ଗୁଣପୁର,୧୦ା୧(ଡି.ଏନ୍.ଏ.): ରାୟଗଡ଼ା ଜିଲା ଗୁଣପୁର ବିଡିଓ ଶାନ୍ତିପ୍ରଭା ପ୍ରଧାନଙ୍କୁ ଆଶ୍ୱସ୍ତି ମିଳିଛି। ତାଙ୍କ ନାମରେ ହୋଇଥିବା ୱାନ୍ସିସିକୁ ଏସ୍ଡିଜେଏମ୍ ଖାରଜ କରି ଦେଇଛନ୍ତି। ହେଲେ ଅଭିଯୋଗକାରିଣୀ ଗୁଣପୁର ଏସଡିଜେଏମଙ୍କ ରାୟ ବିରୋଧରେ ଉପର କୋର୍ଟର ଦ୍ବାରସ୍ଥ ହେବେ ବୋଲି କହିଛନ୍ତି।
ବିଡିଓଙ୍କ ନାମରେ ସ୍ଥାନୀୟ ଏସ୍ଡିଜେଏମଙ୍କ କୋର୍ଟରେ ହୋଇଥିବା ୱାନ୍ସିସି ଉପରେ କଗ୍ନିଜାନ୍ସ ଉପରେ ରାୟ ତଥା ଆଦେଶ ସୋମବାର ପ୍ରକାଶ ପାଇବାର ଥିଲା। ହେଲେ ଏସ୍ଡିଜେଏମ୍ ଶାନ୍ତଶ୍ରୀ ମହାନ୍ତି ଏହାକୁ ଖାରଜ କରିଦେଇଛନ୍ତି। ଉପରିସ୍ଥ ଅଧିକାରୀଙ୍କ ଠାରୁ ମଞ୍ଜୁରି ନ ଥାଇ ବ୍ଲକ ଅଧ୍ୟକ୍ଷା ଝିଲି ଶବର ମାମଲା ରୁଜୁ କରିଥିବାରୁ ବିଡିଓଙ୍କ ନାମରେ ହୋଇଥିବା ୱାନ୍ସିସି ମାମଲାକୁ ଖାରଜ କରିଛନ୍ତି। ଏହାକୁ ନେଇ ଅଭିଯୋଗକାରିଣୀ ରାୟ ତଥା ଆଦେଶ ବିରୋଧରେ ଉପର କୋର୍ଟର ଦ୍ବାରସ୍ଥ ହେବେ ବୋଲି କହିଛନ୍ତି। ସୂଚନାଯୋଗ୍ୟ, ବ୍ଲକ ଅଧ୍ୟକ୍ଷା ଝିଲି ଶବର ଡିସେମ୍ବର୨ରେ ବିଡିଓଙ୍କ ନାମରେ ୱାନ୍ସିସି ମାମଲା ରୁଜୁ କରିଥିଲେ। ଏହି ମାମଲାରେ ଡିସେମ୍ବର ୯ରେ କୋର୍ଟ ପକ୍ଷରୁ ସାକ୍ଷ୍ୟ ଗ୍ରହଣ ପାଇଁ ଦିନଧାର୍ଯ୍ୟ ହୋଇଥିଲା। ଉକ୍ତଦିନ ବ୍ଲକ ଅଧ୍ୟକ୍ଷା ଏସ୍ଡିଜେଏମ୍ ଶାନ୍ତଶ୍ରୀ ମହାନ୍ତିଙ୍କ ନିକଟରେ ହାଜର ହୋଇ ମାମଲା ଉପରେ ନିଜ ବୟାନ ରଖିଥିଲେ। ଅଭିଯୋଗ ପ୍ରକାରେ ଏସଡିଜେଏମ୍ ଝିଲି ଶବରଙ୍କ ବୟାନ ରେକର୍ଡ କରିଥିଲେ। ଏଥିସହ ବ୍ଲକ ଉପାଧ୍ୟକ୍ଷ ସୁଦର୍ଶନ ଶବର ଏବଂ ଡମ୍ବସରା ସରପଞ୍ଚ ସନ୍ତୋଷୀ ଶବର ପ୍ରମୁଖ ସାକ୍ଷୀଭାବେ ନିଜ ବୟାନ ରଖିଥିଲେ। ଏପରି ଉକ୍ତ ମାମଲାରେ ୩ ଜଣଙ୍କ ସାକ୍ଷ୍ୟ ଗ୍ରହଣ ହୋଇଥିଲା। ସୋମବାର ବିଡିଓଙ୍କ ବିରୋଧରେ କଗ୍ନିଜାନ୍ସ ପାଇଁ ଦିନ ଧାର୍ଯ୍ୟ ହେବା ସହ ରାୟ ପ୍ରକାଶ ପାଇବାର ଥିଲା। ପ୍ରକାଶଯୋଗ୍ୟ, ଡିସେମ୍ବର ୨ରେ ବ୍ଲକ ଅଧ୍ୟକ୍ଷା ଓ୍ବାନ୍ସିସି ନଂ.୨୮/୨୨,ଦଫା ୫୦୦, ୫୦୩, ୫୦୬ କ୍ରମେ ଗୁଣପୁର ଏସ୍ଡିଜେଏମ୍ଙ୍କ କୋର୍ଟରେ ମାମଲା ଦାଖଲ କରିଥିଲେ। ଝିଲିଙ୍କ ଅଭିଯୋଗ କ୍ରମେ ଓକିଲ ଉମାଚରଣ ପଟ୍ଟନାୟକ ଏ ନେଇ କୋର୍ଟରେ ମାମଲା ରୁଜୁ କରିଥିଲେ। ଘଟଣା ନେଇ ଝିଲିଙ୍କ ଅଭିଯୋଗ ଥିଲା, ନଭେମ୍ବର ୨୯ରେ ଜନଶୁଣାଣି କାର୍ଯ୍ୟକ୍ରମ ପରେ ସେ ନିଜ କକ୍ଷରେ ବସିଥିଲେ। ବିଡିଓ ତାଙ୍କ କକ୍ଷକୁ ଅଚାନକ ଆସିଥିଲେ। ବ୍ଲକ ଉପାଧ୍ୟକ୍ଷ ଏବଂ ଅନ୍ୟ ମାନ୍ୟଗଣ୍ୟ ବ୍ୟକ୍ତିଙ୍କ ସହ ଆଲୋଚନା କରିବା ସମୟରେ ବିଡିଓ ତାଙ୍କ ନିକଟକୁ ଅଶିକ୍ଷିତ ଆଦିବାସୀ ମହିଳା, ତୁମର ବୁଦ୍ଧିଜ୍ଞାନ ନାହିଁ ବୋଲି କହି ଦୁର୍ବ୍ୟବହାର କରିଥିଲେ। ଏମିତିକି ବ୍ୟବହାର ଶିଖିନାହଁ, ଟଙ୍କା ଦେଇ ଭୋଟ କିଣିଛ ବୋଲି କହି ବିଡିଓ ଅପମାନ କରିଥିବା ଏବଂ ଯେମିତି କୁହାଯାଉଛି ଶୁଣ କହି ଅପମାନ କରିଥିବା ଏବଂ ଜୀବନ ପ୍ରତି ଭୟ ଥିବା ନେଇ ବ୍ଲକ ଅଧ୍ୟକ୍ଷା ହାଇକୋର୍ଟରେ ମାମଲା ଦାୟର କରିଥିବା ପିଟିସନରେ ଉଲ୍ଲେଖ ରହିଥିଲା।