ନୂଆଦିଲ୍ଲୀ,୨୩।୧୧: ଦେଶର ପ୍ରମୁଖ ନବସୃଜନଭିତ୍ତିକ ଷ୍ଟାର୍ଟଅପ୍ ଇନ୍କୁବେଟର ଆଇ-କ୍ରିଏଟ୍ ସହ ୱାର୍ଡୱିଜାର୍ଡ ଇନୋଭେସନ୍ସ ଆଣ୍ଡ ମୋବିଲିଟି ଲିମିଟେଡ୍ ମଧ୍ୟରେ ଏକ ଦ୍ୱିପାକ୍ଷିକ ରାଜିନାମା ସମ୍ପର୍କରେ ଘୋଷଣା କରାଯାଇଛି। ବିଶେଷକରି ଆଇ-କ୍ରିଏଟ୍ ସହଯୋଗିତାରେ ୱାର୍ଡୱିଜାର୍ଡ ଦେଶର ଇଭି ଷ୍ଟାର୍ଟଅପ୍ଗୁଡ଼ିକୁ ମେଟରିଂ ଓ ଫଣ୍ଡିଂ ସହାୟତା ପ୍ରଦାନ କରିବ। ସେହିଭଳି ଅହମ୍ମଦାବାଦଠାରେ ଥିବା ଆଇ-କ୍ରିଏଟ୍ କ୍ୟାମ୍ପସ୍ରେ ଉଦ୍ୟୋଗୀମାନଙ୍କୁ ୱାର୍ଡୱିଜାର୍ଡ ପକ୍ଷରୁ ପ୍ରତ୍ୟକ୍ଷ ମେଟରିଂ ପ୍ରଦାନ କରାଯିବ। ସେହିପରି ଦେଶର ଷ୍ଟାର୍ଟଅପ୍ ପରିବ୍ୟବସ୍ଥାକୁ ସୁଦୃଢ଼ କରିବା ଏବଂ ଭାରତକୁ ଏକ ନିଯୁକ୍ତି ସୃଷ୍ଟିକାରୀ ରାଷ୍ଟ୍ରରେ ପରିଣତ କରିବା ଲାଗି ଭାରତ ସରକାରଙ୍କ ଷ୍ଟାର୍ଟଅପ୍ ଇଣ୍ଡିଆ କାର୍ଯ୍ୟକ୍ରମରେ ରହିଥିବା ଲକ୍ଷ୍ୟ ଅନୁସାରେ ୱାର୍ଡୱିଜାର୍ଡ ଏବଂ ଆଇ-କ୍ରିଏଟ୍ ମଧ୍ୟରେ ସହଯୋଗିତା ସ୍ଥାପନ ହୋଇଛି।
ଏ ସମ୍ପର୍କରେ ୱାର୍ଡୱିଜାର୍ଡ ଇନୋଭେସନ୍ସ ଆଣ୍ଡ୍ ମୋବିଲିଟିର ଅଧ୍ୟକ୍ଷ ଓ ପରିଚାଳନା ନିର୍ଦ୍ଦେଶକ ୟତିନ୍ ଗୁପ୍ତେ କହିଛନ୍ତି, ଆଇ-କ୍ରିଏଟ୍ ସହ ସହଯୋଗିତା ସ୍ଥାପନକରି ଆମେ ବେଶ୍ ଆନନ୍ଦିତ ଅଛୁ। ଏହି ସହଯୋଗିତା ଜରିଆରେ ଆମେ ପ୍ରତିଶ୍ରୁତିଭରା ଷ୍ଟାର୍ଟଅପ୍ଗୁଡ଼ିକ ସହ ଚିନ୍ତାଧାରାର ଆଦାନପ୍ରଦାନକୁ ସୁଦୃଢ଼ କରିବା ଏବଂ ଇଭି ଶିଳ୍ପକୁ ଭଲ ଭାବେ ବୁଝିବା ଲାଗି ସେମାନଙ୍କୁ ଆମର ବଜାର ଜ୍ଞାନ ଏବଂ ଅନୁଭବ ପ୍ରଦାନ କରିବାରେ ସହାୟକ ହେବାକୁ ଚାହୁଁଛୁ। ସେହିଭଳି ଆଇ-କ୍ରିଏଟ୍ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅବିନାଶ ପୁନେକର କହିଛନ୍ତି, ଭାରତର ଇଭି କ୍ଷେତ୍ରରେ ଉଲ୍ଲେଖନୀୟ ନବସୃଜନକାରୀଙ୍କୁ ଚିହ୍ନଟ କରିବା ଏବଂ ବାସ୍ତବ ଦୁନିଆର ଶିଳ୍ପ ସମସ୍ୟାର ସମାଧାନ ଲାଗି ସେମାନଙ୍କୁ ବ୍ୟାପକ କରିବାକୁ ୱାର୍ଡୱିଜାର୍ଡରେ ଆମେ ଲକ୍ଷ୍ୟ ରଖିଛୁ।