ମସ୍କୋ,୨୪।୬ : ଏକ ବର୍ଷରୁ ଅଧିକ ସମୟ ଧରି ୟୁକ୍ରେନ ଯୁଦ୍ଧରେ ରୁଷିଆ ପାଇଁ ଢାଲ ଭାବରେ କାର୍ଯ୍ୟ କରୁଥିବା ୱାଗନର୍ ଗ୍ରୁପ ରୁଷିଆ ସରକାରଙ୍କ ବିରୁଦ୍ଧରେ ବିଦ୍ରୋହ କରିଛି। ପିଏମସି ୱାଗନର୍ ଭାବରେ ଜଣାଶୁଣା ଏହି ଗୋଷ୍ଠୀ ପ୍ରଥମେ ପୂର୍ବ ୟୁକ୍ରେନରେ ୨୦୧୪ ବିବାଦ ସମୟରେ ବିଶ୍ୱରେ ନିଜର ପରିଚିତି ସୃଷ୍ଟି କରିଥିଲା।
ୱାଗନର୍ ଗ୍ରୁପ ସାହାଯ୍ୟରେ ହିଁ ରୁଷିଆର ସେନା ୟୁକ୍ରେନ ଯୁଦ୍ଧ ସମୟରେ ବାଖମୁଟ ସହରକୁ ଦଖଲ କରିବାରେ ସଫଳ ହୋଇଥିଲା। କିନ୍ତୁ, ଆଜି ଏହି ଗୋଷ୍ଠୀ ରୁଷିଆର ରାଷ୍ଟ୍ରପତି ଭ୍ଳାଡ଼ିମିର ପୁଟିନଙ୍କ ବିରୋଧରେ ଏକ ମୋର୍ଚ୍ଚା ଖୋଲିଛନ୍ତି। ୱାଗନର୍ ଗ୍ରୁପ ରାଷ୍ଟ୍ରପତି ପୁଟିନଙ୍କ ବିରୁଦ୍ଧରେ ବିଦ୍ରୋହ କରିଛି।
ୱାଗନର୍ ପ୍ରାଇଭେଟ ମେଜର ୟେଭେଗେନି ପ୍ରିଗୋଜିନ ରୁଷର ସାମରିକ ନେତୃତ୍ୱକୁ ଦେଶରୁ ବହିଷ୍କାର କରିବାର ଲକ୍ଷ୍ୟ ନେଇ ମସ୍କୋ ଆଡ଼କୁ ଅଗ୍ରସର ହେବାକୁ ନିଷ୍ପତ୍ତି ନେଇଛନ୍ତି। ଏହି ଗୋଷ୍ଠୀ ସହିତ ଲଢିବା ପାଇଁ ରୁଷିଆର ସେନା ମଧ୍ୟ ପ୍ରସ୍ତୁତ ହୋଇଛି। ରୁଷର ରାଜଧାନୀ ମସ୍କୋରେ ବହୁ ସଂଖ୍ୟକ ଟ୍ୟାଙ୍କ ଏବଂ ସୁରକ୍ଷା ବାହିନୀ ମୁତୟନ କରାଯାଇଛି। ଏହି ସମୟରେ, ରୁଷିଆର ପ୍ରତିରକ୍ଷା ମନ୍ତ୍ରଣାଳୟ ଶନିବାର ୱାଗନର୍ ଗ୍ରୁପ୍ ମସ୍କୋ ଆଡକୁ ନ ଆସିବାକୁ ଏବଂ ପୂର୍ବରୁ ନିୟୋଜିତ ହୋଇଥିବା ସ୍ଥାନକୁ ଫେରି ଯିବାକୁ ଅପିଲ କରିଛି। ଏହାପୂର୍ବରୁ ୱାଗନର୍ ଗ୍ରୁପର ମୁଖ୍ୟ ୟେଭେଗେନି ପ୍ରିଗୋଜିନ ଦାବି କରିଥିଲେ ଏହି ଗୋଷ୍ଠୀ ରୁଷିଆର ଦୁଇଟି ସହରରେ ସାମରିକ ସୁବିଧା ନିୟନ୍ତ୍ରଣ କରୁଛନ୍ତି।
ରୁଷିଆର ପ୍ରତିରକ୍ଷା ମନ୍ତ୍ରଣାଳୟ ଦ୍ୱାରା ଜାରି ଏକ ବିବୃତ୍ତି ଅନୁଯାୟୀ, ୟେଭେଗେନି ପ୍ରିଗୋଜିନଙ୍କୁ କୁହାଯାଇଛି ଆପଣଙ୍କ ଦଳର ଅନେକ ସୈନିକ ସେମାନଙ୍କର ଭୁଲ ବୁୂଝିପାରି ପଶ୍ଚାତାପ କରୁଛନ୍ତି। ସେମାନେ ସେମାନଙ୍କର ସ୍ଥାୟୀ ଶିବିରକୁ ଫେରିବା ପାଇଁ ସାହାଯ୍ୟ ଲୋଡିଛନ୍ତି।
ସେମାନଙ୍କର ସ୍ଥାୟୀ ବେସକୁ ଫେରିବାକୁ ଚାହୁଁଥିବା ସମସ୍ତ ୱାଗନର୍ ଗ୍ରୁପ ସୈନିକଙ୍କୁ ସହାୟତା ଯୋଗାଇ ଦିଆଯିବ ବୋଲି ପ୍ରତିରକ୍ଷା ମନ୍ତ୍ରଣାଳୟ ସୂଚନା ଦେଇଛି। ମନ୍ତ୍ରଣାଳୟ ଆହୁରି ମଧ୍ୟ କହିଛି ଆମେ ସମସ୍ତଙ୍କ ସୁରକ୍ଷା ନିଶ୍ଚିତ କରିବାକୁ ପ୍ରସ୍ତୁତ।
ଶନିବାର ଭୋରୋନେଜରେ ରୁଷିଆର ସାମରିକ ସୁବିଧା ଉପରେ ନିୟନ୍ତ୍ରଣ ରଖିବାକୁ ଦାବି କରିଛନ୍ତି। ଏହାପୂର୍ବରୁ ଶନିବାର ୱାଗନର୍ ମୁଖ୍ୟ ୟେଭେଗେନି ପ୍ରିଗୋଜିନ କହିଥିଲେ ରୋଷ୍ଟୋଭ-ଅନ-ଡନରେ ଥିବା ଏୟାରଫିଲ୍ଡ ସମେତ ସାମରିକ ସୁବିଧାକୁ ତାଙ୍କ ସୈନ୍ୟ ନିୟନ୍ତ୍ରଣ କରୁଛନ୍ତି। ସିଏନଏନ ଆରଆଇ ନୋଭୋଷ୍ଟିଙ୍କ ଉଦ୍ଧେଶ୍ୟରେ କହିଛି ରୁଷିଆର ସୁରକ୍ଷା ବାହିନୀ ସେଣ୍ଟ ପିଟର୍ସବର୍ଗର ୱାଗନର୍ ସେଣ୍ଟର ବିଲ୍ଡିଂକୁ ଘେରି ରହିଛନ୍ତି।