୦ଜଣ ଯବାନ ଶହୀଦ ହୋଇଥିବାବେଳେ ଚାଇନା କିନ୍ତୁ ଏହାର ମୃତାହତଙ୍କ ସଂଖ୍ୟା ପ୍ରକାଶ କରି ନାହିଁ। ପ୍ରକୃତ ନିୟନ୍ତ୍ରଣରେଖା ନିକଟରେ ପରିସ୍ଥିତି ସ୍ବାଭାବିକ ହୋଇ ନ ଥିବାରୁ ଭାରତରେ ବିଭିନ୍ନ ମହଲରୁ ଚାଇନିଜ୍ କମ୍ପାନୀ ଏବଂ ଏହାର ଉତ୍ପାଦକୁ ବର୍ଜନ କରିବା ଲାଗି ଆହ୍ବାନ ଦିଆଯାଇଛି। ବିସିସିଆଇ ବର୍ତ୍ତମାନ ଏହାର ସମ୍ବିଧାନ ଅନୁସାରେ ନୂଆ ଆଇପିଏଲ୍ ସ୍ପନସର ଲାଗି ଟେଣ୍ଡର କରିବ। କୋଭିଡ୍-୧୯ ଯୋଗୁ ଚଳିତବର୍ଷ ଏହି ବ୍ୟୟବହୁଳ ଟି୨୦ ଲିଗ୍ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ସେପ୍ଟେମ୍ବର ୧୯ରୁ ଆରମ୍ଭ ହେବା କାର୍ଯ୍ୟକ୍ରମ ରହିଛି। ସୂଚନାଯୋଗ୍ୟ, ଆଇପିଏଲ୍ ଗଭର୍ନିଂ କାଉନ୍ସିଲ ବୈଠକ ବସିଥିଲା। ଭିଭୋ ସମେତ ଅନ୍ୟ ସମସ୍ତ ପ୍ରାୟୋଜକଙ୍କ ସହିତ ଚୁକ୍ତି କାଏମ ରହିବ ବୋଲି ଏଥିରେ ସ୍ଥିର କରାଯାଇଥିଲା। କିନ୍ତୁ ଗଲଓ୍ବାନ ଉପତ୍ୟକାରେ ଉତ୍ତେଜନା ପରେ ବିସିସିଆଇ ଜୁନ୍ରେ ଘୋଷଣା କରିଥିଲା ଯେ, ଆଇପିଏଲ୍ ସହିତ ହୋଇଥିବା ସମସ୍ତ ଚୁକ୍ତିର ସମୀକ୍ଷା ହେବ। ପରେ ରବିବାର ବୈଠକରେ ବିସିସିଆଇ ଭିଭୋକୁ ରଖିବା ଲାଗି ନିଷ୍ପତ୍ତି ନେବାପରେ ସୋସିଆଲ ମିଡିଆରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ଉଭୟ ପକ୍ଷ ଆପୋସ ବୁଝାମଣା ଭିିତ୍ତିରେ ଅତିକମ୍ରେ ଏହି ସିଜନ ପାଇଁ ଅଲଗା ରହିବା ଲାଗି ସ୍ଥିର କରିଥିଲେ। ଅନ୍ୟପକ୍ଷରେ ଭିଭୋ ବାର୍ଷିକ ସ୍ପନସରଶିପ୍ର ଅଧା ୮ଟି ଫ୍ରାଞ୍ଚାଇଜକୁ ୨୭.୫ କୋଟି ଟଙ୍କା ଲେଖାଏ ବାଣ୍ଟି ଦିଆଯାଇଛି। ମାତ୍ର ନୋଟିସ ଜରିଆରେ ସ୍ବଳ୍ପ ସମୟ ମଧ୍ୟରେ ଏହି ଅର୍ଥ ଫେରାଇ ଆଣିବା ସହଜ ନୁହେଁ। ଭିଭୋର ପ୍ରସ୍ଥାନ ଯୋଗୁ ପ୍ରତ୍ୟେକ ଫ୍ରାଞ୍ଚାଇଜ୍ ପ୍ରାୟ ୧୫ କୋଟି ଟଙ୍କା ଲେଖାଏ ହରାଇ ପାରନ୍ତି। ଚଳିତ ବର୍ଷ ସମସ୍ତଙ୍କ ପାଇଁ ସମସ୍ୟା ରହିବ। ତଥାପି ଟୁର୍ନାମେଣ୍ଟ ହେବ ବୋଲି ବିସିସିଆଇ ଅଫିସିଆଲ ଜଣକ କହିଛନ୍ତି।