ଅହମ୍ମଦାବାଦ,୭।୩ : ଭାରତୀୟ ଦଳର ଅଲରାଉଣ୍ଡର ଓ୍ବାଶିଂଟନ ସୁନ୍ଦରଙ୍କ ନିକଟରେ ଯେଉଁଭଳି ଦକ୍ଷତା ରହିଛି, ସେଭଳି ଦକ୍ଷତା ମୁଁ ଖେଳିଲା ବେଳେ ନ ଥିଲା। ସୁନ୍ଦରଙ୍କୁ ଏଭଳି ପ୍ରଶଂସାରେ ପୋତି ପକାଇଛନ୍ତି ଭାରତୀୟ କ୍ରିକେଟ ଦଳର ମୁଖ୍ୟ କୋଚ୍ ରବି ଶାସ୍ତ୍ରୀ।
” ସୁନ୍ଦରଙ୍କ ନିକଟରେ ମୋ ଠାରୁ ଅଧିକ ଦକ୍ଷତା ରହିଛି। ମୁଁ ଭାବୁଛି, ସେ ତାଙ୍କ ରାଜ୍ୟ ପାଇଁ ଖେଳିଲାବେଳେ ଟପ୍-୪ରେ ବ୍ୟାଟିଂ କରିବା ଉଚିତ। ତାଙ୍କ ବ୍ୟାଟିଂ ଉପରେ କୌଣସି ସନ୍ଦେହ ନାହିଁ। ସେ ଯଦି ବୋଲିଂ ଉପରେ ଆହୁରି କାମ କରନ୍ତେ, ତେବେ ଟିମ୍ ଇଣ୍ଡିଆର ବ୍ୟାଟିଂ କ୍ରମରେ ୬ନଂ ପାଇଁ ଶ୍ରେଷ୍ଠ ବିକଳ୍ପ ହୋଇପାରନ୍ତେ। ନିମ୍ନକ୍ରମରେ ୬୦ରୁ ୭୦ ରନ୍ କରିବା ସହ ବୋଲିଂ କରିପାରୁଥିବା ଖେଳାଳି ଦଳକୁ ଦରକାର। ଦଳରେ ମୋ ଦାୟିତ୍ୱ ମଧ୍ୟ ସମାନ ଥିଲା। ମୁଁ ଭାବୁଛି, ସେ ସେହି ଭୂମିକାକୁ ମୋ ଠାରୁ ବେଶ୍ ଭଲ ସେ କରିପାରିବେ “ ବୋଲି ଶାସ୍ତ୍ରୀ କହିଛନ୍ତି।
ଇଂଲଣ୍ଡ ବିପକ୍ଷ ଅନ୍ତିମ ତଥା ଚତୁର୍ଥ ଟେଷ୍ଟ ମ୍ୟାଚ୍କୁ ଭାରତ ଏକ ଇନିଂସ ଓ ୨୫ ରନ୍ରେ ଜିତି ନେଇଛି। ଏହି ମ୍ୟାଚ୍ରେ ସୁନ୍ଦର ଅପରାଜିତ ୯୬ ରନ୍ର ଇନିଂସ ଖେଳି ବିଜୟରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।
