Feet of new born Baby in Hands of parents
ମୁମ୍ବାଇ,୧୮ ।୧୦: କରୋନା ମହାମାରୀ ସମୟରେ ସୁରକ୍ଷିତ ପ୍ରସବ ଉଭୟ ପ୍ରସୂତି ଓ ଡାକ୍ତରଙ୍କ ପାଇଁ ଚ୍ୟାଲେଞ୍ଜ ପାଲଟି ଯାଇଛି । ଏଥିରେ ଉଭୟ ମା’ ଓ ଶିଶୁ ଉଭୟଙ୍କୁ କରୋନା ସଂକ୍ରମଣରୁ ଦୂରେଇ ରଖିବା ଜରୁରୀ । ତେବେ ଏହି ସମୟରେ ମୁମ୍ବାଇର ଏକ ହସ୍ପିଟାଲ ପ୍ରାୟ ୭୦୦ କରୋନା ସଂକ୍ରମିତ ପ୍ରସୂତିଙ୍କ ପ୍ରସବ କରାଇ ଅନ୍ୟମାନଙ୍କ ପାଇଁ ଉଦାହାରଣ ସୃଷ୍ଟି କରିଛି । ଦକ୍ଷିଣ ମୁମ୍ବାଇରେ ଥିବା ଭିୱାଇଏଲ୍ ନାୟାର ଚ୍ୟାରିଟେବଲ ହସ୍ପିଟାଲ ବିଶ୍ୱ ପାଇଁ ଉଦାହରଣ ପାଲଟିଛି । କେବଳ ଭାରତୀୟ ମହିଳା ନୁହେଁ ବରଂ କେତେଜଣ ବିଦେଶୀ ମହିଳାଙ୍କର ମଧ୍ୟ ପ୍ରସବ କରାଇଛି ଏହି ହସ୍ପିଟାଲ । ପାଖାପାଖି ୯୯ ବର୍ଷ ପୂରୁଣା ଏହି ହସ୍ପିଟାଲରେ ପ୍ରତିବର୍ଷ ପ୍ରାୟ ୪ହଜାର ପ୍ରସବ କରାଯାଇଥାଏ । ପ୍ରଥମେ ଯେତେବେଳେ ଏହି ହସ୍ପିଟାଲରେ ଜଣେ କରୋନା ସଂକ୍ରମିତ ପ୍ରସୂତି ଭର୍ତ୍ତି ହେଲେ ସେତେବେଳେ ସେଠାରେ ପାଖାପାଖି ୧୦୦ ଜଣ ସୁସ୍ଥ ପସୂତି ଭର୍ତ୍ତି ହୋଇଥିଲେ । ସେମାନଙ୍କୁ କରୋନା ଭାଇରସ ସଂକ୍ରମଣଠାରୁ ଦୂରେଇ ରଖିବାକୁ ସଂକ୍ରମିତ ମହିଳାଙ୍କ ପାଇଁ ସ୍ୱତନ୍ତ୍ର ଲେବର ୱାର୍ଡ ଓ ଅନ୍ୟାନ୍ୟ ବ୍ୟବସ୍ଥା କରାଯାଇଥିବା କହିଛନ୍ତ ସ୍ତ୍ରୀ ରୋଗ ବିଶେଷଜ୍ଞ ନିରଜ ମହାଜନ । ପ୍ରଥମେ ଏପ୍ରିଲ ୧୪ରେ ସ୍ତ୍ରୀ ରୋଗ ବିଶେଷଜ୍ଞ ଡାକ୍ତର ସାୟଲା ଶ୍ରୀବାସ୍ତବ ନୂଆ ୱାର୍ଡରେ ପ୍ରଥମ କରୋନା ସଂକ୍ରମିତ ପ୍ରସୂତିଙ୍କର ପ୍ରସବ କରାଇଥିଲେ । ଆବଶ୍ୟକ ଉପକରଣ ନ ଥିଲେ ମଧ୍ୟ ମୋବାଇଲ ଫ୍ଲାସ ଲାଇଟ୍ ମାଧ୍ୟମରେ ସଫଳତାର ସହ ପ୍ରସବ କରାଯାଇଥିଲା । ତେବେ କରୋନା ସଂକ୍ରମିତ ପ୍ରସୂତିଙ୍କୁ କୌଣସି ହସ୍ପିଟାଲ ଆଡମିଟ କରି ନ ଥିବା ବେଳେ ନାୟାର ହସ୍ପିଟାଲ ଯେମିତି ଏମାନଙ୍କ ପାଇଁ ଦେବଦୂତ ସାଜିଥିଲା ବୋଲି କୁହାଯାଏ ।