ଖୋର୍ଦ୍ଧା ଅଫିସ,୩୧ା୧: ମତଦାନ ହେଉଛି ନାଗରିକଙ୍କ ସାମ୍ବିଧାନିକ ଅଧିକାର। କୌଣସି ମତଦାତା ଯେପରି ମତଦାନରୁ ବଞ୍ଚିତ ନ ହେବେ ସେଥିଲାଗି ନିର୍ବାଚନ ଆୟୋଗଙ୍କ ପକ୍ଷରୁ ଗୁରୁତ୍ୱ ଦିଆଯାଇଥାଏ। ନିର୍ବାଚନ ପୂର୍ବରୁ ଭୋଟର ସଂଶୋଧନ, ନୂତନ ଭୋଟରଙ୍କ ନାମ ପଞ୍ଜୀକରଣ କାର୍ଯ୍ୟକୁ ତ୍ୱରାନ୍ବିତ କରାଯାଇଥାଏ। ତେବେ ଖୋର୍ଦ୍ଧା ଜିଲା ବୋଲଗଡ଼ ବ୍ଲକ ବଡକୁମ୍ଭାର ପଞ୍ଚାୟତ ଶ୍ରୀଚନ୍ଦନପୁର ଗ୍ରାମ ୱାର୍ଡ ନମ୍ବର ୨୨ର ଏକାଧିକ ଭୋଟରଙ୍କ ନାଁ ଭୋଟର ତାଲିକାରେ ନାହିଁ। ୧୧୭ଜଣଙ୍କ ନାମ ଭୋଟର ତାଲିକାରେ ନ ଥିବା ଜଣାପଡିଛି। ଏହାକୁ ନେଇ ଅସନ୍ତୋଷ ପ୍ରକାଶ ପାଇଛି। ଭୋଟର ତାଲିକା ସଂଶୋଧନରେ ଚଞ୍ଚକତା କରାଯାଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ରାଜନୈତିକ ଅଭିସନ୍ଧି ରଖି ଏଭଳି କରାଯାଇଥିବା ଗ୍ରାମବାସୀ ଗଣମାଧ୍ୟମ ଆଗରେ କହିଛନ୍ତି। ୱାର୍ଡ ନମ୍ବର ୨୨ରୁ ଏକାଧିକ ଭୋଟରଙ୍କ ନାଁ କଟିଥିବାବେଳେ ୨୧ନମ୍ବର ୱାର୍ଡର ପ୍ରାୟ ୯୦ ଜଣ ଭୋଟରଙ୍କ ନାମ ୨୨ ନମ୍ବର ୱାର୍ଡରେ ଚଢାଯାଇଛି। ଏହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଶ୍ରୀଚନ୍ଦନପୁର ଗ୍ରାମର ବଂଶୀଧର ସାହୁ କହିଛନ୍ତି, ଏହି ୨୨ନଂ ୱାର୍ଡରେ ୩୧୭ଜଣ ଭୋଟର ରହିଛନ୍ତି। ୨୦୧୭ ପଞ୍ଚାୟତ ନିର୍ବାଚନ ଏବଂ ୨୦୧୯ ସାଧାରଣ ନିର୍ବାଚନରେ ମତଦାନ ଦେଇଥିବା ଭୋଟର ଚଳିତ ବର୍ଷ ପଞ୍ଚାୟତ ନିର୍ବାଚନରେ ମତଦାନରୁ ବଞ୍ଚିତ ହେବେ। ଚଞ୍ଚକତା ପୂର୍ବକ ଭୋଟରଙ୍କ ନାଁ କଟାଯାଇଥିବା ବେଳେ ୨୧ ନଂମ୍ବର ୱାର୍ଡର ୯୦ଜଣ ଭୋଟରଙ୍କ ନାଁ ଏହି ୱାର୍ଡରେ ପୁନଃ ଯୋଡ଼ାଯାଇଛି। ଏହି ୱାର୍ଡରୁ ପ୍ରକୃତ ଭୋଟରଙ୍କୁ ବାଦ ଦିଆଯାଇଛି ବୋଲି ଗ୍ରାମର ଜଗନ୍ନାଥ ଚମ୍ପତି, ପ୍ରକାଶ ଚମ୍ପତି, ପ୍ରାଣକୃଷ୍ଣ ଚମ୍ପତି, ଚକ୍ରଧର ରାଉତ, ବୈକୁଣ୍ଠ ଚମ୍ପତି, ସନାତନ ବେହେରା ପ୍ରମୁଖ ଅଭିଯୋଗ ଆଣି ତଦନ୍ତ ସହ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ଏ ନେଇ ରାଜ୍ୟ ନିର୍ବାଚନ ଆୟୋଗ ଏବଂ ଜିଲା ପ୍ରଶାସନ ନିକଟରେ ମଧ୍ୟ ଅଭିଯୋଗ କରାଯାଇଛି ବୋଲି ସେମାନେ ପ୍ରକାଶ କରିଛନ୍ତି।