ବଇଣ୍ଡା/ ଖମାର,୨୦।୨(ଡି.ଏନ.ଏ.) ତ୍ରିସ୍ତରୀୟ ପଞ୍ଚାୟତ ନିର୍ବାଚନର ତୃତୀୟ ପର୍ଯ୍ୟାୟ ଭୋଟଗ୍ରହଣ ୨୦ ତାରିଖ ରବିବାର ଅନୁଗୋଳ ଜିଲାର ଆଠମଲ୍ଲିକ ଓ ପାଲଲହଡ଼ା ବ୍ଲକରେ ଅନୁଷ୍ଠିତ ହେବ। ଆଠମଲ୍ଲିକ ବ୍ଲକର ୨୪ ପଞ୍ଚାୟତ ଓ ୩ ଜିଲା ପରିଷଦ ଜୋନ୍ ଏବଂ ପାଲଲହଡ଼ା ବ୍ଲକର ୨୭ ପଞ୍ଚାୟତ ସହ ୩ ଜିଲା ପରିଷଦ ଜୋନ୍ରେ ମତଦାନ କରାଯିବ। ଏଥିପାଇଁ ଉଭୟ ବ୍ଲକରେ ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ଶେଷ ହୋଇଥିବା ବେଳେ ମତଦାନ ପାଇଁ ମତଦାତାମାନେ ଅତ୍ୟନ୍ତ ଉତ୍ସାହୀ ଥିବା ଜଣାପଡ଼ିଛି।
ଆଠମଲ୍ଲିକ ବ୍ଲକର ୨୪ ପଞ୍ଚାୟତରେ ମୋଟ୍ ୮୩ ହଜାର ୫୧୫ ଭୋଟର ଥିବା ବେଳେ ୩୧୯ ବୁଥ୍ କରାଯାଇଛି। ସେଥିରୁ ୫୪ ବୁଥ୍ ସମ୍ବେଦନଶୀଳ ଚିହ୍ନଟ ହୋଇଛି। ବୁଥ୍ଗୁଡ଼ିକରେ ୩୭୦ ଜଣ ପ୍ରିଜାଇଡିଂ ଅଫିସରଙ୍କୁ ନିଯୁକ୍ତ କରାଯାଇଛି। ଆଉ ୫୧ ଜଣଙ୍କୁ ରିଜର୍ଭରେ ରଖାଯାଇଛି। ଶନିବାର ସମସ୍ତ ପ୍ରିଜାଇଡିଂ ଅଫିସର ଆଠମଲ୍ଲିକ ନିର୍ବାଚନ ଅଧିକାରୀଙ୍କ ନିକଟରେ ପହଞ୍ଚିବା ପରେ ସେମାନଙ୍କୁ ନିର୍ବାଚନ ସାମଗ୍ରୀ ସହ ନିଜ ନିଜ ବୁଥ୍କୁ ପଠାଇ ଦିଆଯାଇଛି। ଆଠମଲ୍ଲିକ ବ୍ଲକର ୩ଟି ଜିଲା ପରିଷଦ ଜୋନ୍ରେ ୯ ପ୍ରାର୍ଥୀ ରହିଛନ୍ତି। ସେହିପରି ୨୪ ପଞ୍ଚାୟତରେ ୮୧ ସରପଞ୍ଚ ପ୍ରାର୍ଥୀ, ୬୬ ସମିତିସଭ୍ୟ ପ୍ରାର୍ଥୀ, ୫୨୮ ୱାର୍ଡମେମ୍ବର ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି। ଶୁକ୍ରବାର ପ୍ରଚାର କାର୍ଯ୍ୟ ଶେଷ ହୋଇଥିବା ବେଳେ ରବିବାର ସକାଳ ୭ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ଭୋଟଗ୍ରହଣ ହେବ। ବୁଥ୍ଗୁଡିକରେ ଶାନ୍ତି ଶୃଙ୍ଖଳାର ସହ ଭୋଟ ପାଇଁ ଉପଖଣ୍ଡ ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ୧୩ଟି ମୋବାଇଲ ପାର୍ଟି ନିୟୋଜିତ କରାଯାଇଛି। ସୁପରଭାଇଜ ପାଇଁ ୫ ମୋବାଇଲ ପାର୍ଟି ଗଠନ ହୋଇଛି। ୬ ଜଣ ଅଫିସର, ୧୪୫ କନଷ୍ଟେବଳ, ୧୫୦ ହୋମଗାର୍ଡ, ୮୯ ଗ୍ରାମରକ୍ଷୀ ନିଯୁକ୍ତ କରାଯାଇଛି। ନିର୍ବାଚନ ପରିଚାଳନା ନିମନ୍ତେ ଉପଖଣ୍ଡ ପ୍ରଶାସନ ପକ୍ଷରୁ ସ୍ବତନ୍ତ୍ର କମିଟି ସହ ୬ ଜଣଙ୍କୁ ମାଜିଷ୍ଟ୍ରେଟ ଭାବେ ନିଯୋଜିତ କରାଯାଇଛି। ଆଠମଲ୍ଲିକ ଉପଜିଲାପାଳ ତଥା ନିର୍ବାଚନ ଅଧିକାରୀ ଲଲିତ ମୋହନ ବେହେରା କହିଛନ୍ତି, ପ୍ରଶାସନ ପକ୍ଷରୁ ପ୍ରସ୍ତୁତି ଶେଷ କରାଯାଇଛି। ସମସ୍ତ ବୁଥ୍ରେ ପ୍ରିଜାଇଡିଂ ଅଫିସର ନିୟୋଜିତ ଅଛନ୍ତି। ଆଠମଲ୍ଲିକ ଏସ୍ଡିପିଓ ଚିନ୍ତାମଣି ପ୍ରଧାନ କହିଛନ୍ତି, ସମ୍ବେଦନଶୀଳ ବୁଥ୍ଗୁଡ଼ିକରେ ସୁରକ୍ଷା ବ୍ୟବସ୍ଥା କଡାକଡ଼ି କରାଯାଇଛି। ଶାନ୍ତି ଶୃଙ୍ଖଳାର ସହ ଭୋଟ ପାଇଁ ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ସେହିପରି ପାଲଲହଡ଼ା ବ୍ଲକର ୨୭ ପଞ୍ଚାୟତ ଓ ୩ ଜିଲା ପରିଷଦ ଜୋନ୍ରେ ଭୋଟ ନିଆଯିବାକୁ ପ୍ରସ୍ତୁତି ଶେଷ ହୋଇଛି। ମୋଟ୍ ୩୭୦ଟି ବୁଥ୍ କରାଯାଇଥିବା ବେଳେ ୯୫ ହଜାର ୩୧୪ ଜଣ ଭୋଟର ସେମାନଙ୍କ ନେତା ନିର୍ବାଚନ କରିବେ। ୨୭ଟି ପଞ୍ଚାୟତର ସରପଞ୍ଚ ପଦବୀ ପାଇଁ ୧୧୮ ପ୍ରାର୍ଥୀ ଥିବାବେଳେ ସମିତି ସଭ୍ୟ ପାଇଁ ୯୪ ଓ ଜିଲା ପରିଷଦ ସଦସ୍ୟ ନିମନ୍ତେ ୧୪ ଜଣ ପ୍ରତିଦ୍ୱନ୍ଦ୍ୱିତା କରୁଛନ୍ତି ବୋଲି ନିର୍ବାଚନ ଅଧିକାରୀ ତଥା ଗୋଷ୍ଠୀ ଉନ୍ନୟନ ଅଧିକାରୀ ଦିଲୀପ କୁମାର ବର ସୂଚନା ଦେଇଛନ୍ତି। ବିଭିନ୍ନ ବୁଥ୍ରେ ପୋଲିଂ କର୍ମଚାରୀ ପହଞ୍ଚି ସାରିଥିବା ବେଳେ ସୁରକ୍ଷା ପାଇଁ ପୋଲିସ ବ୍ୟବସ୍ଥା କରାଯାଇଛି।