ଭୁବନେଶ୍ୱର,୧୩ା୫(ବ୍ୟୁରୋ): ରାଜ୍ୟ ସଭା ଆସନ ଲାଗି ଆସନ୍ତା ଜୁନ୍ ୧୦ ତାରିଖରେ ନିର୍ବାଚନ ହେବ। ଏଥିପାଇଁ ଆସନ୍ତା ୨୪ ତାରିଖରେ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇବାକୁ ଥିବାବେଳେ ୩୧ରେ ନାମାଙ୍କନ ଦାଖଲର ଶେଷ ତାରିଖ। ଓଡ଼ିଶାର ୩ ରାଜ୍ୟ ସଭାସଦସ୍ୟ ପ୍ରସନ୍ନ ଆଚାର୍ଯ୍ୟ, ଏନ୍.ଭାସ୍କର ରାଓ ଏବଂ ସସ୍ମିତ ପାତ୍ରଙ୍କ କାର୍ଯ୍ୟକାଳ ଶେଷ ହେଉଥିବାରୁ ଏହି ଆସନ ପାଇଁ ନିର୍ବାଚନ ହେବ। ଅନ୍ୟପକ୍ଷରେ ସୁବାସ ସିଂ କଟକ ମେୟର ହେବାପରେ ରାଜ୍ୟ ସଭାରୁ ଗତ ମାସରେ ଇସ୍ତଫା ଦେଇଥିଲେ। ହେଲେ ଏହି ଆସନ ଲାଗି ନିର୍ବାଚନ ହେବାକୁ ଘୋଷଣା କରାଯାଇ ନାହିଁ। ତେବେ ସଂଖ୍ୟା ଦୃଷ୍ଟିରୁ ନିର୍ବାଚନ ହେବାକୁ ଥିବା ଓଡ଼ିଶାର ୩ ରାଜ୍ୟ ସଭା ଆସନ ବିଜେଡି ହାତରେ ରହିବ। ତେଣୁ ଦଳ କେଉଁମାନଙ୍କୁ ପ୍ରାର୍ଥୀ କରିବ ତାକୁ ନେଇ ଦିନ ତମାମ ଚର୍ଚ୍ଚା, ଆଲୋଚନା ବଢ଼ିଯାଇଛି। ତେବେ ଯେକୌଣସି ପଦବୀ ଲାଗି ରାଜ୍ୟରେ ନିର୍ବାଚନ ହୁଏ ପ୍ରାର୍ଥୀ ଘୋଷଣାରେ ସବୁବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଚକ୍ମା ଦେଇଛନ୍ତି। ଯେଉଁମାନଙ୍କୁ ରାଜ୍ୟ ସଭା ପଠାଯିବ ବୋଲି ପୂର୍ବରୁ ଆଲୋଚନା ହୋଇଥାଏ ସେଥିରେ ଅନେକ ସମୟରେ ବ୍ୟତିକ୍ରମ ଦେଖାଯାଏ। ଅବଶ୍ୟ କଂଗ୍ରେସରୁ ଆସି ପ୍ରଦୀପ ମାଝି ଦଳରେ ମିଶିଥିବାରୁ ତାଙ୍କୁ ପଠାଯାଇପାରେ ବୋଲି ଆଲୋଚନା ଜୋର ଧରିଛି। ସସ୍ମିତଙ୍କ ପ୍ରଦର୍ଶନ ରାଜ୍ୟ ସଭାରେ ଭଲ ରହିଥିବାରୁ ତାଙ୍କ ନାଁକୁ ନେଇ ମଧ୍ୟ ଚର୍ଚ୍ଚା ହେଉଛି। କେଉଁଠୁ ନା କେଉଁଠୁ ମୋ ସ୍କୁଲ ଅଭିଯାନ ଅଧ୍ୟକ୍ଷା ସୁସ୍ମିତା ବାଗ୍ଚୀଙ୍କ ନାଁ ରାଜନୀତିରେ ଯେକୌଣସି ଭୋଟ ହେଲେ ବିଜେଡି ପ୍ରାର୍ଥୀ ହେବେ ବୋଲି ଅନେକ ସ୍ଥାନରେ ଆଲୋଚନା ହେବାରେ ଲାଗିଛି। ଗଲା ମେୟର ଭୋଟ ସମୟରେ ମଧ୍ୟ ବାଗ୍ଚୀଙ୍କ ନାଁ ବହୁ ପୂର୍ବରୁ ଆରମ୍ଭ ହୋଇ ଶେଷ ପର୍ଯ୍ୟନ୍ତ ଚର୍ଚ୍ଚାରେ ରହିଲା। ତେବେ ପଶ୍ଚିମ ଓଡ଼ିଶାରେ ବହୁ ଟାଣୁଆ ନେତା ଗତ ସାଧାରଣ ନିର୍ବାଚନରେ ପରାଜୟବରଣ କରିଥିବାରୁ ସେମାନଙ୍କ ମଧ୍ୟରୁ କାହାକୁ ରାଜ୍ୟ ସଭା ଛଡ଼ାଯାଇପାରେ ବୋଲି ଚର୍ଚ୍ଚା ବଢିଛି। ସେହିପରି ଦକ୍ଷିଣ, ଉତ୍ତର ଏବଂ ଉପକୂଳ ଓଡ଼ିଶାରେ ବିଜେଡି ଟିକେଟ ପାଇ ପରାଜୟବରଣ କରିଥିବା ନେତାଙ୍କ ମଧ୍ୟରୁ କାହାକୁ ରାଜ୍ୟ ସଭା ପଠାଯାଇପାରେ ବୋଲି ଆଲୋଚନା ଚାଲିଛି। ତେବେ ସବୁଥର ଭଳି ଆଲୋଚନା ବାହାରୁ ପ୍ରାର୍ଥୀ ହୋଇପାରନ୍ତି ବୋଲି ରାଜନୀତି ସମୀକ୍ଷକଙ୍କ ଭିତରେ ଚର୍ଚ୍ଚା ଲାଗିଛି।