ରାଇଘର, ୨୩ା୧(ଡି.ଏନ୍.ଏ.) ନବରଙ୍ଗପୁର ଜିଲା ରାଇଘର ବ୍ଲକ ସଦର ମହକୁମାସ୍ଥିତ ଧଡ଼ରାପାରାରେ ଥିବା ଆମିଷ ବଜାର ଅବ୍ୟବସ୍ଥାରେ ପଡ଼ିରହିଛି। ଫଳରେ ଗ୍ରାହକ ନାନା ସମସ୍ୟାର ସମ୍ମୁଖୀନ ହେଉଥିବା ଅଭିଯୋଗ ହେଉଛି।
ରାଇଘର ବ୍ଲକ କାର୍ଯ୍ୟାଳୟ ପଛପଟେ ରହିଥିବା ଧଡ଼ରାପାରାରେ ଆମିଷ ବଜାର ରହିଛି। ପଞ୍ଚାୟତ ପକ୍ଷରୁ ମାତ୍ର ୮ଟି ଷ୍ଟଲ୍ ନିର୍ମାଣକରି ବେପାରୀଙ୍କୁ ଦିଆଯାଇଛି। ଏଠାରେ ଅନ୍ୟ ବେପାରୀମାନେ ଉଠାଦୋକାନୀଭାବେ ବ୍ୟବସାୟ କରୁଛନ୍ତି। ଅନ୍ୟପଟେ ଲକ୍ଷାଧିକ ଟଙ୍କା ବ୍ୟୟରେ ପିଣ୍ଡି ନିର୍ମାଣ କରାଯାଇଥିଲେ ମଧ୍ୟ ବ୍ୟବହାର ନ ହୋଇ ପଡ଼ିରହିଛି। ଆମିଷ ବଜାର ମଧ୍ୟରେ ଜଙ୍ଗଲ ହୋଇଗଲାଣି। ଏଥିସହ ଏହାର ପରିବେଶ ଦୁର୍ଗନ୍ଧମୟ ରହୁଛି। ଏହାକୁ ନେଇ ଗ୍ରାହକଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳୁଛି । ଗ୍ରାହକ ନାକ ବନ୍ଦ କରି ବଜାର ଭିତରକୁ ଯାଉଛନ୍ତି। ସାପ୍ତାହିକ ହାଟ ରବିବାର ଦିନ ଯେଉଁ ଭଳି ସ୍ଥିତି ସୃଷ୍ଟି ହେଉଛି ସାଧାରଣ ଜନତା ତାହାକୁ ନେଇ ନାନା ସମସ୍ୟା ଭୋଗୁଛନ୍ତି। ଅପରପକ୍ଷେ ପ୍ରଶାସନ ପକ୍ଷରୁ ବଣ୍ଟନ କରାଯାଇଥିବା ଷ୍ଟଲ୍ଗୁଡିକ ମଧ୍ୟ ବ୍ୟବହାର ନ ହୋଇ ଅଧିକାଂଶ ସମୟରେ ବନ୍ଦ ହୋଇ ରହିଛି। ଏହିଭଳି ଅବ୍ୟବସ୍ଥାରେ ଆମିଷ ବଜାର ଗତି କରୁଥିବା ବେଳେ ଗ୍ରାହକମାନେ ଅନ୍ୟ ସ୍ଥାନକୁ ଯିବାକୁ ବାଧ୍ୟ ହେଉଛନ୍ତି। କୁକୁଡ଼ା ପର, ମାଛ କାତି ଓ ଅନ୍ୟ ବର୍ଜ୍ୟବସ୍ତୁଗୁଡିକ ପାହାଡ଼ ଭଳି ଗଦାହୋଇ ଅସ୍ବାସ୍ଥ୍ୟକର ପରିବେଶ ସୃଷ୍ଟି ହେଉଛି। ପ୍ରଶାସନ ଏଥିପ୍ରତି ସ୍ବତନ୍ତ୍ର ଦୃଷ୍ଟିଦେବାକୁ ସାଧାରଣରେ ଦାବି ହେଉଛି।