ନୂଆଦିଲ୍ଲୀ,୬।୨: ଅନ୍ତଃରାଷ୍ଟ୍ରୀୟ ମାର୍କେଟ ରିସର୍ଚ୍ଚ ୟୁନିଟ୍ ହିଣ୍ଡନ୍ବର୍ଗର ରିପୋର୍ଟ ପ୍ରକାଶ ପରେ ଭାରତୀୟ ଶେୟାର ମାର୍କେଟରେ ଏକ ବଡ଼ ଧରଣର ପରିବର୍ତ୍ତନ ଦେଖାଦେଇଛି। ଏପରିକି ଗତ କିଛି ସପ୍ତାହ ହେବ ଶେୟାର ବଜାର କାରବାର ମଧ୍ୟ ସେହି ଅନୁଯାୟୀ ପରିବର୍ତ୍ତନ ହୋଇଚାଲିଛି। ବିଶେଷକରି ଆଦାନୀ ଗ୍ରୁପ୍ କମ୍ପାନୀଙ୍କ ଶେୟାରର ମୂଲ୍ୟ ବ୍ୟାପକ ପରିମାଣରେ ହ୍ରାସ ଘଟିଛି। ଉଲ୍ଲେଖଯୋଗ୍ୟ, ଆଦାନୀ ଗ୍ରୁପ୍ର ଶେୟାର ମୂଲ୍ୟ ୨୦୨୨ ଡିସେମ୍ବରରେ ପ୍ରାୟ ୪୨୦୦ (୪୧୯୦) ଟଙ୍କା ରହିଥିବାବେଳେ ଗତ ମାସକ ମଧ୍ୟରେ କମ୍ପାନୀର ବିଭିନ୍ନ ବ୍ରାଣ୍ଡ୍ର ଶେୟାର ମୂଲ୍ୟ ପ୍ରାୟ ୭୦% ହ୍ରାସ ଘଟିଛି। ଫଳରେ ଆଦାନୀ ଗ୍ରୁପ୍ର ଶେୟାର ପାଇଁ ହଜାର ହଜାର ନିବେଶକ ଓ ଅଂଶୀଦାର ଲକ୍ଷାଧିକ ଟଙ୍କାର ନିବେଶ ହରାଇବା ସହ ଆଶା ଓ ଆଶଙ୍କା ମଧ୍ୟରେ ରହିଛନ୍ତି। ସେହିଭଳି ଉକ୍ତ ରିର୍ପୋଟକୁ ନେଇ ଉଭୟ ଦେଶବାସୀ ଓ ବିରୋଧୀ ସରକାରଙ୍କୁ ସମାଲୋଚନା କରିବାକୁ ପଛାଉନାହାନ୍ତି। ଏପରିକି ନିକଟରେ ଅର୍ଥମନ୍ତ୍ରୀ ମଧ୍ୟ ଉକ୍ତ ଘଟଣା ବିଷୟରେ ସଂସଦରେ ବିରୋଧୀଙ୍କ ଜବାବରେ ପ୍ରତିକ୍ରିୟା ଦେଇଥିଲେ। ସେହିପରି ଭାରତୀୟ ପ୍ରତିଭୂତି ଓ ବିନିମୟ ବୋର୍ଡ (ସେବି) ମଧ୍ୟ ରବିବାର ଉକ୍ତ ଘଟଣା ସମ୍ପର୍କରେ ଗୁରୁତ୍ୱପୂର୍ଣ୍ଣ ବୟାନ ଦେଇଛନ୍ତି। ଏପରିକି ଶେୟାର ବଜାରକୁ ନିୟନ୍ତ୍ରଣ କରୁଥିବା ସେବି ମଧ୍ୟ ମାର୍କେଟ ସହ କୌଣସି ପ୍ରକାର ଖେଳ ହେବାକୁ ଦିଆଯିବନି ବୋଲି ସେବି ମତପ୍ରକାଶ କରିଛନ୍ତି।
ଏହା ସହ ବର୍ତ୍ତମାନର ପରିସ୍ଥିତି ଓ ବଜାର ଉପରେ ପୂରା ନଜର ରଖିବା ସହ ଆବଶ୍ୟକ ପ୍ରକରଣରେ ସମସ୍ତ ଜରୁରୀ ପଦକ୍ଷେପ ମଧ୍ୟ ନିଆଯାଉଥିବା ସେବି ପକ୍ଷରୁ କୁହାଯାଇଛି। ଅପରପକ୍ଷରେ ଗତ ସପ୍ତାହରୁ ଏକ ବ୍ୟବସାୟିକ ଗ୍ରୁପ୍ର ଶେୟାର ମୂଲ୍ୟରେ ଅସାଧାରଣ ହ୍ରାସ ଜାରି ରହିଛି। ବଜାର ସୂଚୀରୁ ଓ କୁଶଳ ଭାବେ କାର୍ଯ୍ୟ କରିବା ପାଇଁ କୌଣସି ଖାସ୍ ଶେୟାରରେ ହ୍ରାସ ବୃଦ୍ଧିର ମୁକାବିଲା ନିମନ୍ତେ ସବୁ ପ୍ରକାର ବ୍ୟବସ୍ଥା ମହଜୁଦ ଅଛି।
ଏପରିକି ଜରୁରୀ ମାମଲା ସାମ୍ନାକୁ ଆସିଲେ ସେବି ତା’ର ଯାଞ୍ଚ କରାଇଥାନ୍ତି। ଅପରପକ୍ଷରେ ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ମଧ୍ୟ ସମସ୍ତ ଘଟଣା ଉପରେ ତୀକ୍ଷ୍ନ ନଜର ରଖିବା ସହ ଆବଶ୍ୟକ ସମୟରେ ଉଚିତ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ଆର୍ବିଆଇ ପକ୍ଷରୁ କୁହାଯାଇଛି। ଏପରିକି ଶେୟାର ବଜାରରେ ନିରପେକ୍ଷତା, କୁଶଳତା ଓ ମଜଭୁତ ଭିତ୍ତିଭୂମି ବଜାୟ ରଖିବା ପାଇଁ ଆମେ ପ୍ରତିଶ୍ରୁତିବଦ୍ଧ ରହିଛୁ। ଏଣୁ ଶେୟାର ବଜାର କିପରି ନର୍ବାଧା, ପାରଦର୍ଶୀ ଓ କୁଶଳ ରୂପେ କାମ କରିପାରିବ ତା’ ଉପରେ ମଧ୍ୟ ବ୍ୟାପକ ଆଲୋଚନା କରାଯାଉଛି। ଏପର୍ଯ୍ୟନ୍ତ ଯେପରି ଚାଲିଥିଲା ସେଥି ପାଇଁ ମଧ୍ୟ ଆମେ ପ୍ରତିଶ୍ରୁତିବଦ୍ଧ ବୋଲି ଉଭୟ ସେବୀ ଓ ଆର୍ବିଆଇ ବିସ୍ତୃତ ମତ ଉପସ୍ଥାପନ କରିଥିଲେ।