ପଟ୍ଟାଙ୍ଗୀ,୧୯ା୨(ଡି.ଏନ.ଏ.): ଦ୍ୱିତୀୟ ପର୍ଯ୍ୟାୟ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଶୁକ୍ରବାର କୋରାପୁଟ ଜିଲା ଜଲା ପଟ୍ଟାଙ୍ଗୀ ବ୍ଲକରେ ଶାନ୍ତି ଶୃଙ୍ଖଳାର ସହ ଶେଷ ହୋଇଛି। ଏହି ନିର୍ବାଚନରେ କୋଟିଆ ପଞ୍ଚାୟତ ଉପରେ ସମସ୍ତଙ୍କ ନଜର ରହିଥିଲା। ବ୍ଲକ ଅଧୀନରେ ୨ଟି ଜିଲା ପରିଷଦ ଜୋନ ମଧ୍ୟରୁ ୧ନମ୍ବର ଜିଲା ପରିଷଦ ଜୋନର କୋଟିଆ ପଞ୍ଚାୟତ ଚର୍ଚ୍ଚାରେ ରହିଥିଲା। ଉକ୍ତ ପଞ୍ଚାୟତ ଅଧୀନରେ ଥିବା ୧୩ଟି ୱାର୍ଡର ୫୧୯୭ ଭୋଟରଙ୍କ ମଧ୍ୟରୁ ୩୯୬୬ ଭୋଟର ନିଜ ମତଦାନ ସାବ୍ୟସ୍ତ କରିଥିଲେ। ଏମାନଙ୍କ ମଧ୍ୟରେ ୨୦୧୦ ମହିଳା ମତଦାତା ଓ ୧୯୫୬ ପୁରୁଷ ମତଦାତା ରହିଥିବା ଜଣାପଡିଛି। କୋଟିଆରେ ମତଦାନ ହାର ୭୬.୦୩ ପ୍ରତିଶତ ରହିଥିବା ବେଳେ ବ୍ଲକରେ ମୋଟ ମତଦାନ ହାର ୭୯.୮୫ ପ୍ରତିଶତ ରହିଛି। ଏମାନଙ୍କ ମଧ୍ୟରେ ମହିଳା ମତଦାତା ୨୮ହଜାର ୯୨୪ ଓ ପୁରୁଷ ମତଦାତା ୧୮୨୦୬ ରହିଛନ୍ତି।
କୋଟିଆ ପଞ୍ଚାୟତ ଆନ୍ଧ୍ର ସୀମାନ୍ତରେ ଥିବାରୁ ପୋଲିସ ପ୍ରଶାସନ ପକ୍ଷରୁ ୧୩ ପ୍ଲାଟୁନ ଫୋର୍ସ ନିୟୋଜିତ ହୋଇଥିଲେ। ୭ଜଣଙ୍କୁ ମାଜିଷ୍ଟ୍ରେଟ ଦାୟିତ୍ୱରେ ନିୟୋଜିତ କରାଯାଇଥିଲା। ଉପଜିଲାପାଳ ଲଳିତ କଅଁର, ଏଡିଏମ୍ ରାମେଶ୍ୱର ପ୍ରଧାନ, ଜିଲା ପୋଲିସର ଅତିରିକ୍ତ ଆରକ୍ଷୀ ଅଧୀକ୍ଷକ ଉତ୍କଳ କେଶରୀ ଦାଶ, ସୁନାବେଡା ଏସ୍ଡିପିଓ ମନୋଜ ବେହେରା ପ୍ରମୁଖ ସୁରକ୍ଷା ବ୍ୟବସ୍ଥାରେ ଥିଲେ। ସେହିପରି ବ୍ଲକର ଅନ୍ୟତମ ପଞ୍ଚାୟତ ପୁକାଲି ପଞ୍ଚାୟତର ୧୦ନଂ.ବୁଥ୍ରେ କେତେକ ରାଜନୈତିକ ଦଳର କର୍ମୀ ପହଞ୍ଚତ୍ ଭୋଟରଙ୍କୁ ଏକ ନିର୍ଦ୍ଦିଷ୍ଟ ଦଳର ପ୍ରାର୍ଥୀଙ୍କୁ ଭୋଟ ଦେବାକୁ ଚାପ ପକାଇବାରୁ ସେଠାରେ ଏହାକୁ ନେଇ ଗଣ୍ଡଗୋଳ ହୋଇଥିଲା। ଖବର ପାଇ ପୋଲିସ ପହଞ୍ଚତ୍ ସେମାନଙ୍କୁ ବୁଝାଶୁଝା କରିଥିଲା। ସ୍ଥିତି ନ ସୁଧୁରିବାରୁ ପୋଲିସକୁ ଲାଠି ଚାଳନା କରିବାକୁ ପଡିଥିଲା। ବ୍ଲକର ପେଟୁରୁ ପଞ୍ଚାୟତର ୬ ନମ୍ବର ବୁଥ୍ରେ ଭୋଟରମାନେ ଭୋଟ ଦେବାରେ ବିଳମ୍ବ ହୋଇଥିବାରୁ ସେଠାରୁ ପୋଲିଂ ପାର୍ଟି ଖବର ଲେଖା ହେବାଯାଏ ବ୍ଲକ କାର୍ଯ୍ୟାଳୟରେ ପହଞ୍ଚତ୍ପାରିନାହାନ୍ତି। ଫଳରେ ସେଠାକାର ସ୍ପଷ୍ଟଚିତ୍ର ହସ୍ତଗତ ହୋଇପାରିନାହିଁ। ଅନ୍ୟପକ୍ଷରେ ବ୍ଲକର ମାଳିପୁଟ ପଞ୍ଚାୟତର ୬ନଂ ବୁଥ୍ ବଡାବାଲସା ଗ୍ରାମରେ ୧୦୦ ପ୍ରତିଶତ ଭୋଟର ସେମାନଙ୍କ ମତଦାନ କରିଛନ୍ତି। ସେହିପରି ୮ନଂ. ବୁଥ୍ ଚମ୍ପାଖେନ୍ଦାରେ ମତଦାନ ହାର ୯୩% ହୋଇଛି।
