ରସୁଲପୁର,୨ା୧୨(ରଞ୍ଜିତ ରାଉତ): ରସୁଲପୁର ବ୍ଲକ ଅଧୀନ ୧୮ ପଞ୍ଚାୟତରେ ନାହାନ୍ତି ଭିଆର୍ପି(ଭିଲେଜ ରିସୋର୍ସ ପର୍ସନ ଅର୍ଥାତ ଗ୍ରାମ ସମ୍ବଳ ବ୍ୟକ୍ତି)। ତେଣୁ ଏହି ପଦବୀ ପୂରଣ ପାଇଁ ଲିଖିତ ପରୀକ୍ଷା ଆସନ୍ତା ୩ତାରିଖରେ ଅନୁଷ୍ଠିତ ହେବ। ଏଥିପାଇଁ ୧୭ ପଞ୍ଚାୟତରୁ ୨୧୦ଜଣ ଆବେଦନ କରିଛନ୍ତି। ମହେଶ୍ୱରପୁର ପଞ୍ଚାୟତରେ ଆଭ୍ୟନ୍ତରୀୟ ସମସ୍ୟାକୁ ନେଇ କେହି ଆବେଦନ କରିନାହାନ୍ତି। ଯୋଗ୍ୟ ଆବେଦନକାରୀଙ୍କୁ ନେଇ ଲିଖିତ ପରୀକ୍ଷା ଅନୁଷ୍ଠିତ ହେବ। ପରୀକ୍ଷାରେ କୃତକାର୍ଯ୍ୟ ହେଉଥିବା ପ୍ରାର୍ଥୀଙ୍କୁ ନେଇ ଏକ ମୌଖିକ ପରୀକ୍ଷା ହେବ। ଉକ୍ତ ପରୀକ୍ଷାରେ କୃତକାର୍ଯ୍ୟ ହେଲେ ସେମାନେ ପଞ୍ଚାୟତରେ ଗ୍ରାମ ସମ୍ବଳ ବ୍ୟକ୍ତି ଭାବରେ ନିଯୁକ୍ତି ପାଇବେ ବୋଲି ଏହି ପ୍ରକ୍ରିୟାକୁ ପରିଚାଳନା କରିବା ପାଇଁ ଗଠିତ ବୋର୍ଡ ପକ୍ଷରୁ ସ୍ଥିର କରାଯାଇଛି।
ସମ୍ବଳ ବ୍ୟକ୍ତିମାନଙ୍କୁ ଚୟନ ପାଇଁ ଅନୁଷ୍ଠିତ ହେବାକୁ ଥିବା ପରୀକ୍ଷା ଓ ଅନ୍ୟାନ୍ୟ ପ୍ରକ୍ରିୟାରେ ସ୍ବଚ୍ଛତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ପରୀକ୍ଷାକୁ ପ୍ରଭାବିତକରି ସମ୍ପର୍କୀୟମାନଙ୍କୁ ଥଇଥାନ କରିବାକୁ ରାଜନୈତିକସ୍ତରରେ କସରତ ଚାଲିଛି। ପୂରାପୂରି ପ୍ରକ୍ରିୟାକୁ ପ୍ରଭାବିତ କରିବା ପାଇଁ ଭିତ୍ତିରି ଯୋଜନା କରାଯାଉଥିବା ସାଧାରଣରେ ଆଲୋଚନା ହେଉଛି। ଏପରି କି ପରୀକ୍ଷାରେ କ’ଣ ସବୁ ପ୍ରଶ୍ନପତ୍ର ଆସିବ ଓ ତା’ର ଉତ୍ତର କ’ଣ ହେବ, ସେ ଦିଗରେ ପସନ୍ଦର ଆବେଦନକାରୀଙ୍କୁ ପରୀକ୍ଷା ପୂର୍ବଦିନ ଜଣାଇ ଦିଆଯିବାକୁ ଯୋଜନା କରାଯାଉଛି। ତେଣୁ ପରୀକ୍ଷାରେ ସ୍ବଚ୍ଛତା ଅଣାଯାଇ ଯୋଗ୍ୟ ବ୍ୟକ୍ତିମାନଙ୍କୁ ନିଯୁକ୍ତି ଦିଆଯିବାକୁ ସାଧାରଣରେ ଦାବି ହେଉଛି।
ଭିଆରପିମାନଙ୍କୁ ନିଯୁକ୍ତି ଦିଆଯାଉଛି। ମହିଳା ସ୍ବୟଂସହାୟିକା ଗୋଷ୍ଠୀ ସଦସ୍ୟା ଭାବେ କାର୍ଯ୍ୟ କରୁଥିବା ମାଟ୍ରିକ ପାସ୍ ମହିଳା ଏହି ପଦବୀ ପାଇଁ ଆବେଦନ କରିବାକୁ ଯୋଗ୍ୟ ବିବେଚିତ ହୋଇଛନ୍ତି। ତା’ଠାରୁ ଅଧିକ ଯୋଗ୍ୟତା ଥିବା ପ୍ରାର୍ଥୀମାନଙ୍କୁ ମଧ୍ୟ ଚୟନ କ୍ଷେତ୍ରରେ ଅଗ୍ରାଧିକାର ଦିଆଯିବ। ଏହି କ୍ରମରେ ପ୍ରଥମ ପର୍ଯ୍ୟାୟରେ ବ୍ଲକରେ ୧୦ଜଣ ଭିଆରପିଙ୍କୁ ନିଯୁକ୍ତି ଦିଆଯାଇଛି। ବାକି ପଞ୍ଚାୟତର ଭିଆରପିମାନଙ୍କୁ ଚୟନ ପାଇଁ ଲିଖିତ ପରୀକ୍ଷା କରାଯିବ। ୫୦ ପ୍ରଶ୍ନର ଉତ୍ତର ପାଇଁ ୧ ଘଣ୍ଟା ଅବଧି ରହିଛି। ପରୀକ୍ଷା ପରିଚାଳନା ପାଇଁ ଜାବରା ଉଚ୍ଚ ବିଦ୍ୟାଳୟକୁ କେନ୍ଦ୍ର ଭାବରେ ଚୟନ କରାଯାଇଛି। ଏନେଇ ବ୍ଲକ ସାମାଜିକ ସମୀକ୍ଷକ ରିଙ୍କୁନ ସ୍ବାଇଁଙ୍କୁ ପଚାରିବାରୁ ସେ କହିଛନ୍ତି, ପରୀକ୍ଷାରେ ସ୍ବଚ୍ଛତା ବଜାଇ ରଖିବା ଉପରେ ଗୁରୁତ୍ୱ ଦିଆଯାଉଛି। ପ୍ରଶ୍ନପତ୍ର ପ୍ରଘଟ ହେବା ସମ୍ଭାବନାକୁ ସେ ଅସ୍ବୀକାର କରିଛନ୍ତି। ପରୀକ୍ଷା ଦିନ ସକାଳୁ କେନ୍ଦ୍ରରେ ପ୍ରଶ୍ନପତ୍ର ପହଞ୍ଚତ୍ବ। କୌଣସି ଅନିୟମିତା ଯେପରି ନ ଘଟିବ ସେଥିପ୍ରତି ଧ୍ୟାନ ଦିଆଯାଉଛି। ଲିଖିତ ପରୀକ୍ଷା ସରିବାର କମ୍ ଦିନ ବ୍ୟବଧାନରେ ମୌଖିକ ପରୀକ୍ଷା ହେବ ବୋଲି ସେ ପ୍ରକାଶ କରିଛନ୍ତି।