ବ୍ରିସବେନ୍,୧୭।୧: ଅଷ୍ଟ୍ରେଲିଆ ବିପକ୍ଷରେ ଏଠାରେ ଚାଲୁଥିବା ନିର୍ଣ୍ଣାୟକ ଟେଷ୍ଟ ମ୍ୟାଚ୍ରେ ଭାରତୀୟ ଦଳ ଦୃଢ଼ ପ୍ରତ୍ୟାବର୍ତ୍ତନ କରିଛି। ପ୍ରଥମ ପାଳିରେ ଘରୋଇ ଟିମ୍ ୩୬୯ରନ୍ କରିଥିବା ବେଳେ ଭାରତ ୩୩୬ରନ୍ରେ ଅଲ୍ଆଉଟ୍ ହୋଇଛି। ହେଲେ ଖେଳକୁ ଦେଖିଲେ ୧୮୬ ରନ୍ରେ ଭାରତୀୟ ଦଳ ୬ ଉଇକେଟ୍ ହରାଇଥିଲା। ଏଣୁ ଘରୋଇ ଟିମ୍ ଅଧିକ ରନ୍ରେ ଆଗୁଆ ରହିବ ବୋଲି କୁହାଯାଉଥିଲା। ମାତ୍ର ଏହି ଆଶଙ୍କାକୁ ଭୁଲ ପ୍ରମାଣିତ କରିଛନ୍ତି ଭାରତୀୟ ଦଳର ଦୁଇ ଯୁବ ଖେଳାଳି। ନିଜର ପ୍ରଥମ ଟେଷ୍ଟ ଖେଳୁଥିବା ଓ୍ବାଶିଂଟନ ସୁନ୍ଦର ଏବଂ ଶାର୍ଦ୍ଦୁଳ ଠାକୁରଙ୍କ ସହ ମିଶି ଶତକୀୟ ପାଳି ଖେଳିଛନ୍ତି। ଫଳରେ ବାଜି ପାଲଟିଯାଇଛି। ଉଭୟ ୧୨୩ରନ୍ର ଭାଗିଦାରୀ ଯୋଗୁ ୩୦ ବର୍ଷ ପୁରୁଣା ରେକର୍ଡ ମଧ୍ୟ ଭାଙ୍ଗିଛି।
ଓ୍ବାଶିଂଟନ-ଶାର୍ଦ୍ଦୁଳ ସପ୍ତମ ଉଇକେଟ ପାଇଁ ସବୁଠାରୁ ବଡ଼ ଭାଗିଦାରୀ କରିବାର ଭାରତୀୟ ରେକର୍ଡ କରିଛନ୍ତି। ଉଭୟଙ୍କ ପୂର୍ବରୁ କପିଲ ଦେବ ଏବଂ ମନୋଜ ପ୍ରଭାକର ସପ୍ତମ ଉଇକେଟ ପାଇଁ ୫୮ ରନ୍ କରିପାରିଥିଲେ।
ଦଳୀୟ ସ୍କୋର ୧୮୬/୬ ଥିବା ବେଳେ ଶାର୍ଦ୍ଦୁଳଙ୍କ ସହ ପଡ଼ିଆରେ ଥିଲେ ଓ୍ବାଶିଂଟନ। ଉଭୟଙ୍କ ଚମତ୍କାର ବ୍ୟାଟିଂ ଯୋଗୁ ଦଳର ସ୍କୋର ୩୦୯ରେ ପହଞ୍ଚିଥିଲା। ପରେ ପ୍ୟାଟ୍ କମିନ୍ସ ଶାର୍ଦ୍ଦୁଳଙ୍କୁ ବୋଲ୍ଡ କରିବା ପରେ ଯୋଡ଼ି ଭାଙ୍ଗିଥିଲା। ତେବେ ସେତେବେଳକୁ ସେ ବ୍ୟକ୍ତିଗତ ଭାବେ ୧୧୫ ବଲ୍ ଖେଳି ୯ ଚଉକା ଏବଂ ୨ ଛକା ସହ ୬୭ ରନ୍ କରିସାରିଥିଲେ।
ଅପରପକ୍ଷେ ଓ୍ବାଶିଂଟନ୍ ୧୪୪ ବଲ୍ ଖେଳି ୬୨ ରନ୍ କରି ଆଉଟ୍ ହୋଇଥିଲେ। ଡେବ୍ୟୁ ଟେଷ୍ଟରେ ପ୍ରଥମ ପାଳିରେ ୩ ଉଇକେଟ ସହ ଅର୍ଦ୍ଧଶତକ କରିଥିବା ଦ୍ୱିତୀୟ ବୋଲର୍ ପାଲଟିଛନ୍ତି ସେ। ୧୯୪୭ରେ ଦତ୍ତୁ ଫାଡକରଙ୍କ ଏଭଳି କାରନାମା କରିଦେଖାଇଥିଲେ।