ବାଲିପାଟଣା,୪ା୮(ଅଭିମନ୍ୟୁ ନାୟକ): ରାଜ୍ୟରେ ବର୍ଷା ଥମୁ ନ ଥିବା ବେଳେ ବିଭିନ୍ନ ନଦୀରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। କୁଶଭଦ୍ରା ଓ ଭାର୍ଗବୀ ନଦୀର ଜଳସ୍ତର ବଢ଼ିବାରେ ଲାଗିଛି। ବନ୍ୟାଜଳ ପ୍ରବେଶ କରିବାରୁ ସରିପୁର ଗ୍ରାମ ନିକଟ କୁଶଭଦ୍ରା ନଦୀ ଭିତରେ ଚରୁଥିବା ବେଳେ ତିନୋଟି ଗାଈ ଭାସି ଯାଇଥିଲେ। ଗ୍ରାମବାସୀ ଦୁଇଟି ଗାଈକୁ ଉଦ୍ଧାର କରିଥିବା ବେଳେ ଆଉ ଗୋଟିଏ ଗାଈର ମୃତ୍ୟୁ ଘଟିଛି। ସେହିପରି ଭାର୍ଗବୀ ନଦୀର ବନ୍ୟାଜଳ ଅଚ୍ୟୁତପୁର କାଜଦେଇ ପ୍ରବାହିତ ଜଳ ବିଲରେ ପ୍ରବେଶ କରିଛି। କାଜର ବନ୍ଧ ନ ଥିବାରୁ ରାଜସ, ଷୋମଣ, ଆଳିସି ଶାସନ, ପମ୍ପାଲ ଓ କୁରୁନଜିପୁର ପଞ୍ଚାୟତରେ ପରିବା ଓ ଧାନ ଫସଲ ବ୍ୟାପକ କ୍ଷୟକ୍ଷତି ହେବ। ମୁଣ୍ଡୁଳି ଠାରେ ପ୍ରବାହିତ ୯.୬୦ଲକ୍ଷ କ୍ୟୁସେକ ବନ୍ୟାଜଳ ଶୁକ୍ରବାର ପୂର୍ବାହ୍ନ ୧୧ଟା ଶୁଦ୍ଧା ତଳ ମୁଣ୍ଡରେ ପହଞ୍ଚିବ ବୋଲି ବାଲିପାଟଣା ଜଳ ସମ୍ପଦ ବିଭାଗ ସହକାରୀ ଯନ୍ତ୍ରୀ ଜ୍ଞାନରଞ୍ଜନ ନାୟକ କହିଛନ୍ତି। ବ୍ଲକ ପ୍ରଶାସନ ପକ୍ଷରୁ ପ୍ରତି ବନ୍ୟାପ୍ଲାବିତ ପଞ୍ଚାୟତରେ ଶୁଖିଲା ଖାଦ୍ୟ ମହଜୁଦ ଥିବା ସହିତ ଉଦ୍ଧାର ପାଇଁ ଏନ୍ଡିଆରଏଫ୍ କର୍ମଚାରୀ ପ୍ରସ୍ତୁତ ଥିବା ବିଡିଓ ଆଦିକନ୍ଦ ବେହେରା କହିଛନ୍ତି। ପ୍ରଭାବିତ ଲୋକଙ୍କ ପାଇଁ ଔଷଧ ବାଣ୍ଟିବାକୁ ବ୍ୟବସ୍ଥା କରାଯିବ ବୋଲି ଜିଲା ମୁଖ୍ୟ ଚିତ୍ସାଧିକାରୀ ଡା.ଆର୍ତ୍ତବନ୍ଧୁ ନାୟକ କହିଛନ୍ତି।