ହରାରେ,୧୧।୭: ଅନ୍ତର୍ଜାତୀୟ ଟି୨୦ରୁ ସନ୍ନ୍ୟାସ ନେଇଛନ୍ତି ରବିନ୍ଦ୍ର ଜାଡେଜା। ଏହାପରଠାରୁ ତାଙ୍କ ସ୍ଥାନ ଖାଲି ପଡ଼ିଥିବା ବେଳେ ଏବେ ଓ୍ବାଶିଂଟନ ସୁନ୍ଦର ବଡ଼ ବୟାନ ଦେଇଛନ୍ତି। ଜିମ୍ବାଓ୍ବେ ବିପକ୍ଷ ତୃତୀୟ ଟି୨୦ ମୁକାବିଲାରେ ଟିମ୍ ଇଣ୍ଡିଆ ବିଜୟର ପ୍ରମୁଖ ଭୂମିକା ତୁଲାଇବା ପରେ ସୁନ୍ଦରଙ୍କୁ ‘ମ୍ୟାନ୍ ଅଫ୍ ଦ ମ୍ୟାଚ୍’ ଚୟନ କରାଯାଇଥିଲା। ଏହାକୁ ନେଇ ସେ କହିଥିଲେ ଯେ ଟିମ୍ରେ ସ୍ପିନ ଅଲରାଉଣ୍ଡରଙ୍କ ସ୍ଥାନ ନେବାକୁ ହେଲେ ନିଜର ଶତ ପ୍ରତିଶତ ଦେବାର ଆବଶ୍ୟକତା ରହିଛି।
ଓ୍ବାଶିଂଟନ ସୁନ୍ଦର ଜିମ୍ବାଓ୍ବେ ବିପକ୍ଷରେ ଚାଲୁଥିବା ୫ ମ୍ୟାଚ୍ ବିଶିଷ୍ଟ ସିରିଜରେ ଏଯାବତ ଭଲ ପ୍ରଦର୍ଶନ କରି ନିଜକୁ ପ୍ରମାଣିତ କରୁଛନ୍ତି। ସେ କହିଛନ୍ତି ଯେ, ଯେଉଁଥିରେ ମୁଁ ଭଲ କରେ ଏବଂ ଯାହା ମୁଁ କରିପାରିବି ସେଥିରେ ମୋତେ ଭଲ ପ୍ରଦର୍ଶନ କରିବାର ଆବଶ୍ୟକତା ରହିଛି। ମୋତେ ପ୍ରତିଦିନ ନିଜର ଶତ ପ୍ରତିଶତ ଦେବାର ଆବଶ୍ୟକତା ରହିଛି। ଏଥିରେ କୌଣସି ସାଲିସ କରିନାହିଁ। ସଚ୍ଚୋଟ ଭାବେ କହିଲେ ଭଲ ଲାଗୁଛି। ପ୍ରତ୍ୟେକ ଥର ଯେବେ ବି ଦେଶ ପାଇଁ ଖେଳିଛି ଭଲ ଅନୁଭବ ହୋଇଛି। ଏହା ଭଲ ମ୍ୟାଚ୍ ଥିଲା। ପ୍ରଥମ ଦୁଇ ମ୍ୟାଚ୍ରେ ବୋଲିଂକୁ ବେଶ ସହାୟତା ମିଳିଥିଲା।
କହିରଖୁଛୁ ୨୪ ବର୍ଷୀୟ ସୁନ୍ଦର ୨୦୧ରେ ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିଲେ। ୭ ବର୍ଷର କ୍ୟାରିୟରରେ ଏଯାବତ ସେ ୪ ଟେଷ୍ଟ, ୧୯ ଦିନିକିଆ, ୪୬ ଅନ୍ତର୍ଜାତୀୟ ଟି୨୦ ମ୍ୟାଚ୍ ଖେଳିଛନ୍ତି। ହେଲେ ଏହି ଫର୍ମାଟରେ କ୍ରମଶଃ ୬,୧୮ ଏବଂ ୪୦ ଉଇକେଟ ନେଇଛନ୍ତି। ସେହିଭଳି ୩ ଫର୍ମାଟରେ ୨୬୫, ୨୬୫ ଏବଂ ୧୩୪ ରନ୍ କରିଛନ୍ତି। କହିବାକୁ ଗଲେ ତାଙ୍କର ପ୍ରଦର୍ଶନ ସନ୍ତୋଷଜନକ ନୁହେଁ। ଏମିତିରେ ତାଙ୍କୁ ବୋଲିଂ ସହ ବ୍ୟାଟିଂରେ ଭଲ ପ୍ରଦର୍ଶନ କରିବାକୁ ହେବ। ଫଳରେ ସେ ଜାଡେଜାଙ୍କ ଅସଲି ଉତ୍ତରାଧିକାରୀ ସାବ୍ୟସ୍ତ ହେବେ।