ମାଲକାନଗିରି, ୩୦ା୧୨(ଦୁର୍ଯ୍ୟୋଧନ ପାତ୍ର): ମାଲକାନଗିରି ଜିଲା ସଦର ବ୍ଲକ କତାମେଟାରେ ଶନିବାର ଶ୍ରୀକ୍ଷେତ୍ର ଅପେରା ଯାତ୍ରା କରୁଥିବା ବେଳେ ଜଣେ ତରୁଣୀଙ୍କ ଅଶ୍ଳୀଳ ନୃତ୍ୟକୁ ଆଧାରକରି ତାଙ୍କ ନାମରେ ମାଲକାନଗିରି ପୋଲିସ ନିଜ ଆଡୁ ମାମଲା ନଂ(୭୨୧/୨୪)ରୁଜୁ କରିଛି। ସେହିପରି ବିଜେଡି ମହିଳା ମୋର୍ଚ୍ଚା ପକ୍ଷରୁ ମଧ୍ୟ ସୋମବାର ଏସ୍ପିଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି।
ପ୍ରକାଶ ଯେ, କତାମେଟାରେ ଶ୍ରୀକ୍ଷେତ୍ର ଅପେରାରେ ଗତ ଶନିବାର ନାଟକ ଆରମ୍ଭ ପୂର୍ବରୁ ଓଡ଼ିଶାରେ ସାହୁ ଭାଉଜ ନାମରେ ପରିଚିତ ଭାଗ୍ୟଶ୍ରୀ ସାହୁ ଅଶ୍ଳୀଳ ନୃତ୍ୟ ପ୍ରଦର୍ଶନ କରିଥିଲେ। ଅପେରା ଦେଖିବା ପାଇଁ ଶହ ଶହ ମହିଳା ପୁରୁଷ ପରିବାର ସହ ଏଠାରେ ଉପସ୍ଥିତ ଥିଲେ। ଏହି ଅଶ୍ଳୀଳ ନୃତ୍ୟ ପ୍ରଦର୍ଶନକୁ ଲୋକେ ନିନ୍ଦା କରିବା ସହ ଏହାଦ୍ୱାରା ଓଡିଶାରେ ଅପେରାରମାନ ହ୍ରାସ ପାଉଥିବା କହିଥିଲେ। ଏ ସମ୍ପର୍କରେ ମାଲକାନଗିରି ଥାନାରେ ନୃତ୍ୟାଙ୍ଗନା ଭାଗ୍ୟଶ୍ରୀ ସାହୁ ଓରଫ ସାହୁ ଭାଉଜ, ଶ୍ରୀ କ୍ଷେତ୍ର ଅପେରା ଓ କତାମେଟା ଯାତ୍ରା କମିଟି ଆୟୋଜକଙ୍କ ନାମରେ ପୋଲିସ ନିଜଆଡୁ ମାମଲା ରୁଜୁ କରିଛି।
