କର୍ଲାମୁଣ୍ଡା,୧୮।୬(ପ୍ରଦୀପ ସାହୁ): ସରକାର ସମସ୍ତଙ୍କୁ ପିଇବା ପାଣି ଯୋଗାଇଦେବା ନେଇ ବସୁଧା ଯୋଜନାରେ ବିଭନ୍ନ ସ୍ଥାନରେ ପାଣି ଟାଙ୍କି ନିର୍ମାଣ ପାଇଁ ଟେଣ୍ଡର ବ୍ୟବସ୍ଥା କରିଛନ୍ତି। ହେଲେ ଠିକ୍ ସମୟରେ ଟାଙ୍କି ନିର୍ମାଣ ହୋଇପାରୁ ନ ଥିବାରୁ ସାଧାରଣ ଲୋକଙ୍କ ପାଇଁ ଯୋଜନା ଅପହଞ୍ଚ ହୋଇପଡ଼ିଛି। ଏଭଳି ପରିସ୍ଥିତି କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକରେ ଦେଖିବାକୁ ମିଳିଛି।
ବ୍ଲକର ପୁଟିଗା ଉତେଇ ନଦୀରୁ ପୁଟିଗା ଓ ରାଜପୁର ପାଇଁ ପାଇପ ଯୋଗେ ପାନୀୟ ଜଳ ଯୋଗାଣ ନିମନ୍ତେ ୪ କୋଟି ଟଙ୍କା ଅଟକଳରେ ୩ବର୍ଷ ତଳେ କାର୍ଯ୍ୟ ଆରମ୍ଭ ହୋଇଥିଲା। ଏଥିପାଇଁ ଉଭୟ ଗାଁରେ ପାଣି ଟାଙ୍କି ନିର୍ମାଣ ଶେଷ ହୋଇଥିଲେ ମଧ୍ୟ ଅନ୍ୟ କାର୍ଯ୍ୟ ହୋଇପାରି ନାହିଁ। ଫଳରେ ଉଭୟ ଗ୍ରାମବାସୀଙ୍କ ପାଇଁ ବସୁଧା ଯୋଜନା ବାଟବଣା ହୋଇଛି। ସେହିପରି ଝାରମୁଣ୍ଡା ଓ ବ୍ରହ୍ମଣୀମୁଣ୍ଡା ପାଇଁ ଝରମୁଣ୍ଡାଠାରେ ପାଣିଟାଙ୍କି ନିର୍ମାଣ, ସିରବହସଲ ଓ ବଡଡୁଙ୍ଗୁରିଗୁଡାରେ ଟାଙ୍କି ନିର୍ମାଣ ହୋଇଥିଲେ ମଧ୍ୟ ଏହିସବୁ ଗାଁକୁ ପାଇପ୍ ଯୋଗେ ଜଳ ଯୋଗାଣ ଆରମ୍ଭ ହୋଇ ନ ଅଭିଯୋଗ ହେଉଛି।
ଏପରିକି ବୁଢ଼ୀପଦର ଓ ଖରଝୋରା ଟେଣ୍ଡର ହେବାର ୩ବର୍ଷ ବିତିଯାଇଥିଲେ ମଧ୍ୟ ପାଣି ଟାଙ୍କି ନିର୍ମାଣ ହୋଇପାରି ନାହିଁ। ସୂଚନାଯୋଗ୍ୟ, ଠିକାଦାରମାନେ ନିୟମ ପାଳନ କରୁ ନ ଥିବାରୁ ବସୁଧା ଯୋଜନା ଏବେ ଫେଲ ମାରିଛି। ଅନ୍ୟପକ୍ଷେ ବ୍ଲକରେ କିଛି ଦିନ ହେଲା ତାପମାତ୍ରା ୪୩ରୁ ୪୫ ଡିଗ୍ରୀ ରହୁଥିବାରୁ ନଦୀ, ନାଳ, ପୋଖରୀ, ନଳକୂଅଗୁଡିକ ଶୁଖିବାରେ ଲାଗିଛି। ଫଳରେ ଲୋକେ ପାନୀୟ ଜଳ ପାଇଁ ହଇରାଣ ହେଉଥିବା ଦେଖିବାକୁ ମିଳୁଛି। ଏ ନେଇ ବିଭାଗୀୟ ଯନ୍ତ୍ରୀ ଅନୁସାୟା ଭଞ୍ଜଙ୍କୁ ପଚାରିବାରୁ ପୁଟିଗା ଓ ରାଜପୁର ପ୍ରକଳ୍ପ ପାଇଥିବା ଠିକାଦାର କାମରେ ବିଳମ୍ବ ଓ ଲୋକଙ୍କ ଅଭିଯୋଗ କ୍ରମେ ତାଙ୍କ ଏଗ୍ରିମେଣ୍ଟକୁ ବାତିଲ କରାଯାଇ ଟେଣ୍ଡର ଜରିଆରେ ନୂତନ ଠିକାଦାରଙ୍କୁ ଦାୟିତ୍ୱ ଦିଆଯାଇଛି। କାର୍ଯ୍ୟ ଶୀଘ୍ର ଆରମ୍ଭ ହେବ। ଝାରମୁଣ୍ଡା, ବ୍ରହ୍ମଣୀମୁଣ୍ଡା, ସିରାବାହାଲ, ବଡ଼ଡୁଙ୍ଗୁରିଗୁଡା, କଣ୍ଡରେଇ, ବୁଢ଼ୀପଦର, ଖରଝୋରା ଏହି ୭ଟି ଗାଁର ପ୍ରକଳ୍ପ ୭ କୋଟି ଟଙ୍କା ଅଟକଳରେ ଠିକାଦାରଙ୍କ ଦ୍ୱାରା ନଭେମ୍ବର ସୁଦ୍ଧା କାର୍ଯ୍ୟ ଶେଷ ହେବା ଚୁକ୍ତିନାମା ରହିଛି ବୋଲି କହିଛନ୍ତି।