କେନ୍ଦୁଝର,୩।୪(ଡି.ଏନ୍.ଏ.) ଗ୍ରୀଷ୍ମ ଆରମ୍ଭରୁ ହିଁ କେନ୍ଦୁଝରଗଡ଼ ପୌରପାଳିକାର ୨୧ ୱାର୍ଡରେ ଜଳ ସଙ୍କଟ ଦେଖାଦେଇଛି। ପାନୀୟ ଜଳ ପାଇଁ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ସେହିପରି ବିଗତ ଦିନରେ ରାସ୍ତା ପ୍ରଶସ୍ତିକରଣ ଯୋଗୁ ରାସ୍ତାକଡ଼ରେ ଥିବା ନଳକୂପଗୁଡ଼ିକୁ ଉଠାଇ ନିଆଯାଇଛି। ଫଳରେ ବର୍ତ୍ତମାନର ୩୫ରୁ ୪୦ଡିଗ୍ରୀ ତାତିରେ ରାଜରାସ୍ତାରେ ଯାଉଥିବା ବାଟୋଇଙ୍କ ପାଇଁ ମଧ୍ୟ ପାନୀୟ ଜଳର କୌଣସି ପ୍ରକାର ବ୍ୟବସ୍ଥା ନାହିଁ। ଏଥିପ୍ରତି ବିଶେଷ ଧ୍ୟାନ ଦେଇ ସୁବ୍ୟବସ୍ଥା କରିବାକୁ ନବନିର୍ବାଚିତା ପୌରାଧ୍ୟକ୍ଷାଙ୍କୁ ସ୍ଥାନୀୟ ଲୋକେ ଅନୁରୋଧ କରିଛନ୍ତି। ପୌରପାଳିକାର ୨୧ ୱାର୍ଡ ମଧ୍ୟରୁ ଜିଲା ମୁଖ୍ୟ ଚିକିତ୍ସାଳୟ ପାଖାପାଖି ଅଞ୍ଚଳ ପଟେ ସକାଳେ ଓ ସନ୍ଧ୍ୟା ସମୟରେ ଜନସ୍ବାସ୍ଥ୍ୟ ବିଭାଗ ପକ୍ଷରୁ ପାନୀୟ ଜଳ ଯୋଗାଣ ହେଉଛି। ହେଲେ ଅନ୍ୟ ୱାର୍ଡଗୁଡ଼ିକରେ ଏହି ସୁବିଧା ମିଳୁ ନ ଥିବା ଯୋଗୁ ଲୋକେ ହଇରାଣ ହେଉଛନ୍ତି। ମୁଖ୍ୟତଃ ୯ ନଂ. ୱାର୍ଡରେ ଦୈନିକ ଅପରାହ୍ନ ୨ଟାରୁ ୩ଟା ମଧ୍ୟରେ ବର୍ତ୍ତମାନ ପ୍ରାୟତଃ ଖୁବ୍ କମ୍ ସମୟ ପାଣି ଦେବା ପରେ ବନ୍ଦ ହୋଇଯାଉଛି। ଏପରିକି ବହୁ ସମୟରେ ପାଣି ଆଦୌ ଆସୁ ନ ଥିବା ଅଭିଯୋଗ ହେଉଛି। ଏହି ସମସ୍ୟାର ସମାଧାନ ଲାଗି ଆଇନଜୀବୀ ତଥା ସାମାଜିକ କର୍ମୀ ସୁଶ୍ରୀ ସଙ୍ଗୀତା ସିଂହ ଦାବି କରିଛନ୍ତି। ଏ ଦିଗ ପ୍ରତିି ଧ୍ୟାନ ଦିଆ ନ ଗଲେ ଜନସ୍ବାସ୍ଥ୍ୟ ଖଣ୍ଡ, ନିର୍ବାହୀ ଯନ୍ତ୍ରୀଙ୍କ କାର୍ଯ୍ୟାଳୟକୁ ଘେରାଉ କରାଯିବ ବୋଲି ସେ ଚେତାବନୀ ଦେଇଛନ୍ତି।
