ସରୁନି ଜଳାଶୟ କାମ
କେନ୍ଦୁଝର,୧୮।୪(ସ୍ବ.ପ୍ର.) ବନ୍ୟଜନ୍ତୁଙ୍କ ପାଇଁ ଜଙ୍ଗଲରେ ଜଳ ସୁବିଧା ପାଇଁ ବନ ବିଭାଗ ପକ୍ଷରୁ ଜଳାଶୟ ଖନନ କରାଯାଉଛି। ତେବେ ଉପଯୁକ୍ତ ତଦାରଖ ଅଭାବରୁ ଠିକ୍ ସମୟରେ ନିର୍ମାଣ କାର୍ଯ୍ୟ ସରୁ ନ ଥିବାରୁ ଜଙ୍ଗଲରେ ବନ୍ୟପ୍ରାଣୀଙ୍କ ପାଇଁ ଜଳସଙ୍କଟ ଦେଖାଦେଇଛି। ପୂର୍ବରୁ ନିର୍ମିତ ଜଳାଶୟ ଠିକ୍ ସ୍ଥାନରେ ନ ଥିବାରୁ କାମରେ ଲାଗୁନାହିଁ। ଖରାର ପ୍ରକୋପ ବୃଦ୍ଧି ପାଉଥିବାରୁ ବନ୍ୟପ୍ରାଣୀ ବିପଦରେ ପଡ଼ିଛନ୍ତି।
ପ୍ରକାଶ ଯେ, କାମ୍ପା ପାଣ୍ଠିରୁ ବଡ଼ବିଲ ରେଞ୍ଜ ନାଲଦା ସେକ୍ସନ ଉଲିବୁର ସଂରକ୍ଷିତ ଜଙ୍ଗଲରେ ୨ଟି ଜଳାଶୟ ଏବଂ ଗୁଆଲି ସେକ୍ସନ ସିଦ୍ଧମଠ ସଂରକ୍ଷିତ ଜଙ୍ଗଲରେ ଗୋଟିଏ ଏବଂ ଓମ୍ବାଡ୍ସି ପାଣ୍ଠିରୁ ଚମ୍ପୁଆ ରେଞ୍ଜ କାଳିକା ପ୍ରସାଦ ସଂରକ୍ଷିତ ଜଙ୍ଗଲରେ ଗୋଟିଏ ପୋଖରୀ ପାଇଁ ବନ ବିଭାଗ ପକ୍ଷରୁ ଗତ ଡିସେମ୍ବରରେ ଟେଣ୍ଡର କରାଯାଇଥିଲା। ତେବେ ଖରା ଦିନ ପୂର୍ବରୁ ଏହି କାମ ଶେଷ ହେବା କଥା। ବିଳମ୍ବରେ କାମ ଆରମ୍ଭ ହେବାରୁ କାମ ସରିପାରିନାହିଁ। କାମ ସରି ନ ଥିବାବେଳେ ଠିକାଦାରଙ୍କୁ ସମ୍ପୂର୍ଣ୍ଣ ବିଲ ପଇଠ କରାଯାଇଥିବା ଅଭିଯୋଗ ହୋଇଛି। କାମ ଶେଷ ନ ହୋଇ ଫରେଷ୍ଟର କିପରି ମାପଚୁପ କଲେ ଏବଂ ରେଞ୍ଜର କିପରି ଅର୍ଥ ପଇଠ କଲେ ତାହା ତଦନ୍ତ ସାପେକ୍ଷ। ଅଗ୍ରୀମ ଭାଉଚର କରି ଜଳାଶୟ ଗୁଡ଼ିକରେ ଅର୍ଥ ପଇଠ ହୋଇଥିବାବେଳେ ବାସ୍ତବରେ କାମ ଅଧପନ୍ତରିଆ ରହିଛି। ଏ ନେଇ ବଡ଼ବିଲ ରେଞ୍ଜ ଅଧିକାରୀ ଅମୂଲ୍ୟ ସେନାପତି କହିଛନ୍ତି, ୨୦୨୨-୨୩ ରେ ୭ ଟି କାମ ଆରମ୍ଭ କରାଯାଇଥିଲା। ସବୁ କାମ ସରିଛି ଓ ବିଲ ପୈଠ ହୋଇଛି।
ଅନ୍ୟପକ୍ଷେ ଜିଲାରେ ତାପମାତ୍ରା ୪୦ ଡିଗ୍ରୀରେ ପହଞ୍ଚତ୍ଥିବା ବେଳେ ବର୍ଷା ହେଉ ନ ଥିବାରୁ ଜଳସଂକଟ ଦେଖାଦେଉଛି। କୂଅ, ପୋଖରୀ, ନଦୀନାଳ, କେନାଲ ଆଦିରେ ଜଳ ପରିମାଣ କମିଯାଇଛି। ଜଳ ସମସ୍ୟା ପାଇଁ ବନ୍ୟପ୍ରାଣୀ ଜଙ୍ଗଲରୁ ବାହାରି ଏଣେ ତେଣେ ଜଳ ପାଇଁ ପଳାଉଛନ୍ତି ଓ ଅନେକ ଗାଁ ମୁହଁା ହେଉଛନ୍ତି। ଫଳରେ ମଣିଷ ଓ ବନ୍ୟପ୍ରାଣୀଙ୍କ ମଧ୍ୟରେ ତିକ୍ତତା ବଢୁଛି। ଏଭଳି ପରିସ୍ଥିତିରେ ବନ ବିଭାଗ ପକ୍ଷରୁ ସତର୍କତା ବା ଆଗୁଆ ବ୍ୟବସ୍ଥା କରାଯାଉ ନ ଥିବାରୁ ବନ୍ୟଜନ୍ତୁ କ୍ଷତିଗ୍ରସ୍ତ ହେଉଛନ୍ତି ବୋଲି ପରିବେଶବିତ୍ ଅକ୍ଷୟ ପଟ୍ଟନାୟକ କହିଛନ୍ତି। ଗତ ତିନି ବର୍ଷ ମଧ୍ୟରେ ହୋଇଥିବା କାମର ଯାଞ୍ଚ କରାଗଲେ ବହୁ ଅନିୟମିତତା ପଦାକୁ ଆସିବ ବୋଲି ମତ ପ୍ରକାଶ ପାଉଛି। ଜିଲାରେ କେତେ ଜଳାଶୟ ନିର୍ମାଣ ହୋଇଛି ସେ ନେଇ ଡିଏଫ୍ଓ ଧନ୍ରାଜ ଏଚ୍.ଡିଙ୍କୁ ତଥ୍ୟ ମାଗିଥିଲେ ହେଁ ମିଳିପାରିନାହିଁ।