କଟକ, ୮ା୮(କାର୍ତ୍ତିକ ସାହୁ): ଜଣେ ଓଡ଼ିଆ ଗାୟିକାଙ୍କୁ ଯୌନ ଶୋଷଣ ଓ ନିର୍ଯାତନା ଦେବା ଅଭିଯୋଗ ମାମଲାରେ ବଲିଉଡ୍ର କଣ୍ଠଶିଳ୍ପୀ ସୌରୀନ ଭଟ୍ଟ ସୋମବାର କଟକ ମହିଳା ଥାନାରେ ହାଜର ହୋଇଥିଲେ। ତାଙ୍କ ବିରୋଧରେ ଥିବା ଅଭିଯୋଗ ଆଧାରରେ ପୋଲିସ ତାଙ୍କୁ ୨ ଘଣ୍ଟା ଜେରା କରିଛି। ଥାନାରେ ୧୬୧ ଧାରାରେ ସୌରୀନଙ୍କ ବୟାନ ରେକର୍ଡ କରାଯିବା ସହ ଏସ୍ସିବି ମେଡିକାଲରେ ତାଙ୍କର ଡାକ୍ତରୀ ମାଇନା ହୋଇଥିବା ଜଣାପଡ଼ିଛି।
ଏସିପି ଅମିତାଭ ମହାପାତ୍ର କହିଛନ୍ତି, ହାଇକୋର୍ଟ ସୌରୀନଙ୍କୁ ଅନ୍ତରୀଣ ଜାମିନ ଦେଇଛନ୍ତି। ହାଇକୋର୍ଟଙ୍କ ନିର୍ଦ୍ଦେଶ ମୁତାବକ ପୋଲିସକୁ ତଦନ୍ତରେ ସହଯୋଗ କରିବାକୁ ସେ ମହିଳା ଥାନାକୁ ଆସିଥିଲେ। ତାଙ୍କୁ ପଚରାଉଚରା କରାଯାଇଛି। ସୌରୀନଙ୍କ ବିରୋଧରେ ଆସିଥିବା ଅଭିଯୋଗକୁ ସେ ଖଣ୍ଡନ କରିଛନ୍ତି। ଅଭିଯୋଗ ଆଣିଥିବା ଯୁବତୀ କେବଳ ତାଙ୍କର ଘନିଷ୍ଠ ସାଙ୍ଗ ଥିଲେ ବୋଲି ସେ କହିଛନ୍ତି। ଯୁବତୀଙ୍କ ଠାରୁ ଟଙ୍କା ନେଇଥିବା ବିଷୟରେ ସେ କହିଲେ, ଉଭୟେ ଘନିଷ୍ଠ ବନ୍ଧୁ ଥିବାରୁ ପରସ୍ପରକୁ ଟଙ୍କା ଦିଆନିଆ କରିଥାନ୍ତି। ଯୁବତୀଙ୍କଠାରୁ ସୌରୀନ ଓ ସୌରୀନଙ୍କଠାରୁ ଯୁବତୀ ଟଙ୍କା ନେଇଥାନ୍ତି ବୋଲି ଜେରାରୁ ଜଣାପଡ଼ିଛି। ଆବଶ୍ୟକ ହେଲେ ସୌରୀନଙ୍କୁ ପୁଣି ଥରେ ଥାନାକୁ ଜେରା ପାଇଁ ଡକାଯିବ। ତା’ପରେ ତଦନ୍ତରେ ହୋଇଥିବା ଅଗ୍ରଗତି ନେଇ ହାଇକୋର୍ଟଙ୍କୁ ରିପୋର୍ଟ ଦିଆଯିବ ବୋଲି ଏସିପି କହିଛନ୍ତି।
ଥାନାରେ ହାଜର ହେବା ପୂର୍ବରୁ ସୌରୀନ ଗଣମାଧ୍ୟମ ଆଗରେ ତାଙ୍କ ବିରୋଧରେ ଥିବା ଅଭିଯୋଗକୁ ଖଣ୍ଡନ କରିବା ସହ ଅଭିଯୋଗକାରିଣୀଙ୍କୁ ଚିହ୍ନି ନ ଥିବା କହିଥିଲେ। ହେଲେ ମହିଳା ଥାନାରେ ଜେରା ପରେ ସୌରୀନଙ୍କ ଓକିଲ ପ୍ରଦୀପ ପଟ୍ଟନାୟକ ପୋଲିସ ଜେରା ବେଳେ ସୌରୀନ ସମ୍ପୃକ୍ତ ଅଭିଯୋଗକାରିଣୀଙ୍କୁ ଜାଣିଥିବା ଓ ସେମାନଙ୍କ ମଧ୍ୟରେ ବନ୍ଧୁତା କଥାକୁ ସ୍ବୀକାର କରିଛନ୍ତି ବୋଲି ସ୍ପଷ୍ଟ କରିଛନ୍ତି।
ସୂଚନାଯୋଗ୍ୟ, ସୌରୀନ ଜଣେ ଓଡ଼ିଆ ଗାୟିକାଙ୍କୁ ଯୌନ ଶୋଷଣ ଓ ନିର୍ଯାତନା ଦେଇଆସୁଥିବା ସମ୍ପର୍କରେ ସମ୍ପୃକ୍ତ ଗାୟିକା ମହିଳା ଥାନାରେ ଜୁନ ୧୨ରେ ଏତଲା ଦେଇଥିଲେ। ପ୍ରତିଷ୍ଠିତ ଗାୟିକା କରାଇଦେବାର ପ୍ରତିଶ୍ରୁତି ଦେଇ ସୌରୀନ ତାଙ୍କୁ ଠକିବା ସହ ମାନସିକ ଓ ଶାରୀରିକ ନିର୍ଯାତନା ଦେଇଥିବା ସେ ଅଭିଯୋଗ କରିଥିଲେ। ସୌରୀନ ଟଙ୍କା ନେଇ ଫେରାଉ ନ ଥିବା ମଧ୍ୟ ସେ ଅଭିଯୋଗ କରିଥିଲେ। ଏତଲାକୁ ଭିତ୍ତି କରି ମହିଳା ଥାନା ପୋଲିସ ସୌରୀନଙ୍କ ବିରୋଧରେ ଦଫା ୩୭୬, ୪୯୩, ୩୪୧, ୨୯୪, ୪୧୭, ୫୦୬ରେ ମାମଲା ରୁଜୁ କରିଥିଲା। ମାମଲାର ତଦନ୍ତ ପାଇଁ ଥାନାରେ ହାଜର ହେବାକୁ ସୌରୀନଙ୍କୁ ନୋଟିସ କରାଯାଇଥିଲେ ବି ସେ ଧରାଛୁଆଁ ଦେଇ ନ ଥିଲେ। ଗିରଫଦାରି ଏଡ଼ାଇବାକୁ ସୌରୀନ ଗତ ଜୁନ୍ ୨୬ରେ ଓଡ଼ିଶା ହାଇକୋର୍ଟରେ ଆଗୁଆ ଜାମିନ ଆବେଦନ କରିଥିଲେ। ହାଇକୋର୍ଟ ଗତ ୧ ତାରିଖରେ ଜାମିନ ଆବେଦନର ଶୁଣାଣି କରି ଅନ୍ତରୀଣ ସୁରକ୍ଷା ପ୍ରଦାନ କରିଛନ୍ତି। ମାମଲାର ପରବର୍ତ୍ତୀ ଶୁଣାଣି ପାଇଁ ଅଗଷ୍ଟ ୨୫ ତାରିଖକୁ ଧାର୍ଯ୍ୟ ହୋଇଛି।