ନୂଆଦିଲ୍ଲୀ,୪।୯: ଋଣ ଚାପରେ ଫସି ରହିଥିବା ଟେଲିକମ୍ କମ୍ପାନୀ ଭୋଡାଫୋନ-ଆଇଡିଆକୁ ନୂଆ ଲାଇଫ୍ଲାଇନ ମିଳିପାରେ। ଏହି କମ୍ପାନୀରେ ପ୍ରାୟ ୨୯ ହଜାର କୋଟି ଟଙ୍କାର ପୁଞ୍ଜି ନିବେଶ ହେବାର ସମ୍ଭାବନା ରହିଛି। ଏହା ହେଲେ ଚାପରେ ରହିଥିବା କମ୍ପାନୀ କାରବାରକୁ ପୁଣି ଥରେ ସମ୍ଭାଳିବାରେ ସକ୍ଷମ ହେବ ବୋଲି କୁହାଯାଉଛି। ଆଡଜଷ୍ଟେଟେଡ ଗ୍ରସ୍ ରେଭେନ୍ୟୁ(ଏଜିଆର୍) ମାମଲାରେ ଟେଲିକମ କମ୍ପାନୀଗୁଡିକୁ ସୁପ୍ରିମକୋର୍ଟଙ୍କ ପକ୍ଷରୁ ୧୦ ବର୍ଷର ଆଶ୍ୱସ୍ତି ମିଳିଛି। ଏହି ମାମଲା ଭୋଡାଫୋନ ଆଇଡିଆ କମ୍ପାନୀର ଭବିଷ୍ୟତ ନିର୍ଦ୍ଧାରଣ କରିବ ବୋଲି କୁହାଯାଇଥିଲା। ମାମଲାରେ କମ୍ପାନୀକୁ ବଡ ଆଶ୍ୱସ୍ତି ମିଳିଥିବା ଜଣାପଡିଛି। ବକେୟା ଶୁଝିବା ଲାଗି କମ୍ପାନୀ ଏହାର ଅଂଶଧନ ବିକିବ ବୋଲି ଶୁଣାଯାଉଥିଲା। ଏହା ଉପରେ ସୁପ୍ରିମକୋର୍ଟ ରୋକ ମଧ୍ୟ ଲଗାଇଥିଲେ। ପ୍ରମୁଖ ଇ-କମର୍ସ କମ୍ପାନୀ ଆମାଜନ ଡଟ୍ ଇନ ଏବଂ ଭେରିଜନ କମ୍ୟୁନିକେଶନ ଭୋଡାଫୋନ-ଆଇଡିଆରେ ଅଂଶଧନ କିଣିପାରେ ବୋଲି ଚର୍ଚ୍ଚା ଜୋର ଧରିଛି। ଏ ନେଇ ଗଣମାଧ୍ୟମରେ ମଧ୍ୟ ରିପୋର୍ଟ ପ୍ରକାଶ ପାଇଛି। ୪ ସେପ୍ଟେମ୍ବରରେ ଏହି କମ୍ପାନୀର ବୋର୍ଡ ବୈଠକ ଅନୁଷ୍ଠିତ ହେବ। ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଏଠାରେ ଆଲୋଚନା ହୋଇପାରେ। ଅଂଶଧନ କ୍ରୟ ନେଇ ଆମାଜନ ଏବଂ ଭେରିଜନର ନାମ ସାମ୍ନାକୁ ଆସୁଛି। ଏହି ଦୁଇ କମ୍ପାନୀ ପୂର୍ବରୁ ଭାରତରେ ସେମାନଙ୍କ କାରବାର ସ୍ଥିତି ଜାହିର କରିଛନ୍ତି। ଆମାଜନ ଇ-କମର୍ସ ଏବଂ ଭେରିଜନ ପୂର୍ବରୁ ଏୟାରଟେଲ ସହ ଚୁକ୍ତିରେ ସାମିଲ ହୋଇସାରିଛି। ଚୂଡାନ୍ତ ନିଷ୍ପତ୍ତି କଣ ହେଉଛି ସେ ଉପରେ ବଜାରର ନଜର ରହିଛି।