ଏମ୍.ରାମପୁର,୨ା୮: କଳାହାଣ୍ଡି ଜିଲା ମ.ରାମପୁରଠାରେ ୧୯୫ମିଲିମିଟର ବର୍ଷା ହୋଇଛି। ଯାହାକି କଳାହାଣ୍ଡିରେ ସର୍ବାଧିକ ରେକର୍ଡ କରାଯାଇଛି। ଏହି ବର୍ଷା ଯୋଗୁ ମ.ରାମପୁର ଅଞ୍ଚଳରେ ରାସ୍ତାଘାଟ, କଲଭର୍ଟ, ଚାଷଜମି, ବାସଗୃହ ପ୍ରମୁଖ କ୍ଷତିସାଧନ କରିଛି। ମ. ରାମପୁର ସହରସ୍ଥିତ ନୋଡାଲ ୟୁପି ସ୍କୁଲରେ ପାଣି ଜମି ରହିଛି। ସହରଠାରୁ ୩୦କିମି ଦୂର ମୋହନଗିରି ନିକଟସ୍ଥ ଟେକରଘାଟ କଳିଗଙ୍ଗା ପୋଲ ଆପ୍ରୋଚ ରାସ୍ତା ଖାଇଯାଇଛି। ଏଥି ଯୋଗୁ ପଣ୍ଡାପଦର୍, ସରାବେଡ଼ା, ସୀମାନ୍ତ ପଡୋଶୀ ବୌଦ୍ଧ, ସୁବର୍ଣ୍ଣପୁର, କନ୍ଧମାଳ ଆଦି ଜିଲାକୁ ଗମନାଗମନ ବାଧାପ୍ରାପ୍ତ ହେଇଛି। ମୋହନଗିରି ଅପରପାର୍ଶ୍ୱରେ ଥିବା ଯୁକ୍ତ ତିନି ମହାବିଦ୍ୟାଳୟକୁ ଯୋଗାଯୋଗ ବିଚ୍ଛିନ୍ନ ହୋଇଛି। ସହରଠାରୁ ୧୫କିମି ଦୂରବର୍ତ୍ତୀ ଉର୍ଲାଦାନିସ୍ଥିତ ନୂଆମୁଣ୍ଡା ନଦୀ ପୋଲ ପାର୍ଶ୍ୱ ନଷ୍ଟ ହେତୁ ଗମନାଗମନ ଠପ୍ ହୋଇପଡ଼ିଛି। ଜକବହାଲି ରାସ୍ତା, କୁସୁମପଡ଼ା ରାସ୍ତା ଶୋଚନୀୟ ହୋଇପଡିଛି। ଏହି ବର୍ଷା ପରେ ଶତାଧିକ ଝାଟିମାଟି ଘର ଆଂଶିକ ଭାଙ୍ଗିଯାଇଛି।
