ବ୍ରହ୍ମବରଦା,୧୭ା୯(ଯଯାତି କେଶରୀ ବେହେରା): ପେଶା ଶିକ୍ଷକତା ହେଲେ ନିଶା ପରିବେଶ ସୁରକ୍ଷା ସହିତ କବିତା ଓ ପୁସ୍ତକ ଲେଖା । ଦୀର୍ଘ ୨୩ ବର୍ଷ ହେଲା ଶିକ୍ଷାଦାନ କରିବା ସହିତ ସମାଜ ସେବାରେ ଜୀବନକୁ ଉର୍ତ୍ସଗୀକୃତ କରିଥିବା ଏପରି ଜଣେ ବ୍ୟକ୍ତି ହେଉଛନ୍ତି ଝାଲପଡା ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ପ୍ରଭାକର ସାହୁ (୫୧) ଶିକ୍ଷାଦାନ, କବିତା ଲିଖନ ସହିତ ଚାରା ରୋପଣ କରିବା ଓ ସେଗୁଡିର ସୁରକ୍ଷା ପାଇଁ ବ୍ୟବସ୍ଥା କରିବାରେ ଅନ୍ୟମାନଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି ସେ।
ଯାଜପୁର ବ୍ଲକ ଶ୍ୟାମଦାସପୁର ଗ୍ରାମର ସ୍ବର୍ଗତ ମହେନ୍ଦ୍ର ସାହୁ ଓ ଟିକିଲି ସାହୁଙ୍କ ପୁଅ ପ୍ରଭାକର। ଗାଁ ବିଦ୍ୟାଳୟରୁ ୧୯୯୦ରେ ମାଟ୍ରିକ ପାସ କରିବା ପରେ ଏନ.ସି. ମହାବିଦ୍ୟାଳୟରେ ବିଜ୍ଞାନ ଶ୍ରେଣୀରେ ଅଧ୍ୟୟନ କରିଥିଲେ। ତାଳଚେରଠାରେ ଆଇଟିଆଇ , ଯାଜପୁର ଡୋଲିପୁରଠାରେ ସିଟି ଟ୍ରେନିଂ ନେଇ ୨୦୦୧ରୁ ଶିକ୍ଷକତା ଜୀବନ ଆରମ୍ଭ କରିଥିଲେ। ଏବେ ସେ ଝାଲପଡା ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ଭାବେ କାମ କରୁଛନ୍ତି । ଶିକ୍ଷାଦାନ କ୍ଷେତ୍ରରେ ସାହୁଙ୍କ ସ୍ବତନ୍ତ୍ର ପରିଚୟ ଥିବାବେଳେ ସେ ଗ୍ରାମ ଏବଂ ଆଖପାଖ ଅଞ୍ଚଳରେ ବହୁ ପ୍ରଶଂସାର ପାତ୍ର ହୋଇପାରିଛନ୍ତି । ଖାଲି ସେତକ ନୁହେଁ ରବିବାର ଓ ଛୁଟିଦିନରେ ସମୟକୁ ଦୂରପଯୋଗ ନ କରି ଚାରା ରୋପଣ କରିବା ସହିତ କବିତା ଓ ବହି ଲେଖାରେ ସମୟ ଦେଇଥାନ୍ତି । ଆଜକୁ ୨୩ ବର୍ଷ ହେଲା ନିଜ ଖର୍ଚ୍ଚରେ ସେ ବିଭିନ୍ନ ଖାଲି ସ୍ଥାନରେ ଚାରା ରୋପଣ ସହିତ ବିଦ୍ୟାଳୟକୁ ଲାଗିଥିବା ରାସ୍ତା ପାର୍ଶ୍ୱରେ ଶତାଧିକ ଚାରା ରୋପଣ କରିଛନ୍ତି। ଖାଲି ସେତିକି ନୁହେଁ, ସେ ରୋପଣ କରିଥିବା ଚାରା ବଢିବା ଏବଂ ରୋଗ ପୋକଦାଉରୁ ରକ୍ଷା କରିବା ପାଇଁ ସାର, ଔଷଧ ବ୍ୟବହାର କରିବା, ବୃକ୍ଷଗୁଡିକର ସୁରକ୍ଷା ପାଇଁ ମଜଭୁତ ବାଡର ବ୍ୟବସ୍ଥା କରିବା ଭଳି କାର୍ଯ୍ୟ କରି ୨୦୧୬ରେ ଓଡ଼ିଶା ସରକାର ଜଙ୍ଗଲ ପରିବେଶ ବିଭାଗ ତରଫରୁ ପ୍ରକୃତି ବନ୍ଧୁ ପୁରସ୍କାର ପୁରସ୍କୃତ ହୋଇଥିଲେ।
ସେଦିନଠାରୁ ସେ ଆଉ ପଛକୁ ଫେରି ଚାହିଁ ନାହାନ୍ତି। ଚଳିତ ବର୍ଷ ମଧ୍ୟରେ ସେ ୫ଶହରୁ ଊର୍ଦ୍ଧ୍ୱ ଚାରା ରୋପଣ କରିଥିବା ସାହୁ ପ୍ରକାଶ କରିଛନ୍ତି । ୨୦୧୯ରେ ଅଖିଳ ଚକ୍ର ଓଡ଼ିଶା ଯାଜପୁର ତରଫରୁ ଶିକ୍ଷକ ଗୌରବ ସମ୍ମାନରେ ସମ୍ମାନିତ ହୋଇଥିଲେ, ରୋଟାରୀ କ୍ଲବ ତରଫରୁ ନେସନ ବିଲଡର ପୁରସ୍କାର, ଦିଲ୍ଲୀଠାରେ ବିଜ୍ଞାନର ପ୍ରଚାର ଓ ପ୍ରସାର ବିଭାଗରେ ପୁରସ୍କୃତ ହୋଇଥିଲାବେଳେ ଟିଏଲଏମ୍ ବ୍ଲକ ସୁରଭି ପ୍ରତିଯୋଗିତାରେ ଉତ୍ତମ ଶିକ୍ଷକ ଭାବେ ପୁରସ୍କୃତ ହୋଇଥିଲେ। ସାହୁ ଦେଶାମତ୍କ କବିତା, ଅଧ୍ୟାତ୍ମିକ କବିତା ଲେଖକ ଭାବେ ମଧ୍ୟ ନିଜ ପରିଚୟ ସୃଷ୍ଟି କରିଛନ୍ତି । ବିଦ୍ୟାଳୟରେ ପିଲାମାନଙ୍କ ମଧ୍ୟରେ ଆଧ୍ୟାତ୍ମିକ ମନୋଭାବ ବୃଦ୍ଧି କରିବା ପାଇଁ ଯୋଗ,ପ୍ରାଣାୟାମର ବ୍ୟବସ୍ଥା କରିଥାଆନ୍ତି। ଜାତୀୟ ପର୍ବକୁ ନିଜ ଖର୍ଚ୍ଚରେ ବହୁ ଆଡମ୍ବରରର ସହିତ ପାଳନ କରିବା ତାଙ୍କର ଏକ ଭିନ୍ନ ଗୁଣ। ସେ ନିଜ ଲେଖନୀ ମୁନରେ ପ୍ରକୃତି, ବୃକ୍ଷ, ଖାଦ୍ୟ ଓ ପରିବେଶ ଭଳି ବହୁ କବିତା ରଚନା କରିଛନ୍ତି । ଶେଷ ନିଃଶ୍ୱାସ ଯାଏ ସେ ସମାଜର ସେବା କରିବା ସହିତ ପ୍ରକୃତି ଓ ପରିବେଶର ସୁରକ୍ଷା ପାଇଁ କାର୍ଯ୍ୟ କରିବେ ବୋଲି ସାହୁ ପ୍ରକାଶ କରିଛନ୍ତି।