ପୁରୀ ଅଫିସ୍,୧୬।୨: ତ୍ରିସ୍ତରୀୟ ପଞ୍ଚାୟତ ନିର୍ବାଚନର ମତଦାନ ପାଇଁ ସଜବାଜ ସରିଲାଣି। ପୋଲିଂ ପାର୍ଟି ବୁଥ୍ରେ ପହଞ୍ଚି ମତଦାନ କେନ୍ଦ୍ରରେ ପ୍ରାକ୍ ପ୍ରସ୍ତୁତି ଶେଷ କରିଛନ୍ତି। ବୁଧବାର ସକାଳୁ ଭୋଟ ଗ୍ରହଣ ଆରମ୍ଭ ହେବ। ସକାଳ ୭ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ମତଦାତାମାନେ ନିଜ ମତଦାନ କେନ୍ଦ୍ରରେ ପହଞ୍ଚତ୍ ଭୋଟ ଦେବେ। ମତଦାତା ଯେକୌଣସି ପରିଚୟ ପତ୍ର ନେଇ ମତ ସାବ୍ୟସ୍ତ କରିପାରିବେ। କୃଷ୍ଣପ୍ରସାଦ, ବ୍ରହ୍ମଗିରି ଓ କଣାସ ଭଳି ତିନୋଟି ବ୍ଲକ୍ର ୯୭୩ଟି ବୁଥରେ ବୁଧବାର ଭୋଟଗ୍ରହଣ ହେବ। ଏହା ମଧ୍ୟରେ ୭୪ଟି ପଞ୍ଚାୟତ ଓ ୮ଟି ଜିଲା ପରିଷଦ ଆସନ ସାମିଲ ରହିଛି। ୩ ଲକ୍ଷ ୮ ହଜାର ୨୪୧ ଜଣ ମତଦାତା ମତ ସାବ୍ୟସ୍ତ କରିବେ।
କୃଷ୍ଣପ୍ରସାଦର ଚିଲିକା ମଧ୍ୟରେ ଥିବା ୧୪ ପଞ୍ଚାୟତ ପାଇଁ ପୋଲିଂ ପାର୍ଟିମାନଙ୍କ ଲାଗି ଭେସେଲ ଓ ଯନ୍ତ୍ରଚାଳିତ ଡଙ୍ଗାର ବ୍ୟବସ୍ଥା ହୋଇଛି। କୃଷ୍ଣପ୍ରସାଦରେ ୧୬ ସେକ୍ଟର, ବ୍ରହ୍ମଗିରିରେ ୨୫ ଓ କଣାସରେ ୨୮ଜଣ ସେକ୍ଟର ଅଫିସର ନିଯୁକ୍ତ ଅଛନ୍ତି। ଉକ୍ତ ୩ଟି ବ୍ଲକ୍ରେ ୩୨୪ଟି ସମ୍ବେଦନଶୀଳ ବୁଥ୍ ରହିଛି। ବିଗତ ଦିନର ରେକର୍ଡକୁ ଦେଖି ଏହାକୁ ସମ୍ବେଦନଶୀଳ ତାଲିକାଭୁକ୍ତ କରାଯାଇଛି। ସେହିଭଳି ୨୮୫ଟି ସିଙ୍ଗିଲ୍ ବୁଥ୍, ୧୭୩ଟି ଡବଲ୍ ବୁଥ୍, ୫୯ଟି ଟ୍ରିପଲ୍ ବୁଥ୍ ମଧ୍ୟ ମତଦାନ କେନ୍ଦ୍ରରେ ସାମିଲ ରହିଛି। ତେବେ ପଞ୍ଚାୟତ ନିର୍ବାଚନ ମତଦାନ ବାଲଟ୍ରେ ଗ୍ରହଣ ହେବ। ମତଦାନ କେନ୍ଦ୍ରରେ କଡ଼ା ସୁରକ୍ଷା ବ୍ୟବସ୍ଥା ସତ୍ତ୍ବେ ମଧ୍ୟ ଅନେକ ବୁଥ୍ରେ ଭୋଟ ବାକ୍ସ ଅକ୍ତିଆର ହୋଇଯିବାର ଆଶଙ୍କା ରହୁଛି। ଏହାକୁ ଦୃଷ୍ଟିରେ ରଖି ଜିଲା ପ୍ରଶାସନ ବ୍ୟାପକ ସୁରକ୍ଷା ଉପରେ ଧ୍ୟାନ ଦେଉଛି। ତିନି ବ୍ଲକ୍ର ସମସ୍ତ ୯୭୩ଟି ବୁଥରେ ଜଣେ ଲେଖାଏ ପୋଲିସ କର୍ମଚାରୀ ମୁତୟନ ହେବେ। ୫୭ଟି ସ୍ଥାନରେ ଅଧିକାଂଶ ପୋଲିସ କର୍ମଚାରୀ ମୁତୟନ ହେବେ। ୩୭ଟି ମୋବାଇଲ ପାର୍ଟିରେ ଜଣେ ଅଧିକାରୀ, ୫ଜଣ ଡିଏସ୍ପି, ୩ଜଣ ଅତିରିକ୍ତ ଏସ୍ପି ଓ ବିଭିନ୍ନ କ୍ଲଷ୍ଟରରେ ଅତିରିକ୍ତ ଫୋର୍ସ ମୁତୟନ ହେବେ। ଅତି ସମ୍ବେଦନଶୀଳ ବୁଥ୍ ଉପରେ ସ୍ବତନ୍ତ୍ର ନଜର ରହିବ। ତେବେ ମୋଟ ୪୮ ପ୍ଲାଟୁନ୍ର ଅଧିକ ଫୋର୍ସ ପ୍ରଥମ ପର୍ଯ୍ୟାୟ ନିର୍ବାଚନ ଦାୟିତ୍ୱରେ ରହିବେ ବୋଲି ଏସ୍ଡିପିଓ କିଶୋର ଚନ୍ଦ୍ର ମୁଣ୍ଡ ସୂଚନା ଦେଇଛନ୍ତି। ୨୮ ନମ୍ବର ଜୋନ୍ ବିଜେଡି ସମର୍ଥିତ ଜିଲା ପରିଷଦ ପ୍ରାର୍ଥୀ କୈଳାସ ଚନ୍ଦ୍ର ପରିଡ଼ା କହିଛନ୍ତି, ପ୍ରଚାରକୁ ଶୃଙ୍ଖଳିତ ଭାବେ ଶେଷ କରିଛୁ। ଭୋଟଗ୍ରହଣ ଦିନ ମଧ୍ୟ ଏହିଭଳି ମତଦାନ ହେବ ବୋଲି ଆଶା ରଖିଛୁ। ମତଦାନ କେନ୍ଦ୍ରରେ ସୁରକ୍ଷା ବ୍ୟବସ୍ଥା ଉପରେ ପୋଲିସ ପ୍ରଶାସନ ତୀକ୍ଷ୍ଣ ଦୃଷ୍ଟି ଦେବା ଦରକାର। ନଚେତ୍ ଅପ୍ରୀତିକର ପରିସ୍ଥିତି ସୃଷ୍ଟି ହେବାର ଆଶଙ୍କା ଦେଖାଦେଇପାରେ। ଜିଲାପାଳ ସମର୍ଥ ବର୍ମା କହିଛନ୍ତି, ମତଦାନକୁ ଶୃଙ୍ଖଳିତ କରିବା ଦିଗରେ ପ୍ରଶାସନ ସମସ୍ତ ପ୍ରସ୍ତୁତି ଶେଷ କରିଛି। ଶୃଙ୍ଖଳିତ ଭାବେ ମତଦାନ ଶେଷ ହେବ।