ସିଡନୀ,୩୧।୧: ଅଷ୍ଟ୍ରେଲିଆ ଓପନର୍ ଡେଭିଡ୍ ଓ୍ବାର୍ନରଙ୍କ ଝିଅ ଇଣ୍ଡି ଭାରତୀୟ ଅଧୀନାୟକଙ୍କ ବଡ଼ ପ୍ରଶଂସକ। ଏହାକୁ ନେଇ ତାଙ୍କୁ ବିରାଟଙ୍କଠାରୁ ଏକ ଖାସ ଉପହାର ମିଳିଛି। ସେ ବି ବିରାଟଙ୍କ ଅଟୋଗ୍ରାଫ ଥିବା ଜର୍ସି। ଓ୍ବାର୍ନର ନିଜର ସୋସିଆଲ ମିଡିଆରେ ଝିଅଙ୍କ ଫଟୋ ଶେୟାର କରି ଏହା ଜଣାଇଛନ୍ତି। ଫଟୋରେ ଇଣ୍ଡି ବିରାଟ ଦେଇଥିବା ଜର୍ସି ପିନ୍ଧିଥିବା ନଜର ଆସୁଛି।
ଇନ୍ଷ୍ଟାଗ୍ରାମ୍ ପୋଷ୍ଟରେ ଓ୍ବାର୍ନର ଲେଖିଛନ୍ତି, ମୁଁ ଜାଣେ ଆମେ ସିରିଜ୍ ହାରି ଯାଇଛି। ହେଲେ ଆମ ସମ୍ମୁଖରେ ଗୋଟିଏ ଝିଅ ବେଶ ଖୁସି ଅଛି। ବିରାଟ ଆପଣଙ୍କୁ ଖେଳୁଥିବା ଜର୍ସି ପାଇଁ ଧନ୍ୟବାଦ। ଇଣ୍ଡିକୁ ଏହା ବହୁତ ପସନ୍ଦ ଆସିଲା। ବାପା, ଆରୋନ୍ ଫିଞ୍ଚଙ୍କ ଛଡ଼ା କୋହଲିଙ୍କୁ ବହୁତ ପସନ୍ଦ କରନ୍ତି ଇଣ୍ଡି। ସେ ତାଙ୍କ ଭଳି ହେବାକୁ ଚାହୁଁଛନ୍ତି। ତେବେ ଓ୍ବାର୍ନରଙ୍କ ଏହି ଫଟୋ ଏବେ ବେଶ୍ ଭାଇରାଲ ହେଉଛି।