ନୂଆଦିଲ୍ଲୀ,୨୩।୨: ପଞ୍ଜାବର ‘ୱାରିସ ପଞ୍ଜାବ ଦେ’ ସଂଗଠନର ମୁଖ୍ୟ ଖାଲିସ୍ତାନ ସମର୍ଥକ ଅମୃତପାଲ ସିଂଙ୍କ ସମର୍ଥକମାନେ ଗୁରୁବାର ପ୍ରବଳ ହଙ୍ଗାମା କରିଛନ୍ତି। ଅମୃତପାଲଙ୍କ ସହକର୍ମୀ ଲଭପ୍ରୀତ ତୁୁଫାନଙ୍କ ଗିରଫଦାରୀକୁ ବିରୋଧ କରି ତାଙ୍କ ସମର୍ଥକମାନେ ଅଜନାଲା ପୋଲିସ ଷ୍ଟେସନ ବାହାରେ ବିରୋଧ ପ୍ରଦର୍ଶନ କରିବାରୁ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା। ଏଥିସହ ପୋଲିସ କର୍ମଚାରୀଙ୍କୁ ମାଡ଼ ମାରିବା ସହ ସରକାରୀ ଗାଡ଼ିକୁ ଭଙ୍ଗାରୁଜା କରିଥିଲେ। ଭିଡ଼କୁ ନିୟନ୍ତ୍ରିତ କରିବା ଲାଗି ପୋଲିସ ସମସ୍ତ ରାସ୍ତାକୁ ବନ୍ଦ କରିଦେଇଥିଲେ। କିନ୍ତୁ ସମର୍ଥକମାନେ ସେଠାରେ ମଧ୍ୟ ଆକ୍ରମଣ କରିଥିଲେ। ଏହି ସମୟରେ ୬ଜଣ ପୋଲିସ ଗୁରୁତର ଭାବେ ଆହତ ହୋଇଛନ୍ତି, ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଇତିମଧ୍ୟରେ ଅମୃତପାଲ ସିଂ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କୁ ଖୁଲମଖୁଲା ଧମକ ଦେଇଛନ୍ତି। ଇନ୍ଦିରା ଗାନ୍ଧୀଙ୍କ ଭଳି ଶାହାଙ୍କୁ ମଧ୍ୟ ହତ୍ୟା କରାଯିବ ବୋଲି ସେ ଖୋଲାଖୋଲି ଧମକ ଦେଇଛନ୍ତି। ସୂଚନା ମୁତାବକ, ଅମିତ ଶାହା କହିଥିଲେ ଯେ, ସେ ଖାଲିସ୍ତାନ ଆନ୍ଦୋଳନକୁ ଆଗକୁ ବଢ଼ିବାକୁ ଦେବେ ନାହିଁ। ଇନ୍ଦିରା ଗାନ୍ଧୀ ମଧ୍ୟ ଏଭଳି କହିଥିଲେ। ତେବେ ଏହାର ପରିଣାମ ସମସ୍ତେ ଜାଣିଛନ୍ତି। ଯଦି ଶାହା ବି ଏଭଳି କରିବାକୁ ଚେଷ୍ଟା କରନ୍ତି, ତେବେ ତାଙ୍କୁ ମଧ୍ୟ ଇନ୍ଦିରାଙ୍କ ଭଳି ପରିଣାମର ସାମ୍ନା କରିବାକୁ ପଡିବ ବୋଲି ଅମୃତପାଲ କହିଛନ୍ତି। ଯଦି ହିନ୍ଦୁ ରାଷ୍ଟ୍ରର ଦାବି କରୁଥିବା ବ୍ୟକ୍ତିଙ୍କ ପାଇଁ ଶାହା ସମାନ କଥା କୁହନ୍ତି, ତେବେ ମୁଁ ବି ଦେଖିବି ସେ ସ୍ବରାଷ୍ଟ୍ରମନ୍ତ୍ରୀ ପଦରେ କିଭଳି ରହିପାରୁଛନ୍ତି। ଏତଦ୍ ବ୍ୟତୀତ ସେ କହିଛନ୍ତି, ଯେତେବେଳେ ଲୋକମାନେ ହିନ୍ଦୁ ରାଷ୍ଟ୍ରର ଦାବି କରିପାରିବେ ତେବେ ଆମେ ଖାଲିସ୍ତାନର ଦାବି କାହିଁକି କରିପାରିବୁ ନାହିଁ। ଖାଲିସ୍ତାନକୁ ବିରୋଧ କରି ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଏହାର ପରିଣାମ ଭୋଗିସାରିଛନ୍ତି। ତେବେ ପ୍ରଧାନମନ୍ତ୍ରୀ ମୋଦି, ଅମିତ ଶାହା କିମ୍ବା ଭଗଓ୍ବନ୍ତ ମାନ ହୁଅନ୍ତୁ ନା କାହିଁକି ଆମକୁ କେହି ଅଟକାଇ ପାରିବେ ନାହିଁ ବୋଲି ଅମୃତପାଲ କହିଛନ୍ତି।