ନୂଆପଡ଼ା,୬ା୧(ମକାରୁ ବେମାଲ): ନୂଆପଡ଼ା ଜିଲା ଗସ୍ତରେ ଆସିଥିବା ଓଡିଶା ସରକାରଙ୍କ ବାଣିଜ୍ୟ, ପରିବହନ ମନ୍ତ୍ରୀ ବିଭୂତି ଭୂଷଣ ଜେନାଙ୍କୁ ଭାଜପା ରାଜ୍ୟ କାର୍ଯ୍ୟକାରିଣୀ ସଦସ୍ୟ ଯଦୁମଣି ପାଣିଗ୍ରାହୀ ସାକ୍ଷାତ କରି ଜିଲାର ବିଭିନ୍ନ ସମସ୍ୟା ଅବଗତ କରିଥିଲେ। ନୂଆପଡ଼ାରୁ ପ୍ରୟାଗରାଜକୁ କୌଣସି ବସ୍ କିମ୍ବା ଟ୍ରେନ୍ର ପ୍ରତ୍ୟକ୍ଷ ବ୍ୟବସ୍ଥା ନାହିଁ। ଲୋକେ ଟ୍ରେନ୍ ଟିକେଟ ନ ପାଇ ବାଧ୍ୟହୋଇ ଚାରିଚକିଆ ଯାନରେ ଯାଉଛନ୍ତି। ସେହିପରି ବ୍ୟବସାୟିକ, ଉଚ୍ଚତର ଚିକିତ୍ସା ପାଇଁ ଲୋକେ ଭାଇଜାଗ ଓ ନାଗପୁର ଯାଉଛନ୍ତି। ସେଥିରେ ମଧ୍ୟ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏହାକୁ ଦୃଷ୍ଟିରେ ରଖି ୭୫୦କି.ମି. ଦୂର ପ୍ରୟାଗରାଜ ସହ ନାଗପୁର ଓ ଭାଇଜାଗକୁ ଯିବା ପାଇଁ ୩ଟି ଭଲ୍ଭୋ ବସ୍ ମଞ୍ଜୁର କରିବାକୁ ଦାବି ହୋଇଛି। ଏହାଛଡା ନୂଆପଡ଼ା ଜିଲାକୁ ୬ଟି ବସ୍ ଗାଁ ଗାଡି ଯୋଜନାରେ ଦିଆଯାଇଥିଲା। ହେଲେ ୧୦ ବର୍ଷର ପୁରୁଣା ହୋଇସାରିଥିବାରୁ ଏହାକୁ ବଦଳାଇ ନୂଆ ବସ୍ ଦେବା ପାଇଁ ମନ୍ତ୍ରୀଙ୍କୁ ଦାବିପତ୍ର ଦିଆଯାଇଛି। ସେହିପରି ଫିଟ୍ନେସ ପାଇଁ ଲୋକେ ସିନାପାଲି, ବୋଡେନ, ଖଡ଼ିଆଳରୁ ଭାରିଯାନ ଧରି ଆର୍ଟିଓ ଆସି ବହୁତ ହଇରାଣ ହେଉଛନ୍ତି। ତେଣୁ ମାସ୍କୁ କିମ୍ବା ଦୁଇ ମାସରେ ଥରେ କ୍ୟାମ୍ପ କରି ଲୋକଙ୍କ ଅସୁବିଧାକୁ ଦୂର କରିବା ପାଇଁ ଅନୁରୋଧ କରାଯାଇଛି। ମନ୍ତ୍ରୀ ଜେନା ସମସ୍ତ ପ୍ରସ୍ତାବକୁ ଗୁରୁତର ସହିତ ବିଚାର କରି ମଞ୍ଜୁରୀ ପାଇଁ ପ୍ରୟାସ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି।
