ଶିମଲା,୨୮।୨: କେନ୍ଦ୍ରୀୟ ଯୋଜନାର ଟଙ୍କା ଖର୍ଚ୍ଚ କରିବା ମାମଲାରେ କେନ୍ଦ୍ର ସରକାର ରାଜ୍ୟର ସୁଖୁ ସରକାରଙ୍କୁ ଚେତାବନୀ ଦେଇଛନ୍ତି। ଏହି ଚେତାବନୀ କେନ୍ଦ୍ରୀୟ ଅନୁଦାନପ୍ରାପ୍ତ ଯୋଜନାଗୁଡିକର ଅର୍ଥ ପ୍ରଦାନ କ୍ଷେତ୍ରରେ ଦିଆଯାଇଛି। ଅର୍ଥ ମନ୍ତ୍ରଣାଳୟର ବ୍ୟୟ ବିଭାଗର ନିର୍ଦ୍ଦେଶକ ପ୍ରତୀକ କୁମାର ସିଂ ମୁଖ୍ୟ ଶାସନ ସଚିବ ପ୍ରବୋଧ ସାକ୍ସେନା ଏବଂ ଅର୍ଥ ସଚିବଙ୍କୁ ଚିଠି ଲେଖିଛନ୍ତି। ଏଥିରେ ଚେତାବନୀ ଦିଆଯାଇଛି ଯେ, କେନ୍ଦ୍ରୀୟ ଯୋଜନା ପାଇଁ କେନ୍ଦ୍ରରୁ ଆସୁଥିବା ବଜେଟ ଏବଂ ଏହାର ରାଜ୍ୟ ଅଂଶ ନିର୍ଦ୍ଧାରିତ ସମୟ ୩୦ଦିନ ମଧ୍ୟରେ ସିଙ୍ଗଲ୍ ନୋଡାଲ ଏଜେନ୍ସି (ଏସ୍ଏନ୍ଏ) ଆକାଉଣ୍ଟରେ ଜମା କରାଯିବା ଉଚିତ୍। ଯାହାକୁ ସମୟ ସୀମା ମଧ୍ୟରେ ଖର୍ଚ୍ଚ କରାଯାଇପାରିବ। ଯଦି ଠିକ୍ ସମୟରେ ଏହା କରା ନ ଯାଏ ତେବେ ବାର୍ଷିକ ୭ପ୍ରତିଶତ ହାରରେ ଜରିମାନା ସୁଧ ଦେବାକୁ ପଡିବ। ଏହି ନୂତନ ବ୍ୟବସ୍ଥା ଆସନ୍ତା ଏପ୍ରିଲ ୨୦୨୩ରୁ ଲାଗୁ ହେବ। ଏହାପୂର୍ବରୁ ସଙ୍ଗଲ୍ ନୋଡାଲ ଏଜେନ୍ସିର ଆକାଉଣ୍ଟରେ କେନ୍ଦ୍ରରୁ ଟଙ୍କା ଜମା କରିବାର ଅବଧି ୨୧ ଦିନ ରହିଥିବା ବେଳେ ରାଜ୍ୟ ବଜେଟର ଅବଧି ୪୦ଦିନ ରହିଥିଲା। ବର୍ତ୍ତମାନ କେନ୍ଦ୍ର ସରକାରଙ୍କ ପକ୍ଷରୁ ପ୍ରାପ୍ତ ବଜେଟ ଦାଖଲ କରିବାର ସମୟ ୩୦ଦିନକୁ ହ୍ରାସ କରାଯାଇଛି। ସୂଚନାଯୋଗ୍ୟ, ହିମାଚଳ ପ୍ରଦେଶ ସମେତ ଅନେକ ରାଜ୍ୟରେ ରିପୋର୍ଟ କରାଯାଇଛି ଯେ, କେନ୍ଦ୍ରୀୟ ଅନୁଦାନ ପ୍ରାପ୍ତ ଯୋଜନା ପାଇଁ ବଜେଟ ସମୟ ସୀମା ମଧ୍ୟରେ ଖର୍ଚ୍ଚ ହେଉନାହିଁ। ଏଭଳି ପରିସ୍ଥିତିରେ ରାଜ୍ୟର ମୁଖ୍ୟ ସଚିବମାନଙ୍କୁ ଏହି ନୂତନ ବ୍ୟବସ୍ଥା ବିଷୟରେ ଚେତାବନୀ ଦିଆଯାଇଛି। ଯଦି ବଜେଟ ସିଙ୍ଗଲ ନୋଡାଲ ଏଜେନ୍ସିର ଆକାଉଣ୍ଟରେ ଠିକ୍ ସମୟରେ ଜମା ନ ହୁଏ, ତେବେ ଏହାକୁ ଭାରତ ସରକାରଙ୍କ ଏକତ୍ରିତ ପାଣ୍ଠିରେ ଜମା କରିବାକୁ ପଡିବ।