ନୂଆଦିଲ୍ଲୀ,୯ ।୧୧: ଆର୍ଯ୍ୟନ ଖାଁ ଡ୍ରଗ୍ସ ମାମଲାକୁ ନେଇ ମହାରାଷ୍ଟ୍ର ମନ୍ତ୍ରୀ ନୱାବ ମଲିକ ଲଗାତାର ଏନ୍ସିବିର ଜୋନାଲ ଡାଇରେକ୍ଟର ସମିର ୱାନଖେଡେଙ୍କ ଉପରେ ନୂଆ ନୂଆ ଅଭିଯୋଗ ଆଣୁଛନ୍ତି । ଏବେ ୱାଖେଡେ ପରିବାର ନୱାବଙ୍କ ଉପରେ ଏସ୍ସି /ଏସ୍ଟି ଆକ୍ଟ ଅଧିନରେ ଅଭିଯୋଗ କରିଛନ୍ତି । ସୂଚନାଯୋଗ୍ୟ, ଏହା ପୂର୍ବରୁ ୱାନଖେଡେ ପରିବାର ଏନ୍ସିପି ନେତା ନୱାବ ମଲିକଙ୍କ ଉପରେ ମୁମ୍ବାଇ ହାଇକୋର୍ଟରେ ୧୦୦ କୋଟିର ମାନହାନୀ ମାମଲା ଦାୟର କରିଛନ୍ତି । ଏହା ଉପରେ ସେ ମଙ୍ଗଳବାର ଜବାବ ଦାଖଲ କରିବେ । ଗଣମାଧ୍ୟମ ସୂଚନା ଅନୁଯାୟୀ, ଏନ୍ସିବି ଅଧିକାରୀ ସମିର ୱାନଖେଡେଙ୍କ ପିତା ଧ୍ୟାନଦେବ ୱାନଖେଡେ ଓଶିବାରର ଆସିଷ୍ଟ କମିଶନର ଅଫ୍ ପୋଲିସ ବା ସହାୟକ ପୋଲିସ ଆୟୁକ୍ତଙ୍କ ନିକଟରେ ମହାରାଷ୍ଟ୍ରର ମନ୍ତ୍ରୀ ନୱାବ ମଲିକଙ୍କ ବିରୋଧରେ ଅନୁସୂଚିତ ଜାତି/ଅନୁସୂଚିତ ଜନଜାତି(ଅତ୍ୟାଚାର ନିବାର) ଅଧିନିୟମ ଆଧାରରେ ପରିବାରର ଜାତିକୁ ନେଇ ମିଛ ଅଭିଯୋଗ ଆଣିଥିବା ନେଇ ଅଭିଯୋଗ କରିଛନ୍ତି । ୱାନଖେଡେ ପରିବାର ଦାବି କରିଛନ୍ତି ସେ ନୱାବଙ୍କ ବିରୋଧରେ ଏଫ୍ଆଇଆର୍ ଦିଆଯାଉ ।