ପୃଥିବୀ ରହସ୍ୟରେ ପରିପୂର୍ଣ୍ଣ। ବୈଜ୍ଞାନିକମାନେ ଏହାର ରହସ୍ୟ ଜାଣିବାକୁ ଚେଷ୍ଟା କରିଥାନ୍ତି। ସେଥିମଧ୍ୟରୁ କେତେକ ଘଟଣା ଉପରୁ ପରଦା ହଟାଇଥାନ୍ତି ତ ଆଉ କେତେକର ରହସ୍ୟ ଆଜି ମଧ୍ୟ ଉନ୍ମୋଚନ କରିପାରିନାହାନ୍ତି।
ଫ୍ରାନ୍ସର ବରଗୁଣ୍ଡି ଅଞ୍ଚଳରେ ଏକ ସ୍ଥାନ ଅଛି, ଯାହାର ରହସ୍ୟ ଆଜି ପର୍ଯ୍ୟନ୍ତ କାହାକୁ ଜଣାନାହିଁ। ଦେଶର ଟୋନେର ନାମକ ଏକ ସହରରେ ପ୍ରତି ସେକେଣ୍ଡରେ ୩୦୦ ଲିଟରରୁ ଅଧିକ ଜଳ ଭୂଗର୍ଭରୁ ବାହାରୁଛି। ହଜାର ହଜାର ବର୍ଷ ଧରି ଲଗାତର ବାହାରୁଥିବା ଏହି ଜଳର ଉତ୍ସ ଆଜି ପର୍ଯ୍ୟନ୍ତ ଖୋଜି ମିଳିପାରିନାହିଁ। ଏହି ଜଳର ଉତ୍ସ ଜାଣିବା ପାଇଁ ଅନେକ ଚେଷ୍ଟା କରାଯାଇଥିଲା, କିନ୍ତୁ କେହି ସଫଳ ହୋଇ ପାରିନାହାନ୍ତି। ବର୍ତ୍ତମାନ ଏହା ଏକ ବଡ଼ ପ୍ରଶ୍ନ ଯେ, କ୍ରମାଗତ ଭାବରେ ପୃଥିବୀରୁ ବାହାରୁଥିବା ଏହି ଜଳର ଉତ୍ସ କେଉଁଠି?
ଫ୍ରାନ୍ସର ଲୋକମାନେ ଏହି ରହସ୍ୟମୟ ଜଳପ୍ରପାତକୁ ଈଶ୍ବରଙ୍କ ଚମତ୍କାରିତା ବୋଲି ବିବେଚନା କରନ୍ତି। କୁହାଯାଏ, ରୋମୀୟମାନେ ମଧ୍ୟ ଏହି ପାଣି ପିଉଥିଲେ। ସେମାନେ ମଧ୍ୟ ୧୭ତମ ଶତାବ୍ଦୀରେ ଏହି ଜଳରେ ସ୍ନାନ କରୁଥିଲେ। ଏହା ପରେ ଅଷ୍ଟାଦଶ ଶତାବ୍ଦୀରେ ବୈଜ୍ଞାନିକମାନେ ଏହି ଜଳପ୍ରପାତର ଉତ୍ସ ବିଷୟରେ ଜାଣିବାକୁ ଚେଷ୍ଟା କଲେ। ପରେ ଦେଖାଗଲା ଏହି ଜଳପ୍ରପାତର ଶେଷ ନାହିଁ ।
କୁହାଯାଏ, ଯିଏ ଏହି ଜଳପ୍ରପାତ ଭିତରକୁ ଯାଇଛି ସେ ଆଉ ଫେରି ପାରିନାହିଁ। ଏହାର ରହସ୍ୟ ଜାଣିବା ପାଇଁ ଚେଷ୍ଟା କରିଥିବା ଅନେକ ଲୋକଙ୍କର ମୃତ୍ୟୁ ବି ଘଟିଛି।