ନୂଆଦିଲ୍ଲୀ,୪।୩ : ବିଶ୍ୱ ପାଣିପାଗ ସଂଗଠନ (ଡବ୍ଲୁଏମଓ) ଚେତାବନୀ ଦେଇଛି ଯେ ଏକ କିମ୍ବା ଦୁଇ ମାସ ମଧ୍ୟରେ ଏଲ ନିନୋ ସକ୍ରିୟ ହେବା ସହିତ ସମଗ୍ର ବିଶ୍ୱରେ ତାତି ବୃଦ୍ଧି ପାଇବ। ବିଶେଷକରି ଭାରତ ଭଳି ଦେଶରେ ତାତି ଏକ ଭୟଙ୍କର ରୂପ ନେବ। ଡବ୍ଲୁଏମଓ ସେକ୍ରେଟେରୀ ଜେନେରାଲ ପେଟେରି ତାଲସ କହିଛନ୍ତି ଯେ ବିଶ୍ୱ ଖୁବ ଶୀଘ୍ର ଏଲ ନିନୋ ଦ୍ୱାରା କବଳିତ ହେବ। ଫଳରେ ପ୍ରବଳ ତାତି ଯୋଗୁ ପୃଥିବୀରେ ହାହାକାର ସୃଷ୍ଟି ହେବାର ଆଶଙ୍କା ରହିଛି। ଏନେଇ ଡବ୍ଲୁଏମଓ ପକ୍ଷରୁ ଚେତାବନୀ ଜାରି କରାଯାଇଛି।
ତାଲସ କହିଛନ୍ତି ଯେ ଗତ ଆଠ ବର୍ଷ ଧରି ଚାଲିଆସୁଥିବା ଟ୍ରିପଲ ଡିପ ଲା ନିନା ଶେଷ ହେବାକୁ ଯାଉଛି, ଯେଉଁ କାରଣରୁ ବିଶ୍ୱ ତାପମାତ୍ରା ବୃଦ୍ଧିରେ ଏକ ଅସ୍ଥାୟୀ ବ୍ରେକ ରହିଥିଲା। ବର୍ତ୍ତମାନର ଲା-ନିନା ସେପ୍ଟେମ୍ବର ୨୦୨୦ଠାରୁ ରହିଆସିଛି।
ଡବ୍ଲୁଏମଓ କହିଛି ଯେ ଚଳିତ ବର୍ଷ ମାର୍ଚ୍ଚରୁ ମେ ମଧ୍ୟରେ ଏଲ-ନିନୋ ଯୋଗୁ ସାଉଥ ଓସିଲିଏସନର ଅବସ୍ଥା ସୃଷ୍ଟି ହେବ। ଏହାପୂର୍ବରୁ ୨୦୧୬ରେ, ଏଲ-ନିନୋ ସ୍ଥିତି ସୃଷ୍ଟି ହୋଇଥିଲା ଏବଂ ଏହା ସବୁଠୁ ଉତ୍ତପ୍ତ ବର୍ଷ ହୋଇଥିଲା। କିନ୍ତୁ, ବର୍ତ୍ତମାନ ୨୦୧୬ର ରେକର୍ଡ ଭାଙ୍ଗିପାରେ। ବିଶେଷକରି ଜଳବାୟୁ ପରିବର୍ତ୍ତନ ହେତୁ ବିଶ୍ୱର ତାପମାତ୍ରା ବୃଦ୍ଧି ପାଇବାରେ ଲାଗିଛି।
ଏଲ-ନିନୋ ଏବଂ ଲା-ନିନା ହେଉଛି ପ୍ରାକୃତିକ ଘଟଣା, ଯାହା ବିଶ୍ୱ ଜଳବାୟୁ ପ୍ରଣାଳୀର ଏକ ପ୍ରାକୃତିକ ଅଂଶ । ପ୍ରଶାନ୍ତ ମହାସାଗରର ସାଧାରଣ ଅବସ୍ଥାରେ ଏବଂ ଏହା ଉପରେ ଥିବା ବାୟୁମଣ୍ଡଳରେ ପରିବର୍ତ୍ତନ ଆସିବାବେଳେ ଏହି ଘଟଣା ଘଟେ। କେନ୍ଦ୍ରୀୟ ଏବଂ ପୂର୍ବ ପ୍ରଶାନ୍ତ ମହାସାଗରର ଭୂପୃଷ୍ଠର ତାପମାତ୍ରା ଟ୍ରପିକାଲ ଅଞ୍ଚଳରେ ସ୍ବାଭାବିକଠାରୁ ୪ରୁ ୫ ଡିଗ୍ରୀ ସେଲସିୟସ ଅଧିକ ହେଲେ ଏଲ ନିନୋ ଅବସ୍ଥା ସୃଷ୍ଟି ହୁଏ । ଯେତେବେଳେ କି, ଏକ ଲା ନିନାରେ, ଶକ୍ତିଶାଳୀ ବାଣିଜ୍ୟ ପବନ ଆମେରିକାର ପଶ୍ଚିମ ଉପକୂଳରୁ ଉଷ୍ମ ଜଳକୁ ଏସିଆ ଆଡକୁ ଠେଲିଦିଏ, ଯାହାଦ୍ୱାରା ଶୀତଳ ସମୁଦ୍ର ଜଳ ଯୋଗୁ ବିଶ୍ୱ ତାପମାତ୍ରା ହ୍ରାସ ପାଇଥାଏ।