ଦୁବାଇ, ୨୩।୧୦(ପି.ଟି.)-
କୋଭିଡ-୧୯ ମହାମାରୀ ପାଇଁ ଓ୍ବାଲର୍ଡ ଟେଷ୍ଟ ଚାମ୍ପିୟନଶିପ୍ ଅନ୍ତର୍ଗତ ଅନେକ ଦ୍ୱିପାକ୍ଷିକ ସିରିଜ ସ୍ଥଗିତ ରହିଛି। ମାତ୍ର ପୂର୍ବ କାର୍ଯ୍ୟସୂଚୀ ଅନୁସାରେ ଆସନ୍ତା ଜୁନ୍ରେ ଫାଇନାଲ ଆୟୋଜନ ପାଇଁ ଅନ୍ତର୍ଜାତୀୟ କ୍ରିକେଟ କାଉନ୍ସିଲ୍(ଆଇସିସି) ଲକ୍ଷ୍ୟ ରଖିଛି। ଏପରି ସ୍ଥିତିରେ ଯେଉଁ ସିରିଜଗୁଡ଼ିକ ହୋଇ ପାରି ନାହିଁ ସେଥିପାଇଁ ପଏଣ୍ଟ ଭାଗ କରିବାକୁ ଯୋଜନା କରୁଛି। ଏହି ପ୍ରସଙ୍ଗରେ ଆସନ୍ତା ମାସରେ କ୍ରିକେଟ କମିଟି ବୈଠକରେ ଆଲୋଚନା ହେବା ସମ୍ଭାବନା ରହିଛି। ଇଏସପିଏନ୍ କ୍ରିକ୍ଇନ୍ଫୋ ଓ୍ବେବସାଇଟ୍ ଅନୁସାରେ ଗୋଟିଏ ବିକଳ୍ପ ହେଉଛି ପଏଣ୍ଟ ଭାଗ ଏବଂ ଅନ୍ୟ ବିକଳ୍ପଟି କେବଳ ୨୦୨୧ ମାର୍ଚ୍ଚ ଶେଷସୁଦ୍ଧା ଖେଳାଯିବାକୁଥିବା ମ୍ୟାଚ ଗୁଡ଼ିକୁ ବିଚାରକୁ ନେଇ ପଏଣ୍ଟ କଥା ଚିନ୍ତା କରାଯାଇପାରେ। ନିୟମ ଅନୁସାରେ ପ୍ରତି ସିରିଜ ପାଇଁ ୧୨୦ ପଏଣ୍ଟ ଧାର୍ଯ୍ୟ କରାଯାଇଛି। ସିରିଜରେ ମ୍ୟାଚ ସଂଖ୍ୟା ଅନୁସାରେ ଏହି ପଏଣ୍ଟ ଭାଗ ହେଉଛି। ୨ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ପାଇଁ ବିଜୟୀ ଦଳ ୬୦ ପଏଣ୍ଟ ପାଇଛି ଏବଂ ଡ୍ର କ୍ଷେତ୍ରରେ ୩୦ ପଏଣ୍ଟ ଦିଆଯାଉଛି। ୩ ମ୍ୟାଚ ବିଶିଷ୍ଟ ସିରିଜ କ୍ଷେତ୍ରରେ ଏହା ୪୦ ଓ ୨୦ ପଏଣ୍ଟ ହେଉଛି। ସେହିପରି ୪ ମ୍ୟାଚ ସିରିଜ କ୍ଷେତ୍ରରେ ୩୦, ୧୫ ଏବଂ ସର୍ବାଧିକ ୫ ମ୍ୟାଚ ବିଶିଷ୍ଟ ସିରିଜରେ ୨୪ ଓ ୧୨ ପଏଣ୍ଟ ଦିଆ ଯାଉଛି। ମହାମାରୀ ପାଇଁ ଚଳିତ ବର୍ଷ ଅନେକ ଟେଷ୍ଟ ସ୍ଥଗିତ ରହିଛି। ଅନେକ କ୍ଷେତ୍ରରେ ଏହା କେବେ ଆରମ୍ଭ ହେବ ତାହା ସ୍ପଷ୍ଟ ନୁହେଁ। ୨୦୨୧ ମାର୍ଚ୍ଚ ଶେଷରେ ଓ୍ବାଲର୍ଡ ଟେଷ୍ଟ ଚାମ୍ପିୟନଶିପ୍ ଶେଷ ହେବାକୁ ଥିବାରୁ ଆଇସିସି ଏପରି ନିଷ୍ପତ୍ତି ନେବାକୁ ଯୋଜନା କରୁଛି।
