ବଇଣ୍ଡା,୨୮ା୧(ପରିକ୍ଷିତ ସାହୁ): କ୍ରୀଡ଼ାର ବିକାଶ ପାଇଁ ଯୋଜନା ପରେ ଯୋଜନା ହେଉଛି। କଳିଙ୍ଗ ଷ୍ଟାଡିୟମର ଆଧୁନିକୀକରଣ ଠାରୁ ଆରମ୍ଭ କରି ଜିଲା ଓ ବ୍ଲକସ୍ତରରେ ମିନି ଷ୍ଟାଡିୟମମାନ ନିର୍ମାଣ କରାଯାଉଛି। କିନ୍ତୁ ଅନୁଗୋଳ ଜିଲା କିଶୋରନଗର ବ୍ଲକର ବଇଣ୍ଡାଠାରେ ଏକ ମିନି ଷ୍ଟାଡିୟମ ନିର୍ମାଣ କରାଯାଉ ନାହିଁ। ଏ ନେଇ ୨୦୦୨ରୁ ବଇଣ୍ଡା ଗ୍ରାମବାସୀ ରାଜ୍ୟ କ୍ରୀଡ଼ାମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରିଥିଲେ ମଧ୍ୟ ଦୀର୍ଘ ୧୮ ବର୍ଷ ହେଲା ଅପେକ୍ଷାର ଅନ୍ତ ହେଉନାହିଁ। ଫଳରେ କ୍ରୀଡ଼ାର ବିକାଶ ଦିଗରେ ସରକାରଙ୍କ ଆନ୍ତରିକତା ନେଇ ଅଞ୍ଚଳବାସୀଙ୍କ ମନରେ ପ୍ରଶ୍ନବାଚୀ ସୃଷ୍ଟି ହୋଇଛି।
ଆଠମଲ୍ଲିକ ଉପଖଣ୍ଡର ଏକ ପ୍ରମୁଖ ସ୍ଥାନ ହେଉଛି ବଇଣ୍ଡା। ଏଠାରେ ଥିବା ବଇଣ୍ଡା ହାଇସ୍କୁଲ ପଡ଼ିଆ ଓ କଲେଜ ପଡ଼ିଆରେ ଯୁବଗୋଷ୍ଠୀ ବିଭିନ୍ନ ଖେଳ ସହ ପ୍ରତିଯୋଗିତାର ଆୟୋଜନ କରିଥାନ୍ତି। ଏଠାକାର ବହୁ ଖେଳାଳି ରାଜ୍ୟସ୍ତରରେ ଖେଳି ସୁନାମ ଅର୍ଜନ କରିଛନ୍ତି। ସେହିପରି ଜିଲାସ୍ତରୀୟ ଟିମ୍କୁ ମଧ୍ୟ କେତେଜଣ ଚୟନ ହୋଇଛନ୍ତି। କିନ୍ତୁ ଏଠାରୁ ନୂଆ ନୂଆ କ୍ରୀଡ଼ା ପ୍ରତିଭା ସୃଷ୍ଟି ଦିଗରେ ପ୍ରଶାସନ କିମ୍ବା ସରକାରଙ୍କ ଇଚ୍ଛାଶକ୍ତି ନ ଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ସେମାନେ କହିଛନ୍ତି, ମିନି ଷ୍ଟାଡିୟମଟିଏ ନିର୍ମାଣ ହୋଇପାରୁ ନ ଥିବାରୁ ବଇଣ୍ଡା ଅଞ୍ଚଳର ବହୁ ଖେଳାଳି କ୍ରିକେଟ, ଭଲି ବଲ, ଖୋ-ଖୋ, ଫୁଟବଲ ଆଦି କ୍ରୀଡ଼ାରେ ଅଧିକ ଉନ୍ନତି କରିପାରୁନାହାନ୍ତି। ପ୍ରତ୍ୟେକ ବର୍ଷ ଏଠାରେ ବିଭିନ୍ନ କ୍ରୀଡ଼ା ପ୍ରତିଯୋଗିତା ଅନୁଷ୍ଠିତ ହେଉଛି। କିନ୍ତୁ ମିନି ଷ୍ଟାଡିୟମ ନ ଥିବାରୁ ବଡ଼ଧରଣର ଟୁର୍ନାମେଣ୍ଟ ହୋଇପାରୁନି। ଉକ୍ତ ଦୁଇ ପଡ଼ିଆର ବିଭିନ୍ନ ସ୍ଥାନରେ ଘର ନିର୍ମାଣ କରାଯାଉଛି। ମିନି ଷ୍ଟାଡିୟମ ନିର୍ମାଣ ପାଇଁ ଗ୍ରାମବାସୀ ୨୦୦୨ରେ ତତ୍କାଳୀନ କ୍ରୀଡ଼ାମନ୍ତ୍ରୀ, ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରିଥିଲେ। ସେହିପରି ୨୦୧୨ ଓ ୨୦୧୭ରେ ମଧ୍ୟ ରାଜ୍ୟ ସରକାରଙ୍କୁ ଦାବିପତ୍ର ଦିଆଯାଇଥିଲା। ବଇଣ୍ଡା ଅଞ୍ଚଳରେ ସରକାରୀ ଜମିର ଅଭାବ ନ ଥିଲେ ମଧ୍ୟ ପ୍ରଶାସନ ଏଥିପ୍ରତି ଗୁରୁତ୍ୱ ଦେଉନାହିଁ। ଏପରିକି ବହୁ ସରକାରୀ ଜମି ଜବରଦଖଲ କରି ଘର ନିର୍ମାଣ କରାଯାଉଥିଲେ ମଧ୍ୟ ମିନି ଷ୍ଟାଡିୟମଟିଏ ପାଇଁ ଏଯାଏ ଜାଗା ଠିକ୍ କରାଯାଇ ନ ପାରିବା ପ୍ରଶାସନର କାର୍ଯ୍ୟଦକ୍ଷତାକୁ ପଦାରେ ପକାଉଥିବା ଗ୍ରାମବାସୀ ମତବ୍ୟକ୍ତ କରିଛନ୍ତି।
ଭଲଭାବେ ଅଭ୍ୟାସ କରିପାରୁନୁ
ହାଇସ୍କୁଲରେ ପଢୁଥିବାବେଳେ ରାଜ୍ୟସ୍ତରୀୟ ଖୋ-ଖୋ ଖେଳ ପାଇଁ ଚୟନ କରାଯାଇଥିଲା। ଉନ୍ନତ ପ୍ରଦର୍ଶନ ଯୋଗୁ ପୁରସ୍କାର ମିଳିଥିଲା। କିନ୍ତୁ ବଇଣ୍ଡାରେ ଏକ ମିନି ଷ୍ଟାଡିୟମ ନ ଥିବାରୁ ଖେଳାଳିମାନେ ଭଲ ଅଭ୍ୟାସ କରିପାରୁ ନାହାନ୍ତି କି ଅଧିକ ଖେଳ ପାଇଁ ସୁଯୋଗ ପାଇପାରୁ ନାହାନ୍ତି। ଫଳରେ କ୍ରୀଡ଼ାର ବିକାଶ ହୋଇପାରୁନାହିଁ।
-ସର୍ବେଶ୍ୱର ସାହୁ, ଖୋ-ଖୋ ଖେଳାଳି
ପ୍ରସ୍ତୁତି ପାଇଁ ଉପଯୁକ୍ତ ସ୍ଥାନ ନାହିଁ
ବଇଣ୍ଡା ଅଞ୍ଚଳରେ ଅନେକ ଭଲ ଖେଳାଳି ଅଛନ୍ତି। ସେମାନଙ୍କୁ ଆବଶ୍ୟକ ପ୍ରଶିକ୍ଷଣ ଓ ପ୍ରସ୍ତୁତି ପାଇଁ ଉପଯୁକ୍ତ ସ୍ଥାନ ମିଳିଲେ ରାଜ୍ୟକୁ ନୂଆ ନୂଆ ପ୍ରତିଭା ମିଳନ୍ତେ। ଏ ନେଇ ନେହେରୁ ଆଥଲେଟିକ ଆସୋସିଏଶନ ପକ୍ଷରୁ ବାରମ୍ବାର ଜନପ୍ରତିନିଧିମାନଙ୍କୁ ଅବଗତ କରାଯାଇଛି। କିନ୍ତୁ ଏଯାଏ ବଇଣ୍ଡାରେ ମିନି ଷ୍ଟାଡିୟମଟିଏ ନିର୍ମାଣ ହୋଇପାରୁ ନାହିଁ।
-ଅନିଲ ବେହେରା, କ୍ରିକେଟ୍ ଖେଳାଳି
ରାଜନେତା, ପ୍ରଶାସନ ଦାୟୀ
ଏଠାରେ ବହୁ ଫୁଟବଲ ଖେଳାଳି ଅଛନ୍ତି। ହେଲେ ସେମାନଙ୍କ ପାଇଁ ଏକ ସ୍ଥାୟୀ ଖେଳପଡ଼ିଆ ନାହଁି। ମିନି ଷ୍ଟାଡିୟମ ନିର୍ମାଣ ପାଇଁ ଦୀର୍ଘ ୧୫ ବର୍ଷ ହେବ ଅଞ୍ଚଳବାସୀ ଦାବି କରୁଛନ୍ତି। ମାତ୍ର ସ୍ଥାନୀୟ ରାଜନେତା, ପ୍ରଶାସନ ଏ ଦିଗରେ ସରକାରଙ୍କ ଦୃଷ୍ଟି ଆକର୍ଷଣ କରିପାରୁ ନାହାନ୍ତି। ଫଳରେ ଜାଗାର ଅଭାବ ନ ଥିଲେ ମଧ୍ୟ ମିନି ଷ୍ଟାଡିୟମ ଆଶା ପୂରଣ ହୋଇପାରୁ ନାହିଁ।
-ଅରବିନ୍ଦ ସାହୁ, ଫୁଟ୍ବଲ ଖେଳାଳି
ବିକାଶ ଦିଗରେ ଗୁରୁତ୍ୱ ଦିଆଯାଉନି
କ୍ରୀଡ଼ାର ବିକାଶ ଦିଗରେ ପଦକ୍ଷେପ ନିଆଯାଉଥିବା ସରକାର କହୁଛନ୍ତି। କିନ୍ତୁ ମିନିଷ୍ଟାଡିୟମ ନିର୍ମାଣ ପାଇଁ ବହୁବାର ସ୍ଥାନୀୟ ପ୍ରଶାସନ ଓ ସରକାରଙ୍କ ନିକଟରେ ଅଭିଯୋଗ କରାଯାଇଥିଲେ ମଧ୍ୟ କେହି ଦୃଷ୍ଟି ଦେଉନାହାନ୍ତି। ପ୍ରତିଭାର ବିକାଶ କରିବାକୁ ହେଲେ ପର୍ଯ୍ୟାପ୍ତ ସୁଯୋଗ ଯୋଗାଇ ଦିଆଯିବା ଉଚିତ। କିନ୍ତୁ ଏଥିପ୍ରତି ଗୁରତ୍ୱ ଦିଆଯାଉ ନାହିଁ।
-ଜଳଧର ସାହୁ, ସରପଞ୍ଚ, ନୁନୁକାପଶି
ଖୁବ୍ଶୀଘ୍ର ନିର୍ମାଣ କାର୍ଯ୍ୟ ଆରମ୍ଭ ହେବ
ବଇଣ୍ଡାଠାରେ ମିନିଷ୍ଟାଡିୟମ ନିର୍ମାଣ ନିମନ୍ତେ କ୍ରୀଡ଼ାମନ୍ତ୍ରୀଙ୍କୁ ଚିଠି ମାଧ୍ୟମରେ ଅନୁରୋଧ କରାଯାଇଛି। ଏ ନେଇ ଜାଗା ଚୟନ ପାଇଁ ତହସିଲଦାରଙ୍କୁ ମଧ୍ୟ ନିର୍ଦ୍ଦେଶ ଦେଇଛି। ଖୁବ୍ଶୀଘ୍ର କିଭଳି ଏହି ଷ୍ଟାଡିୟମ କରାଯାଇପାରିବ ସେଥିପ୍ରତି ଗୁରୁତ୍ୱ ଦିଆଯିବ। ପ୍ରାଥମିକ ଭାବେ ୨୫ ଲକ୍ଷ ଟଙ୍କା ଖର୍ଚ୍ଚ କରିବା ପାଇଁ ନିଷ୍ପତ୍ତି ହୋଇଛି।
-ରମେଶ ଚନ୍ଦ୍ର ସାଏ, ବିଧାୟକ, ଆଠମଲ୍ଲିକ