ଆଜିକାଲି ସମସ୍ତେ କ୍ରେଡିଟ୍ କାର୍ଡ ବ୍ୟବହାର କରୁଛନ୍ତି। ଟଙ୍କାର ଆବଶ୍ୟକତା ଥିଲେ କ୍ରେଡିଟ୍ କାର୍ଡର ସାହାରା ନିଆଯାଏ। ତେଣୁ ସମସ୍ତଙ୍କ ପାଖରେ ୨-୩ଟି କ୍ରେଡିଟ୍ କାର୍ଡ ତ ନିଶ୍ଚୟ ଥାଏ। କିନ୍ତୁ ଜଣେ ବ୍ୟକ୍ତି ୧୪୯୭ଟି ବ୍ୟାଙ୍କର କ୍ରେଡିଟ୍ କାର୍ଡ ରଖି ଗିନିଜ ଓ୍ବାଲର୍ଡ ରେକର୍ଡରେ ସ୍ଥାନ ପାଇଛନ୍ତି। ସେଥିମଧ୍ୟରୁ ୮୦୦ କାର୍ଡ ବୈଧ୍ୟ ଅଟେ। ଏହି ବ୍ୟକ୍ତି ଜଣକ ହେଉଛନ୍ତି ଓ୍ବାଲ୍ଟର କାଓ୍ବାନାଗ। ଓ୍ବାଲ୍ଟର ୧୭ ଲକ୍ଷ ଡଲାରର କ୍ରେଡିଟ୍ ସହ ସର୍ବାଧିକ କ୍ରେଡିଟ୍ କାର୍ଡ ରଖିଛନ୍ତି। କେବଳ ସେତିକି ନୁହେଁ, ପୃଥିବୀର ସବୁଠାରୁ ଲମ୍ବା ଓ୍ବାଲେଟ୍ ରଖିବା ପାଇଁ ତାଙ୍କୁ ମିଷ୍ଟର ପ୍ଲାଷ୍ଟିକ ଫାଣ୍ଟାଷ୍ଟିକର ମାନ୍ୟତା ବି ମିଳିଛି। ୧୯୭୧ ମସିହାରେ କାଓ୍ବାନାଗଙ୍କ ନାମ ଗିନିଜ ଓ୍ବାଲର୍ଡ ରେକର୍ଡସ୍ରେ ସ୍ଥାନ ପାଇଥିଲା। ଆଶ୍ଚର୍ଯ୍ୟର କଥା ଯେ, ତାଙ୍କ ପକେଟ୍ର ଓଜନ ୧୭ କି.ଗ୍ରା.; ଯେଉଁଥିରେ ସେ ନିଜର ୧୪୯୭ କାର୍ଡ ସହ ଆହୁରି ଅନେକ କାର୍ଡ ବି ରଖନ୍ତି। ନିଜର ଅଦ୍ଭୁତ ସଉକ ସମ୍ପର୍କରେ ଓ୍ବାଲ୍ଟର କହନ୍ତି, କାର୍ଡ ରଖିବା ସଉକ ତାଙ୍କର ୧୯୬୦ ମସିହାରୁ ଆରମ୍ଭ ହୋଇଥିଲା। ଦିନେ ସେ ନିଜ ସାଙ୍ଗ ସହ ଏକ ସର୍ତ୍ତ ରଖିଥିଲେ କି ବର୍ଷ ଶେଷ ବେଳକୁ ଯାହା ପାଖରେ ଅଧିକ କ୍ରେଡିଟ୍ କାର୍ଡ ଥିବ ସେ ହୋଟେଲରେ ମନ ପସନ୍ଦର ଖାଦ୍ୟ ଖାଇବ। ଆଉ ତା’ର ବିଲ୍ ଅନ୍ୟ ସାଙ୍ଗ ଭରିବ। ବର୍ଷ ଶେଷ ବେଳକୁ ତାଙ୍କ ପାଖରେ ୧୪୩ଟି କାର୍ଡ ହୋଇଯାଇଥିଲା। ତାଙ୍କ ସାଙ୍ଗ ପାଖରେ ୧୩୮ଟି କାର୍ଡ ଥିଲା। ତେଣୁ ସେ ସର୍ତ୍ତ ଜିତିଯାଇଥିଲେ। ସେବେଠାରୁ ସେ କାର୍ଡ ଜମା କରିବା ଆରମ୍ଭ କରିଥିଲେ। ଆଉ ଶେଷରେ ସେ ଏତେ କାର୍ଡ ଜମା କରିଦେଲେ ଯେ, ଗିନିଜ ଓ୍ବାଲର୍ଡ ରେକର୍ଡରେ ସ୍ଥାନ ପାଇଲେ।