ମସ୍କୋ,୧୯ ।୩: ରୁଷିଆ ରାଷ୍ଟ୍ରପତି ଭ୍ଲାଦିମର ପୁଟିନ ଅନ୍ତରାଷ୍ଟ୍ରୀୟ ଅପରାଧ ନ୍ୟାୟାଳୟ ପକ୍ଷରୁ ଗିରଫ ୱାରେଣ୍ଟ ଜାରି ହେବାର ଗୋଟିଏ ଦିନ ପରେ କ୍ରିମିଆ ଗସ୍ତ କରିଛନ୍ତି । ଏହା ତାଙ୍କର ଅଚାନକ ଗସ୍ତ ବୋଲି କୁହାଯାଉଛି । କ୍ରିମିଆ ଉପରେ ରୁଷିଆ କବଜା କରିବା ୯ ବର୍ଷ ପୂର୍ତ୍ତିରେ ପୁଟିନ ଏହି ଗସ୍ତ କରିଛନ୍ତି । ମିଡିଆ ରିପୋର୍ଟ ଅନୁଯାୟୀ, ରାଷ୍ଟ୍ରପତିଙ୍କ ପ୍ରବକ୍ତା ଦମିତ୍ରି ପେସ୍କୋବ କହିଛନ୍ତି ପ୍ରଥମେ ପୁଟିନ ସାଂସ୍କୃତିକ ଓ ଐତିହାସିକ କାର୍ଯ୍ୟକ୍ରମରେ ଭର୍ଚୁୟାଲି ସାମିଲ ହେବାର ଅନୁମାନ କରାଯାଉଥିଲା । ହେଲେ ସେ ନିଜେ ସେହି ସ୍ଥାନରେ ପହଞ୍ଚି ସମସ୍ତଙ୍କୁ ଆଶ୍ଚର୍ଯ୍ୟ ଚକିତ କରିଦେଇଥିଲେ ।
ରୁଷିଆ ସମାଚାର ଏଜେନ୍ସି ତାସ ଅନୁଯାୟୀ, ରାଷ୍ଟ୍ରପତି ପୁଟିନଙ୍କ ଶୁକ୍ରବାର କାର୍ଯ୍ୟକ୍ରମ ବି ଆଶିଂକ ଭାବେ କ୍ରିମିଆର ସ୍ଥିତି ପାଇଁ ସମର୍ପିତ ଥିଲା ଓ ପୁଟିନ କ୍ରିମିଆ ଓ ସୋୱସ୍ତପୋଲର ସାମାଜିକ ଓ ଆର୍ଥିକ ବିକାଶ ଉପରେ ଚର୍ଚ୍ଚା ପାଇଁ ବୈଠକ ବି କରିଥିଲେ । ସୂଚନାଯୋଗ୍ୟ, ପ୍ରତିବର୍ଷ ୧୮ ମାର୍ଚ୍ଚରେ କ୍ରିମିଆ ଉପରେ ରୁଷିଆର କବଜାକୁ ବର୍ଷପୂର୍ତ୍ତିରେ ହେଉଥିବା କାର୍ଯ୍ୟକ୍ରମରେ ପୁଟିନ ଭାଗ ନେଇଥାଆନ୍ତି । ସେ ଅନେକଥର ମସ୍କୋର ଲୁନିକ୍କି ଷ୍ଟାଡିୟମରେ ଏହି ଦିନ ପାଇଁ ସମର୍ପିତ ଗାଲା ସଙ୍ଗିତ କାର୍ଯ୍ୟକ୍ରମରେ ଭାଗ ନେଇଛନ୍ତି ।
