ପୁରୀ ଅଫିସ,୧୯।୭:ଚଳିତବର୍ଷର ମହାପ୍ରଭୁଙ୍କ ନବଦିନାତ୍ମକ ଯାତ୍ରା ସମୟରେ ଶ୍ରୀମନ୍ଦିର ମରାମତି କାର୍ଯ୍ୟ ଚାଲିଥିଲା। ଭାରତୀୟ ପ୍ରତ୍ନତାତ୍ତ୍ୱିକ ସର୍ବେକ୍ଷଣ (ଏଏସ୍ଆଇ) ପକ୍ଷରୁ ନାଟମଣ୍ଡପ, ଭୋଗମଣ୍ଡପ, ରୋଷଘର ସମେତ ଅନେକ ସ୍ଥାନରେ ମରାମତି କାର୍ଯ୍ୟ କରାଯାଇଥିବା କୁହାଯାଇଥିଲା। ତେବେ ମରାମତିକୁ ଦିନ କେଇଟା ନ ପୂରୁଣୁ ନାଟମଣ୍ଡପ ଛାତରୁ ପାଣି ଗଳିବା ଆରମ୍ଭ କଲାଣି। ଗତ ଶନିବାର ରାତିରେ ପୁରୀରେ ହୋଇଥିବା ଲଗାଣ ବର୍ଷା ପ୍ରଭାବରେ ନାଟମଣ୍ଡପରେ ଥିବା ଗରୁଡ଼ଙ୍କ ଉପରଭାଗ ଛାତରୁ ପାଣି ଗଳୁଥିବା ଦେଖିବାକୁ ମିଳିଥିଲା। ଗରୁଡ଼ଙ୍କ ମୁଣ୍ଡ ଉପରେ ଥିବା ଚାନ୍ଦୁଆ ବର୍ଷାପାଣିରେ ଭିଜିଯାଇଥିଲା। ଫଳରେ ନାଟମଣ୍ଡପ ଚଟାଣ ଉପରେ ପାଣି ପଡ଼ିବାରେ ଲାଗିଥିଲା। ଏଭଳି ସ୍ଥିତିରେ ସମ୍ପ୍ରତି ବର୍ଷାଋତୁରେ ସ୍ଥିତି ଆହୁରି ସଙ୍ଗିନ ହେବା ଆଶଙ୍କା କରାଯାଉଛି ବୋଲି ଜଗନ୍ନାଥପ୍ରେମୀମାନେ ମତ ବ୍ୟକ୍ତ କରିଛନ୍ତି। ଏ ନେଇ ପୁରୀ ସର୍କଲ ଏଏସ୍ଆଇ କାର୍ଯ୍ୟାଳୟ ସହ ଯୋଗାଯୋଗ କରାଯିବାରେ କୁହାଯାଇଛି ଯେ, ଭାଇବର ନେଟିଂ କରାଯାଇ କେମିକାଲ୍ ଦିଆଯାଇଛି। ଏହାସତ୍ତ୍ବେ ପାଣି କିଭଳି ଭାବେ ଲିକ୍ କରୁଛି ତାହା ଦେଖିବାକୁ ପଡ଼ିବ। ତେବେ ଶ୍ରୀମନ୍ଦିରର ପୁରୁଣା ପଥର ପାଣିକୁ ସହଜରେ ଗ୍ରହଣ କରିନେଉଛି। ପଥର ପାଣି ଟାଣି ନେବା ଫଳରେ ବର୍ଷା ଅଧିକ ହେଲେ, ପାଣି ଗଳୁଛି। ତେବେ ପୂର୍ବରୁ ଯେଉଁଭଳି ଭାବେ ଶ୍ରୀମନ୍ଦିର ଭିତରେ ବିଭିନ୍ନ ସ୍ଥାନରୁ ପାଣି ଗଳୁଥିଲା, ଏବେ ସେଭଳି ସ୍ଥିତି ନାହିଁ। ବହୁ ମାତ୍ରାରେ ସ୍ଥିତି ସୁଧୁରିଛି। ବାୟୁମଣ୍ଡଳରେ ଜଳୀୟବାଷ୍ପର ପରିମାଣର ଅଧିକ ହେବା ଫଳରେ ବିମ୍ଗୁଡ଼ିକ ଝାଳେଇ ଯାଉଛି। ଏହା ମଧ୍ୟ ପାଣି ଗଳିବାର ଏକ କାରଣ ହୋଇପାରେ। ପାଣି ଗଳିବା ଘଟଣା ସାମ୍ନାକୁ ଆସିବା ପରେ ଏଏସ୍ଆଇ ଅଧିକାରୀମାନେ ଏହି ଦିଗରେ ଧ୍ୟାନ ଦେବେ। ବର୍ଷା ସମୟରେ କ’ଣ ସମସ୍ୟା ହେଉଛି ତାହାର ଯାନ୍ତ୍ରିକ କାରଣ ଖୋଜାଯିବ। ଆମେ ସ୍ଥିତି ଉପରେ ତୀକ୍ଷ୍ଣ ନଜର ରଖିଛୁ। ସେହିଭଳି ବର୍ଷାଦିନେ ଆଉ ମରାମତି କରିବା ସମ୍ଭବପର ନୁହେଁ। ମାତ୍ର ସମସ୍ୟା ଚିହ୍ନଟ ପାଇଁ ଏହା ଠିକ୍ ସମୟ। ଏବେ ସମସ୍ୟା ଚିହ୍ନଟ ହୋଇଗଲେ, ଅକ୍ଟୋବରରେ ମରାମତି କରିପାରିବା ବୋଲି ଏଏସ୍ଆଇ ପକ୍ଷରୁ କୁହାଯାଇଛି। ଏ ସମ୍ପର୍କରେ ସୂଚନା ଅଧିକାର କର୍ମୀ ଦିଲୀପ ବରାଳ କହିଛନ୍ତି, ଶ୍ରୀମନ୍ଦିର ଏକ ପୁରାତନ କାରୁକାର୍ଯ୍ୟ ଓ ଐତିହ୍ୟ କୀର୍ତ୍ତିରାଜି। ଏଏସ୍ଆଇ ଭଳି ଏକ ଦକ୍ଷ ସଂସ୍ଥା ଏହାର ରକ୍ଷଣାବେକ୍ଷଣ ଦାୟିତ୍ୱରେ ରହିଛି। ଏଣୁ କିଭଳି ଭାବେ ଯାନ୍ତ୍ରିକ ସମସ୍ୟାକୁ ଚିହ୍ନଟ କରି ତାହାର ସମାଧାନ ଉପରେ ଗୁରୁତ୍ୱ ଦିଆଯିବ ସେନେଇ କାର୍ଯ୍ୟକ୍ରମ ହାତକୁ ନିଆଯିବା ଦରକାର। ନାଟମଣ୍ଡପର ଆମୂଳଚୂଳ ମରାମତି କରାଯିବା ଦରକାର, ଫଳରେ ବର୍ଷାଦିନେ ଏଭଳି ସ୍ଥିତି ଦେଖିବାକୁ ମିଳିବ ନାହିଁ।