ମସ୍କୋ,୧୦ ।୧୦: ରୁଷିଆ-ୟୁକ୍ରେନ୍ ଯୁଦ୍ଧ ଏବେ ଏକ ଭୟଙ୍କର ପରିସ୍ଥିତିରେ ପହଞ୍ଚିଛି । ଏବେ ରୁଷିଆ ସେନା ଲାଗାତାର କ୍ଷତିର ସାମ୍ନା କରି ଚାଲିଛନ୍ତି । ଶନିବାର ରୁଷିଆ ଓ କ୍ରିମିଆକୁ ଯୋଡୁଥିବା ପୋଲ ଉପରେ ଥିବା ଏକ ଟ୍ରକରେ ରଖାଯାଇଥିବା ବିସ୍ଫୋରକରେ ନିଆଁ ଲାଗିଯିବାରୁ ଭୟଙ୍କର ବିସ୍ଫୋରଣ ହୋଇଥିଲା । ଫଳରେ ଏକ ସର୍ବ ବୃହତ୍ତ ପୋଲର ଅଧାଭାଗ ସମୁଦ୍ରରେ ମିଶି ଯାଇଥିଲା । ଏହି ବିସ୍ଫୋରଣ ପରେ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ କହିଛନ୍ତି, ଏହା ୟୁକ୍ରେନ ଗୁଇନ୍ଦା ସେବାର କାମ । ବିସ୍ଫୋରଣ ପାଇଁ ସେ ୟୁକ୍ରେନ ଗୁଇନ୍ଦା ସେବାକୁ ଦାୟୀ କରିବା ସହ ଏହାର ଘୋର ନିନ୍ଦା କରିଛନ୍ତି ।
କ୍ରେମଲିନ ଦ୍ୱାରା ରବିବାର ଜାରି କରାଯାଇଥିବା ଏକ ଭିଡିଓ ଅନୁଯାୟୀ, ଯାଞ୍ଚ ସମିତିର ମୁଖ୍ୟଙ୍କ ସହ ଏକ ବୈଠକ ସମୟରେ ପୁଟିନ କହିଛନ୍ତି ଏହି ବିସ୍ଫୋରଣର ପଟ୍ଟକଥା ଲେଖିବା ବ୍ୟକ୍ତି, ଅପରାଧୀ ଓ ପ୍ରାୟୋଜନ ୟୁକ୍ରେନର ଗୁପ୍ତ ସେବା । ଏଥିରେ କୌଣସି ସନ୍ଦେହ ନାହିଁ ଯେ ଏହା ଏକ ଆତଙ୍କବାଦୀ ଘଟଣା । ଏହାର ଉଦ୍ଦେଶ୍ୟ ଗୁରୁତ୍ୱପୂର୍ଣ୍ଣ ରୁଷିଆ ସେନାର ମୂଳ ଢାଞ୍ଚାକୁ ନଷ୍ଟ କରିବା । ହେଲେ ଏବେ ପର୍ଯ୍ୟନ୍ତ ୟୁକ୍ରେନ ଏହି ବିସ୍ଫୋରଣ ପାଇଁ ନିଜକୁ ଦ୍ରାୟୀ କରିନାହିଁ ।
ରୁଷିଆ ପାଇଁ ଏହି ପୋଲର ମହତ୍ୱ ଢେର ଅଧିକ । ଏହି ପୋଲ ହିଁ ରୁଷିଆ ସେନାଙ୍କ ଅସ୍ତ୍ରଶସ୍ତ୍ର ପରିବହନର ଏକ ମୁଖ୍ୟ ମାଧ୍ୟମ ଥିଲା । ତେଣୁ ଏବେ ଏହା ନଷ୍ଟ ହୋଇଯିବାରୁ ରୁଷିଆ ଚିନ୍ତାରେ ପଡିଯାଇଛି ।