ମେଲବୋର୍ନ, ୨୪।୧୨(ପି.ଟି.)- ତାରକା ଓପନର ଡେଭିଡ ଓ୍ବାର୍ନର ଏବଂ ପେସର ସିଅନ ଆବୋଟ ଶନିବାରଠାରୁ ଆରମ୍ଭ ହେବାକୁ ଯାଉଥିବା ଭାରତ ବିପକ୍ଷ ଦ୍ୱିତୀୟ କ୍ରିକେଟ ଟେଷ୍ଟରେ ଖେଳିବେ ନାହିଁ। ଆହତ ସମସ୍ୟା ଏବଂ କୋଭିଡ-୧୯ ପ୍ରୋଟୋକଲ ଦୃଷ୍ଟିରୁ ଏହି ଦୁଇଖେଳାଳି ଆଗାମୀ ମ୍ୟାଚ ମିସ୍ କରିବେ। ଉଭୟ ଖେଳାଳି ଆହତ ହେବାପରେ ଚିକିତ୍ସିତ ହେବାପାଇଁ ଜୈବ ସୁରକ୍ଷିତ ପରିବେଶରୁ ବାହାରେ ରହିଥିଲେ। ଓ୍ବାର୍ନର ବର୍ତ୍ତମାନସୁଦ୍ଧା ଗ୍ରୋଇନ୍ ଇଞ୍ଜୁରିରୁ ସମ୍ପୂର୍ଣ୍ଣ ମୁକୁଳି ନ ଥିବାବେଳେ ଆବୋଟ ସୁସ୍ଥ ହୋଇଛନ୍ତି। ୪ ମ୍ୟାଚ ବିଶିଷ୍ଟ ଟେଷ୍ଟ ସିରିଜରେ ଅଷ୍ଟ୍ରେଲିଆ ପ୍ରଥମ ମ୍ୟାଚ ଜିତି ୧-୦ରେ ଅଗ୍ରଣୀଲାଭ କରିଛି। ତୃତୀୟ ଟେଷ୍ଟ ବେଳକୁ ଏହି ଦୁଇ ଖେଳାଳି ଦଳରେ ସାମିଲ ହେବେ ବୋଲି କ୍ରିକେଟ ଅଷ୍ଟ୍ରେଲିଆ ପକ୍ଷରୁ ପ୍ରକାଶ କରାଯାଇଛି। ଜାନୁୟାରୀ ୭ରୁ ତୃତୀୟ ଟେଷ୍ଟ ଆରମ୍ଭ ହେବ।