ଆଠମଲ୍ଲିକ,୩ା୬(ଡି.ଏନ.ଏ.): ଗରାଏ ପାଣି ପାଇଁ ହେବାକୁ ପଡ଼ୁଛି ବଡ଼ ଦହଗଞ୍ଜ। ନିକଟରେ ନଳକୂଅ ଥିଲେ ବି ଅପେକ୍ଷା କରିବାକୁ ପଡ଼ୁଛି ଘଣ୍ଟା ଘଣ୍ଟା। ସକାଳ ହେଉ କି ରାତି, ସବୁବେଳେ ଲାଗୁଛି ଲମ୍ବା ଲାଇନ। ପ୍ରତିବର୍ଷ ଗ୍ରୀଷ୍ମ ଋତୁରେ ଜଳସ୍ତର ହ୍ରାସ କାରଣରୁ ଏପରି ସଙ୍କଟର ସମ୍ମୁଖୀନ ହେବାକୁ ପଡ଼ୁଛି ଲୋକଙ୍କୁ। ହେଲେ ସମସ୍ୟାର ସ୍ଥାୟୀ ସମାଧାନ କରାଯାଉ ନ ଥିବାରୁ ଅନୁଗୋଳ ଜିଲା ଆଠମଲ୍ଲିକ ବ୍ଲକ ଲୁହାସିଙ୍ଗା ପଞ୍ଚାୟତବାସୀଙ୍କ ମଧ୍ୟରେ ବଢ଼ୁଛି ଅସନ୍ତୋଷ।
ଲୁହାସିଙ୍ଗା ପଞ୍ଚାୟତବାସୀଙ୍କ କହିବା ଅନୁଯାୟୀ, ୧୪ଟି ଗଁା ବିଶିଷ୍ଟ ଏହି ପଞ୍ଚାୟତର ଜନସଂଖ୍ୟା ୩୪ଶହରୁ ଅଧିକ ହେବ। ମହାନଦୀ ଠାରୁ ପଞ୍ଚାୟତର ଦୂରତା ମାତ୍ର ଦେଢ଼ରୁ ୨ କି.ମି.। କିନ୍ତୁ କେବଳ ଲୁହାସିଂହା ଗଁାକୁ ବାଦ୍ଦେଲେ ଅନ୍ୟ ୧୩ଟି ଗଁାରେ ପାନୀୟ ଜଳ ସମସ୍ୟା ଅତି ଉତ୍କଟ। ଲୁହାସିଂହାରେ ପାଇପ୍ ପାଣି ପ୍ରକଳ୍ପ ଥିବାବେଳେ ପଞ୍ଚାୟତର ମୋଟ୍ ୧୨ଟି ୱାର୍ଡରେ ଜନସ୍ବାସ୍ଥ୍ୟ ବିଭାଗ ତରଫରୁ ୪୯ଟି ନଳକୂପ ଖୋଳାଯାଇଛି। ହେଲେ ଧାତବ ଅଂଶ ପାଣିରେ ଅଧିକ ପରିମାଣର ରହୁଥିବାରୁ ୪ଟି ନଳକୂପ ବ୍ୟବହାରକୁ ନିଷେଧ କରାଯାଇଛି। ଅନ୍ୟ କେତୋଟି ନଳକୂଅର ଜଳସ୍ତର ଖସିଯାଇଥିବାରୁ ଆବଶ୍ୟକ ପରିମାଣର ପାଣି ବାହାରୁ ନାହିଁ। ଏପରି କି କିଛି ନଳକୂଅରୁ ଥରକେ ମାତ୍ର ୧୦ରୁ ୧୨ ଗରା ପାଣି ବାହାରିପାରୁଛି। ତେଣୁ ଏପରି ନଳକୂଅ ନିକଟରେ ପାଣି ପାଇଁ ଦୀର୍ଘ ଘଣ୍ଟା ଲୋକଙ୍କୁ ଅପେକ୍ଷା କରିବାକୁ ପଡ଼ୁଛି। ସେହିପରି କୂଅଗୁଡ଼ିକର ମଧ୍ୟ ସମାନ ଅବସ୍ଥା। ପଞ୍ଚାୟତର କିଛି ଗ୍ରାମରେ ପୋଖରୀ ଥିଲେ ମଧ୍ୟ ଦୀର୍ଘଦିନ ହେଲା ତାହା ବ୍ୟବହାର ଅନୁପଯୋଗୀ ହୋଇପଡ଼ିଥିବାରୁ ଗୃହପାଳିତ ପ୍ରାଣୀମାନେ ପିଇବା ପାଣି ପାଇପାରୁ ନାହାନ୍ତି। ପଞ୍ଚାୟତରେ ପାନୀୟ ଜଳ ସମସ୍ୟାର ସମାଧାନ ପାଇଁ ଅନେକ ଥର ପ୍ରଶାସନର ଦୃଷ୍ଟି ଆକର୍ଷଣ କରାଯାଇଛି। ଲୁହାସିଂହା ପରି ତେନ୍ତୁଳିପଦର, ପତାକା, ଡାହିମାଳ, ରାଣୀପଖାଳ, କୁସୁମକୁହୁରି, ଦୋଳମୁଣ୍ଡି, ବଙ୍କୁଆଳ, କେନ୍ଦୁପଟି, ପୋଡ଼ପଦାର, ରଣାମୁଣ୍ଡା, ପାଣ୍ଡିରଖୋଳ, ନୂଆକେନ୍ଦୁପା ଗ୍ରାମରେ ପାଇପ୍ ପାଣି ପ୍ରକଳ୍ପ ନିର୍ମାଣ କରିବାକୁ ଦାବି କରାଯାଇଛି। ହେଲେ ଆଠମଲ୍ଲିକସ୍ଥିତ ମହାନଦୀରେ ହେବାକୁ ଥିବା ମେଗା ଜଳଯୋଗାଣ ପ୍ରକଳ୍ପ କଥା କହି ପ୍ରଶାସନ ଲୋକଙ୍କ ସମସ୍ୟାକୁ ଅଣଦେଖା କରୁଥିବା ପଞ୍ଚାୟତବାସୀ ଅଭିଯୋଗ କରୁଛନ୍ତି। ଏହାଛଡ଼ା ଟ୍ୟାଙ୍କର ଯୋଗେ ପାଣି ଯୋଗାଇ ଦେବାକୁ ହେଉଥିବା ଦାବିକୁ ମଧ୍ୟ ଗ୍ରହଣ କରାଯାଉ ନାହିଁ। ଫଳରେ ପତାକା ସହିତ ଅନ୍ୟ କିଛି ଗ୍ରାମରେ ଲୋକେ ଗମ୍ଭୀର ଜଳକଷ୍ଟ ଭୋଗୁଥିବା ଅଞ୍ଚଳବାସୀ ପ୍ରକାଶ କରିଛନ୍ତି। ତୁରନ୍ତ ବ୍ଲକ ପ୍ରଶାସନ ଏ ଦିଗରେ ଆବଶ୍ୟକ ପଦକ୍ଷେପ ନେବାକୁ ଦାବି ହେଉଛି।