ଅହମଦାବାଦ,୭।୧୧ : ଗୁଜରାଟରେ ବିଧାନସଭା ନିର୍ବାଚନ ପାଇଁ ତାରିଖ ଘୋଷଣା ହେବା ପରେ ଭାରତୀୟ ଜନତା ପାର୍ଟି, କଂଗ୍ରେସ ଏବଂ ଆମ ଆଦମୀ ପାର୍ଟିର ନେତାମାନେ ଜୋରଦାର ପ୍ରଚାର କରିବାରେ ବ୍ୟସ୍ତ ଅଛନ୍ତି। ସେମାନଙ୍କ ବିଜୟର ଦାବି ମଧ୍ୟରେ ସମସ୍ତ ନେତା ନିଜ ଦଳ ପାଇଁ ଭୋଟ ବୃଦ୍ଧି କରିବାକୁ କଠିନ ପରିଶ୍ରମ କରୁଛନ୍ତି।
ଏହି ସମୟରେ କଂଗ୍ରେସ ନେତା ଲଲିତ ଭାସୋୟାଙ୍କ ବିବୃତ୍ତି ଭାଇରାଲ ହେବାରେ ଲାଗିଛି। ସେ ବିଜେପିକୁ ଭୋଟ ଦେବାକୁ ପ୍ରଚାର ମଞ୍ଚରୁ ନିବେଦନ କରିଛନ୍ତି। ଏଏପି ନ ଦେବାକୁ ସେ ପରାମର୍ଶ ଦେଇଛନ୍ତି। ସେ କହିଛନ୍ତି ଯେ ଯଦି ଆପଣ ଚାହାଁନ୍ତି ତେବେ କେବଳ ଭାଜପାକୁ ଭୋଟ ଦିଅନ୍ତୁ। ବର୍ତ୍ତମାନ ଏହାକୁ ନେଇ ତାଙ୍କୁ ସମାଲୋଚନା କରାଯିବା ପରେ ସେ ସ୍ପଷ୍ଟ କରିଛନ୍ତି ଯେ ଥଟ୍ଟାରେ ଏହା କହିଛନ୍ତି।
କଂଗ୍ରେସର ବରିଷ୍ଠ ନେତା ତଥା ଧୋରଜୀ ଲଲିତ ଭାସୋୟା ବିଧାୟକ ଏକ ସାଧାରଣ ସଭାରେ ମଞ୍ଚରୁ କଂଗ୍ରେସ ପାଇଁ ପ୍ରଚାର କରୁଥିଲେ। ଏହି ସମୟରେ ସେ କହିଥିଲେ ଯେ ଆମ ଆଦମୀ ପାର୍ଟି କଂଗ୍ରେସ ଭୋଟ ବିଭାଜନ କରିବାକୁ ଆସିଛି। ଯଦି କେହି ଆମ ଆଦମୀ ପାର୍ଟି ବିଷୟରେ କଥାବାର୍ତ୍ତା କରନ୍ତି, ମୁଁ ଆପଣଙ୍କୁ ମଞ୍ଚରୁ କହୁଛି, ଭାଜପାକୁ ଭୋଟ ଦିଅନ୍ତୁ ପଛେ କିନ୍ତୁ ଆମ ଆଦମୀ ପାର୍ଟିକୁ ନୁହେଁ।
ଆମ ଆଦମୀ ପାର୍ଟିର ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ମଧ୍ୟ ଏହି ଭିଡିଓକୁ ଟୱିଟ କରି ଭାଜପା-କଂଗ୍ରେସ ମିଳନର ଅଭିଯୋଗକୁ ଦୋହରାଇଛନ୍ତି। କେଜ୍ରିୱାଲ ଲେଖିଛନ୍ତି, ଏହାକୁ ଦେଖ। କଂଗ୍ରେସର ବରିଷ୍ଠ ନେତା ମଞ୍ଚରୁ ଖୋଲାଖୋଲି ଭାବେ କହିଛନ୍ତି ଯେ ଆମ ଆଦମୀ ପାର୍ଟିକୁ ଭୋଟ ଦିଅନ୍ତୁ ନାହିଁ, ଭାଜପାକୁ ଭୋଟ ଦିଅନ୍ତୁ। ତଥାପି କୌଣସି ସନ୍ଦେହ ଅଛି କି ଏହି ଦୁଇ ଦଳ ଏକାଠି ନିର୍ବାଚନ ଲଢୂଛନ୍ତି? ଉଭୟ କେବଳ ଏଏପି ବିପକ୍ଷରେ ଅଛନ୍ତି।